ខេត្តព្រះសីហនុ ៖ មន្ដ្រីស្ថានីយរថភ្លើងបានសម្តែងក្តីបារម្ភអំពីសុខភាព បន្ទាប់ពីកើតមានអំពើលួច ដោយពលរដ្ឋមួយចំនួនជាជនខិលខូច បាននាំគ្នាលួចអង្ករចេញពីទូរថភ្លើងយកទៅដាំហូប ខណៈរថភ្លើងបានខូចមិនអាចដំណើរការទៅមុខរួច កាលពីវេលាម៉ោង៣ទៀបភ្លឺព្រឹក ថ្ងៃទី០៧ ខែកុម្ភៈ ឆ្នាំ២០២០ នៅត្រង់ចំណុចជិតរោងចក្រអគ្គិសនីធ្យូងថ្មស្ទឹងហាវ ស្ថិតក្នុងខេត្តព្រះសីហនុ ។
មន្ត្រីស្ថានីយរថភ្លើងបញ្ជាក់ប្រាប់ថា កាលពីយប់មិញរថភ្លើងមួយខ្សែបានដឹកអង្ករចេញពីរាជធានីភ្នំពេញទៅកាន់ខេត្តព្រះសីហនុ ដើម្បីនាំចេញទៅក្រៅប្រទេស ប៉ុន្តែម៉ាស៊ីនមិនដំណើរការទៅមុខរួច រថភ្លើងក៏ត្រូវឈប់ទាំងយប់កណ្តាលផ្លូវ ។ ទម្លាប់អាក្រក់ពលរដ្ឋភាគតិចបែរជាមានគំនិតមិនល្អនាំគ្នាចូលលួចអង្ករចេញពីទូរថភ្លើងទៅវិញ ។
ផ្តើមចេញពីការលួចអង្ករនេះ ធ្វើឲ្យមន្ត្រីបារម្ភ និងសូមផ្តាំផ្ញើដំណឹងនេះថា ក្នុងអង្ករមានជាតិថ្នាំ ដែលដាក់ដើម្បីការពារសត្វល្អិតថែរក្សាគុណភាពអង្ករ មិនទាន់អស់សុពលភាពនៃជាតិថ្នាំ បើយកទៅដាំបាយហូបងាយប្រឈមប៉ះពាល់សុខភាពណាស់ ៕ ជាយក្រុង
