ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានរំលឹកពីប្រវត្តិខួបអាពាហ៍ពិពាហ៍ ៤៤ ឆ្នាំ ជាមួយឧត្តមភរិយា គឺសម្តេចកិត្តិព្រឹទ្ធបណ្ឌិត គឺពីថ្ងៃ (៥ មករា ១៩៧៦ – ៥ មករា ២០២០) ជាមួយនិងការ ពាក្យពេចន៍ដ៏មានអត្ថន័យថា៖ គូព្រេងមិនព្រាត់ អាពាហ៍ពិពាហ៍ ក្នុងគ្រាកលិយុគ។

សម្តេចតេជោ ហ៊ុន សែន បានបង្ហោះលើ Facebook ផ្លូវការយ៉ាងដូច្នេះថា៖ ថ្ងៃនេះ គឺជាខួបអាពាហ៍ពិពាហ៍ ៤៤ ឆ្នាំរបស់ខ្ញុំ (៥ មករា ១៩៧៦ – ៥ មករា ២០២០)។ ខ្ញុំតែងតែគិតថាអ្វីដែលខ្ញុំនិងភរិយាបានឆ្លងកាត់ក្នុងសម័យសង្គ្រាមគឺពុំគួរឱ្យជឿថា ខ្ញុំអាចមានជីវិតរស់នៅរហូមកដល់សព្វថ្ងៃនេះឡើយ។ កាលពីថ្ងៃទី ១៤ ខែ ធ្នូ ឆ្នាំ ២០១៩ ខ្ញុំបានផុសចេញនូវអត្ថបទប្រវត្តិរឿងពិតរបស់ខ្ញុំ និងភរិយា ទាំង២ វគ្គ ជូនបងប្អូនជនរួមជាតិបានស្វែងយល់ពីខ្សែជីវិតពិតរបស់ប្តីប្រពន្ឋខ្ញុំទាំងពីរនាក់ដែលបានឆ្លងកាត់នៅក្នុងរបបប្រល័យពូជសាសន៍ ប៉ុលពត ដែលគ្មានទេដែលហៅថាសេចក្តីសុខ រួមទាំងការស្លាប់បាត់បង់កូនទី១ជាទីស្រឡាញ់បំផុតទៀតផង។

សម្តេចបន្តថា៖ ពិតណាស់ រឿងរ៉ាវទាំងអស់នេះគឺសុទ្ធតែរឿងរ៉ាវមិនគ្រាន់តែសម្រាប់ជីវិតខ្ញុំ និងភរិយាខ្ញុំប៉ុណ្ណោះទេ ប៉ុន្តែវាក៏ជារឿងរ៉ាវដែលបានកើតឡើងសំរាប់ប្រជាជនកម្ពុជាទូទាំងប្រទេស ដែលបានឆ្លងកាត់សង្រ្គាម និងរបបប្រល័យពូជសាសន៍ក្នុងសម័យនោះផងដែរ។

សម្តេចតេជោ ហ៊ុន សែន បានមានប្រសាសន៍បន្តថា៖ ខ្ញុំសូមចែករំលែកនូវប្រវត្តិរឿតពិតរបស់ខ្ញុំ និងភរិយា ជូនបងប្អូនជនរួមជាតិសារជាថ្មីដូចភ្ជាប់មកខាងក្រោមនេះ៕

ដោយ៖ សុខ ខេមរា