ភ្នំពេញ៖ ក្រុមសហជីពប្រមាណ២០០នាក់ តវ៉ាឲ្យតុលាការខេត្ដសៀមរាប ទម្លាក់ចោលដីការក្សាការពារឲ្យក្រុមហ៊ុនសណ្ឋាគារវិចតូរីយ៉ាអង្គរ និងស្មាមញញមអង្គរ ដោយថា ការសម្រេចនេះប៉ះពាល់ដល់ការតវ៉ាដើម្បីអត្ថប្រយោជន៍កម្មករ។
កាលពីថ្ងៃទី៦ខែមករានេះ តុលាការខេត្ដសៀមរាប បានចេញដីការក្សាការពារឲ្យក្រុមហ៊ុនទាំងពីរ បន្ទាប់ពីពួកគេ បានធ្វើបាតុកម្មទាមទារឲ្យអ្នកគ្រប់គ្រងក្រុមហ៊ុនទទួលយកអតីតបុគ្គលិកចូលធ្វើការវិញ តាំងពីខែធ្នូឆ្នាំ២០១៥កន្លងមក។
ក្រុមអ្នកតវ៉ាបានប្រមូលផ្ដុំគ្នានៅខាងមុខតុលាការ ស្ថិតនៅសង្កត់ជ្រាវ ក្រុងសៀមរាប កាលពីម៉ោង៨និង៣០នាទីថ្ងៃទី១១ខែមករាឆ្នាំ២០១៦នេះ។
បាតុករបានស្រែកតាមឧបករណ៍បំពងសម្លេង ទាមទារឲ្យស្ថាប័នយុត្ដិធម៌មួយនេះ លុបចោលដីការក្សាការពារឲ្យម្ចាស់ក្រុមហ៊ុនដែលជាជនបរទេសទាំងពីរនោះនិងផ្ដល់យុត្ដិធម៌ដល់ពួកគេ។ក្រុមអ្នកតវ៉ា បានដាក់បណ្ដាសសារដល់តុលាការដែលពួកគេលើកឡើងថា លម្លៀងទៅលើអ្នកមានលុយ និងអ្នកមានអំណាច។ក្រុមអ្នកតវ៉ាថាខ្ញុំនឹងដាក់បណ្ដាសារបើសិនតុលាការខេត្ដសៀមរាបទៅយកលុយថែកែបារាំងទៅយកលុយថៅកែចិនខ្ញុំនឹងដាក់បណ្ដាសារឲ្យវិនាសសន្ដិរស់ដោយវេទនាបំផុតជាងកម្មករទៅទៀត។
ប្រធានសហជីពនិងជាបុគ្គលិកនៅសណ្ឋាគារវិចតូរីយ៉ាអង្គរ អ្នកស្រី ចាន់ សុជាតិកន្លែងតវ៉ាថា ការចេញដីការក្សាការពារនេះ ធ្វើឲ្យបះពាល់ដល់ការធ្វើបាតុកម្មរកអត្ថប្រយោជន៍ឲ្យកម្មករ ខណៈដែលពួកគាត់បានធ្វើបាតុកម្មជាច្រើនថ្ងៃនៅសណ្ឋាគារវិតូរីយ៉ាអង្គរ និងស្មាមញញឹមអង្គរទាមទារឲ្យម្ចាស់ក្រុមហ៊ុនទាំងពីរទទួល អតីតបុគ្គលិកចូលធ្វើការវិញ ប៉ុន្ដែគ្មានដំណោះស្រាយ។អ្នកស្រីបន្ដថា៖ពីព្រោះការចេញដីការរបស់គាត់អត់សមស្របទៅតាមច្បាប់រដ្ឋធម្មនុញ្ញច្បាប់ស្ដីពីការងារនៅស្រុកខ្មែរអនុសញ្ញានិងសេចក្ដីប្រកាសផ្សេងៗដែលមានដែលមានចែងនៅច្បាប់ត្រូវមកអនុវត្ដនៅកម្ពុជាយើងចឹងទេយើងសូមស្នើឲ្យគាត់រំលាយដីការក្សាការពារនេះចេញដើម្បីឲ្យពួកយើងមានសិទ្ធិនូវអ្វីដែលពួកយើងគួរធ្វើបាន។
