ក្នុងនាមប្រជាពលរដ្ឋម្នាក់សង្កេតឃើញថា អាជ្ញាធរខណ្ឌសែនសុខ ហាក់ដូចជាខំប្រឹងប្រែងក្នុងការបោសសម្អាតគ្រឿងញៀននៅតំបន់បឹងឈូក ក្នុងសង្កាត់ទឹកថ្លា ខណ្ឌសែនសុខ នោះខ្លាំងណាស់ ។ ប៉ុន្តែ អ្វីដែលគួរឲ្យកត់សម្គាល់នោះ គឺការបង្ក្រាបរបស់អាជ្ញាធរ ហាក់ដូចជាមិនមានប្រសិទ្ធភាព ពោលគឺប្រៀបដូចវែកចកយ៉ាងដូច្នោះដែរ ។
ប្រការនេះធ្វើឲ្យប្រជាពលរដ្ឋងឿងឆ្ងល់ថា ហេតុអ្វីបានជាបង្ក្រាបគ្រឿងញៀននៅតំបន់បឹងឈូក មុខមន្ទីរពេទ្យលោកសង្ឃមិនអស់យ៉ាងដូច្នេះ? បើទោះជាយ៉ាងណាក៏ដោយ គេសង្កេតឃើញថា ការបង្ក្រាបនោះ តែទៅលើអ្នកប្រើប្រាស់គ្រឿងញៀនប៉ុណ្ណោះ ។ ចុះអ្នកលក់គ្រឿងញៀននៅទីនោះម្ត៉េចក៏មិនចាប់ផង? តាមយោបល់របស់ខ្ញុំបាទ ដើម្បីកាត់ផ្តាច់ឫសគល់ នៃបញ្ហាគ្រឿងញៀននៅតំបន់បឹងឈូក នោះទាល់តែបង្ក្រាបដល់ឫសគល់ គឺត្រូវតែចាប់អ្នកលក់គ្រឿងញៀនយកទៅដាក់គុក ។
ប្រសិនបើមិនយ៉ាងដូច្នោះទេ ការបង្ក្រាបគ្រឿងញៀននៅតំបន់បឹងឈូកមិនមានប្រសិទ្ធភាពឡើយ ។ គ្មានប្រសិទ្ធភាពក៏ព្រោះតែការលក់ដូរគ្រឿងញៀននៅតំបន់នោះ ហាក់ដូចជាសេរីហួសពេកហើយ ។ ការលក់គ្រឿងញៀននៅតំបន់បឹងឈូកត្រូវគេរាយការណ៍ថា ដូចជាផ្សារលក់ត្រីអីចឹងដែរ ។ អតិថិជន អាចរកទិញគ្រឿងញៀននៅតំបន់នោះបានតាមចិត្ត ។ សម្រាប់ខ្ញុំបាទឆ្ងល់ថា ហេតុអ្វីបានជាអាជ្ញាធរមិនបង្ក្រាបអ្នកលក់គ្រឿងញៀននៅតំបន់នោះ? ៕
ដោយ៖ ប្រជាពលរដ្ឋម្នាក់
