ភ្នំពេញ៖ បុរសម្នាក់បើករថយន្ត១គ្រឿងម៉ាកឡិចស៊ីុស RX350 បានរេចង្កូតជ្រុលទៅបុកចំពីមុខក្បាលនាគពុះចែកទ្រូងផ្លូវថ្មពេញទំហឹង បណ្ដាលអោយបាក់អស់១កង់ ។
កាលពីវេលាម៉ោង៥ទៀបភ្លឺ ថ្ងៃទី១១ ខែមករា ឆ្នាំ២០១៦ នៅត្រង់ចំណុចផ្លូវលេខ២១៥និងផ្លូវលេខ១៣៨ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់បានបើករថយន្ត១គ្រឿងម៉ាកឡិចស៊ីុស RX350 ពណ៌ស ពាក់ស្លាកលេខ ភ្នំពេញ 2AW-6667 បើកបរក្នុងទិសដៅពីត្បូងទៅជើង តាមបណ្ដោយផ្លូវលេខ២១៥ ខណៈមកដល់ចំណុចកើតហេតុខាងលើសង្ស័យស្រវឹងស្រាហើយអ្នកបើកបរងងុយដេកងោកមួយផាំង បានរេចង្កូតជ្រុលទៅបុកចំពីមុខក្បាលនាគពុះចែកទ្រូងផ្លូវថ្មពេញទំហឹងបណ្តាលឲ្យបាក់ក្បាលនាគអស់១កង់ ចំណែករថយន្តស្រុញមួយកំណាត់ខាងមុខទៅមុខលែងរួច តែមិនមានអ្នករងរបួសនោះទេ ។
ក្រោយពេលកើតហេតុម្ចាស់រថយន្តបង្កបានគេចខ្លួនបាត់ស្រមោល ដោយបន្សល់ទុករថយន្តឲ្យសមត្ថកិច្ចធ្វើការវាស់វែងស្ទួចយកទៅរក្សាទុកនៅការិយាល័យចរាចរណ៍រាជធានីភ្នំពេញ ដើម្បីរងចាំដោះស្រាយតាមផ្លូវច្បាប់ ៕
...
ដោយ៖ ស រស្មី