ករណីនេះ ព្រះរាជអាជ្ញានៃសាលាដំបូងខេត្ដសៀមរាបលោក កើត វណ្ណារ៉េត មានប្រសាសន៍ថា ការចេញដីសម្រេចការពារនេះជាសិទ្ធិតុលាការ ប៉ុន្ដែលោកថា ក្រុមអ្នកតវ៉ាត្រូវបំពេញនិតិវិធីតាមច្បាប់ ដើម្បីប្ដឹងជំទាស់លើដីការសម្រេចនេះ។លោកមានប្រសាសន៍ថា៖អញ្ចឹងយើងបានសម្របសម្រួលគាត់ឲ្យបំពេញនិតិវិធីតាមតុលាការទៅជៀសវាងកុំយកការតវ៉ាមកគៀបសង្កាត់ឬក៍យ៉ាងមិចព្រោះតុលាការគាត់បំពេញនិតិវិធីឲ្យប្ដឹងតវ៉ាប្ដឹងអីទៅណាអត់ត្រូវមកស្រែកឡូឡាអីចឹងទេឡូឡាចឹងបានន័យថា គៀបសង្កត់តុលាការអីចឹង។
ប្រធានសហព័ន្ធសហជីពកម្មករនិយោជិតវិស័យទេសចរណ៍សេវាកម្ពុជាលោក ម៉ម រិទ្ធី មានប្រសាសន៍ថា ការចេញដីការក្សាការពារឲ្យកនិយោជិតនេះលោកថា រំលោភលើច្បាប់ការងារនៅកម្ពុជា និងច្បាប់ធ្វើបាតុកម្ម។លោកថាការចេញច្បាប់ហាមឃាត់ធ្វើការតវ៉ានេះ ជាឱកាសមួយឲ្យថៅកែក្រុមហ៊ុនជិះជាន់លើកកម្លាំងកម្មករ ដែលធ្វើឲ្យប៉ះពាល់ដល់សេដ្ឋកិច្ចគ្រួសារពួកគេផងដែរ។លោកជំរុញឲ្យតុលាការទម្លាក់ចោលដីការនោះវិញដើម្បីផ្ដល់ភាពយុត្ដិធម៌ដល់កម្មករ។លោកមានប្រសាសន៍ថា៖ដីការនេះធ្វើឲ្យបាត់បង់សិទ្ធិសេរីភាពធ្វើកូដកម្ម ហើយធ្វើឲ្យថៅកែមានឱកាសរំលោភសិទ្ធិនិងបញ្ឍប់កម្មករបន្ដទៀតយើងឃើញថា កម្មករជាទូទៅគឺមានតែសិទ្ធិសេរីភាពធ្វើកូដកម្មហ្នឹងហើយដែលអាចជុំរុញឲ្យនិយោជកហ្នឹងអនុវត្ដច្បាប់ឬក៍ទទួលឲ្យពួកគាត់ចូលធ្វើការវិញប៉ុន្ដែបើអត់មានកូដកម្មទេគឺកន្លងមកគ្មានន័យអីទេគឺថៅកែមានឱកាសនឹងធ្វើវិធីសាស្ដ្រគ្រប់បែបយ៉ាងរំលាយឆន្ទៈនិងរំលាយនូវការងាររបស់កម្មករ
គួរបញ្ជាក់ថា ក្រុមសហជីពបានធ្វើបាតុកម្មនៅសណ្ឋាគារវិចតូរីយ៉ាអង្គរ និងស្មាមញញឺមអង្គរ ដើម្បីទាមទារឲ្យ កែក្រុមហ៊ុនទាំងពីរនេះទទួលយកកម្មករចូលធ្វើការវិញតាំងពីចុងឆ្នាំ២០១៥មកម្លេះ ប៉ុន្ដែត្រូវបានតុលាការខេត្ដសៀមរាបចេញដីការក្សាការពារឲ្យក្រុមហ៊ុននៅដើមខែមករានេះ៕
ដោយ៖ ជានិរន្ដរ៍
