ខេត្តកណ្តាល៖ ជនសង្ស័យម្នាក់ជិះម៉ូតូទៅធ្វើសកម្មភាពលួចកាបូបលុយនៅក្នុងតូបលក់សម្លៀកបំពាក់មួយកន្លែងបានសម្រេចរត់ចេញមកក្រៅបម្រុងជិះម៉ូតូរត់គេចខ្លួន ខណៈនោះត្រូវបានសមត្ថកិច្ចនគរបាលល្បាតចាប់ខ្លួន បញ្ជូនទៅកាន់អធិការដ្ឋាននគរបាលក្រុងតាខ្មៅដើម្បីកសាងសំណុំរឿងចាត់ការតាមច្បាប់ ។
ករណីលួចកាបូបលុយនេះបានកើតឡើងកាលពីវេលាម៉ោង២២ និង៤០នាទី ថ្ងៃទី៦ ខែមករា ឆ្នាំ២០១៦ ត្រង់ចំណុចតូបលក់សម្លៀកបំពាក់យីហោ “តារាហេងហេង” តាមបណ្តោយផ្លូវលេខ១១០ ស្ថិតក្នុងភូមិថ្មី២ សង្កាត់-ក្រុងតាខ្មៅ ខេត្តកណ្តាល ។
មន្ត្រីនគរបាលក្រុងតាខ្មៅបានឲ្យដឹងថា ជនសង្ស័យឈ្មោះពេញ សុខាល័យ ភេទប្រុស អាយុ៣១ឆ្នាំ មុខរបរមិនពិតប្រាកដ មានទីលំនៅក្នុងភូមិបត្តាជី សង្កាត់ព្រែកហូរ ក្រុងតាខ្មៅ ។ ចំណែកឯស្ត្រីរងគ្រោះជាម្ចាស់តូបលក់សម្លៀកបំពាក់ខាងលើនេះមានឈ្មោះ អ៊ី ណារី អាយុ៣៥ឆ្នាំ ទីលំនៅក្នុងភូមិលេខ១ ឃុំស្វាយរលំ ស្រុកស្អាង ។
ប្រភពដដែលបានបន្តថា ក្នុងប្រតិបត្តិការឃាត់ខ្លួនជនសង្ស័យខាងលើនេះសមត្ថកិច្ចនគរបាលដកហូតវត្ថុតាងរួមមាន កាបូបដៃ ពណ៌លឿង មានលុយចំនួន៤៣០០រៀល(ជារបស់ស្ត្រីរងគ្រោះ) ម៉ូតូមួយគ្រឿងម៉ាកស៊ុយហ្ស៊ូគី និច ពណ៌ខ្មៅលាយក្រហម ស៊េរីឆ្នាំ២០១៣ គ្មានស្លាកលេខ (ជាមធ្យោបាយជិះធ្វើសកម្មភាពរបស់ជនសង្ស័យ) ។
ប្រភពដដែលបានបន្តទៀតថា នៅមុនពេលកើតហេតុស្ត្រីរងគ្រោះបាននៅអង្គុយខាងមុខតូបលក់សម្លៀកបំពាក់របស់ខ្លួន ដោយទុកកាបូបដាក់លុយនៅលើតុរួចដើរទៅរៀបចំខោអាវនៅក្នុងតូបបាត់ទៅ ។ ភ្លាមជនសង្ស័យបានជិះម៉ូតូទៅឆប់ខាងមុខតូបធ្វើដូចជាឈប់ទិញអីឱកាស់ល្អបានចូលទៅលួចកាបូបរបស់ស្ត្រីរងគ្រោះនៅលើតុរត់ចេញទៅក្រៅបម្រុងជិះម៉ូតូគេចខ្លួន តែគេចមិនរួចត្រូវនគរបាលក្របួចតែម្តង ៕
ដោយ៖ ស្អាងជ័យ
