ភ្នំពេញ៖ នៅវេលាម៉ោង៨ និង៣០នាទីព្រឹកថ្ងៃទី១២ ខែមករា ឆ្នាំ២០១៥ ត្រង់មុខក្រុមហ៊ុនដឹកជញ្ជូនអ្នកដំណើរកាពីតូល តាមបណ្តោយផ្លូវលេខ១៨២ សង្កាត់បឹងព្រលឹត ខណ្ឌ៧មករា រាជធានីភ្នំពេញ មានការប៉ះទង្គិចគ្នារវាងអតីតអ្នកបើកបររថយន្តកាពីតូល និងបុគ្គលិកកំពុងបំពេញភារកិច្ចក្នុងក្រុមហ៊ុនមួយនេះបណ្តាលឲ្យរបួសស្រាលម្នាក់ និងត្រូវបានអាជ្ញាធរដែនដីចុះទៅសម្របសម្រួល និងបញ្ចប់បញ្ហាភ្លាមៗ ។

ការប៉ះទង្គិចគ្នានេះ កើតឡើងដោយសារអតីតអ្នកបើកបររថយន្តបានធ្វើកូដកម្មទាមទារសុំចូលបម្រើការងារឡើងវិញមានរយៈពេលច្រើនថ្ងៃមកហើយ ប៉ុន្តែមិនត្រូវបានក្រុមហ៊ុន ដោះស្រាយ និងទទួលយកអ្នកទាំងនោះចូលធ្វើការវិញឡើយ ។

ការប៉ះទង្គិចនេះដោយសារក្រុមអ្នកតវ៉ាស្រែកមេក្រូទាមទារលក្ខខណ្ឌមួយចំនួនរំខានដល់ក្រុមហ៊ុន ធ្វើឲ្យបុគ្គលិកបម្រើការនៅទីនោះទ្រាំមិនបាន ក៏ចេញមុខប្រើហិង្សាដាក់គ្នា ដែលភាគីម្ខាងៗ មានមិនតិច៤០នាក់នោះឡើយ ៕

ដោយ៖ ស រស្មី