ភ្នំពេញ៖ ខ្សែភាពយន្តខ្នាតធំរបស់ផលិតកម្ម រិជឃីតមេឌា(Rich Kids Media ) រឿង”ក្រមុំ៣១កំលោះ៥២”នឹងដាក់បញ្ចាំងជាផ្លូវការហើយចាប់នៅចុងខែនេះស្របពេលដែលការចេញឈុតឆាកខ្លីរបស់ខ្សែភាពយន្តនេះទទួលបានការគាំទ្រនិងចាប់អារម្មណ៍ច្រើន។ នៅភ្នំពេញខ្សែភាពយន្តនេះនឹងចាប់ផ្តើមដាក់បញ្ចាំចាប់ពីថ្ងៃទី២៨ខែមករាឆ្នាំ២០១៦នៅគ្រប់រោងភាពយន្តទំនើហើយសម្រាប់ខេត្តសៀមរាបនឹងធ្វើការចាក់បញ្ចាំងចាប់ពីថ្ងៃទី២ខែកុម្ភៈខាងមុខនេះដែរ។
ខ្សែភាពយន្តបែបកំប្លែងខាងលើត្រូវបានគេដឹងថាមានការចូលរួមសម្តែងពីតារាប្រុសស្រីល្បីឈ្មោះជាច្រើនរូបពិសេសតារាកំប្លែងស្រីល្បីឈ្មោះនាងខ្ញុងដែលមានវ័យ៣១ឆ្នាំនិង តារាសម្តែងជើងចាស់ទេពរិនដារ៉ូដែលមានវ័យ៥២ឆ្នាំនោះ។
តារាសម្តែងមានវ័យជាង៥ទសវត្សរ៍លោកទេពរិន្ទដារ៉ូនិយាយថា ក្នុងខ្សែភាពយន្តខាងលើលោកសម្តែងជាតួអង្គកំលោះចាស់ឈ្មោះដារ៉ូហើយលោកពិតជាសប្បាយចិត្តដែលបានសម្តែងក្នុងតំណែងតួឯកជាមួយនឹងតារាជំនាន់ក្រោយជាច្រើនពិសេសគឺនាងខ្ញុងតែម្តង។ លោកបន្តថា ក្រុមការងារផលិត និងសិល្បករទាំងអស់បានធ្វើឲ្យលោកសើចរហូតពីពេលចាប់ផ្តើមធ្វើការរហូតដល់ពេលចប់ការងារសម្តែង។
លោកបញ្ជាក់ថាអស់រយៈពេលជាយូមកហើយដែលលោកបានសម្តែងជាតួឯក ហើយការផ្តល់តំណែងនេះក៏ក្រោយពេលដែលសម្តេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានចោទជាសំណួរមកលោកកាលពីថ្ងៃពិធីអង្គរសង្រ្កាន្តថា ពេលណាទើបលោកនឹកនាយកប្រពន្ធ ហើយរឿងនេះក៏អាចបញ្ជាក់អំពីមូលហេតុដែលធ្វើឲ្យលោកមិនយកប្រពន្ធ ទោះបីជាមានហេតុផលខ្លះត្រូវឬខុសពីរឿងពិតរបស់លោកក៏ដោយ។លោករំពឹងដែរថាខ្សែភាពយន្តដែលជាស្នាដៃសម្រិតសម្រាំងដ៏ប៉ិនប្រសប់មានច្រើនរស់ជាតិនេះនឹងទទួលបានការគាំទ្រច្រើនពីទស្សនិកជនជាក់ជាមិនខាន។
ផលិតករខ្សែភាពយន្ត”ក្រមុំ៣១កំលោះ៥២”បានបញ្ជាក់ដែរថា ខ្សែភាពយន្តរឿង “ក្រមុំ៣១កំលោះ៥២”បានធ្វើការផលិតអស់រយៈពេល៥ខែ និងចំណាយការផលិតប្រមាណ៨ម៉ឺនដុល្លារអាមេរិក។ ខ្សែភាពយន្តនេះនឹងធ្វើការចាក់បញ្ចាំងជាផ្លូវការចាប់ពីថ្ងៃទី២៨ខែមករាឆ្នាំ២០១៦នេះតទៅផងដែរ។ ខ្សែភាពយន្តខ្នាតធំនេះ នឹងត្រៀមដាក់បញ្ចាំងនៅគ្រប់រោងភាពយន្តទំនើបទាំងអស់នៅរាជធានីភ្នំពេញ និងខេត្តសៀមរាប។
តារាសម្តែងប្រុសស្រីល្បីឈ្មោះជាច្រើនបានចូលរួមសម្តែងក្នុងខ្សែភាពយន្តនេះដែលតួសំខាន់មានដូចជា លោក ទេព រិនដារ៉ូ នាងខ្ញុង កញ្ញា មេនីយ៉ាង លោក សាវិន ហ្វីលីព លោក អ៊ុក សុភារិទ្ធិជាដើម។ ឈុតឆាកកំប្លែង វាយតប់ ស្នេហា ដែលមានគ្រប់រសជាតិនោះនឹងធ្វើឲ្យខ្សែភាពយន្តនេះក្លាយជារឿងដែលទាក់ទាញបំផុតសម្រាប់អ្នកទស្សនានៅដើមឆ្នាំ២០១៦នេះ។ គេអាចទស្សនាឈុតឆាកខ្លីៗ(Trailer) របស់ខ្សែភាពយន្តនេះបានផងដែរដែលគ្រាន់តែចូលទៅកាន់ ៕
https://www.youtube.com/watch?v=DF7LJZQd3Pg
ដោយ៖ វឌ្ឍនា
