ភ្នំពេញ៖ ជនសង្ស័យ២នាក់ ជិះម៉ូតូ ឌុបគា្នទៅឈប់ទិញនិងចាំយកបាយឆានិងមីឆាខ្ចប់២ប្រអប់ហើយឃើញ ឱកាសល្អដែលអ្នកលក់កំពុងទូរស័ព្ទទៅកាន់មិត្តភក្តិនាំគ្នាឆក់យកពីដៃរួចជិះម៉ូតូឌុបគ្នារត់ប៉ុន្តែ ហេតុតែព្រះមិនជួយត្រូវមា្ចស់ស្រែកឆោឡោឡើងធ្វើឲ្យអ្នករត់ម៉ូតូឌុបនៅក្បែរនោះទើសភ្នែកពេកក៏ជិះដេញតាមបុកដួល ជនសង្ស័យភ័យរត់ចោលម៉ូតូបាត់ទាំងពីរនាក់ ។
ហេតុការណ៍នេះកើតឡើងកាលពីវេលាម៉ោង១១ និង៥០នាទីយប់ ថ្ងៃទី១២ ខែមករា ឆ្នាំ២០១៦នៅលើកំណត់ផ្លូវលេខ២៧១ ទល់មុខផ្ទះលេខ២១៣ ក្នុងសង្កាត់បឹងសាឡាង ខណ្ឌទួលគោក ។
នារីរងគ្រោះ ឈ្មោះអាល់ ម៉ាឡា អាយុ១៧ឆ្នាំ មុខរបរលក់លតឆា-មីឆា-បាយឆា-និងគុយទាវ ពេលយប់បានឱ្យដឹងថា មុនពេលកើតហេតុមានបុរសមិនសា្គល់មុខនិងអត្តសញ្ញាណ២នាក់ជិះម៉ូតូម៉ាកយ៉ាម៉ាហាស៊ីរូស ពណ៌ក្រហមលាយខ្មៅមួយគ្រឿង ពាក់ស្លាកលេខអង្គភាព សារពត័មាន វីរៈជ័យ០០៣០K ឌុបគា្នទៅឈប់ទិញនិងចាំយកបាយឆានិងមីឆាខ្ចប់២ប្រអប់ពីកន្លែងគាត់។ ពេលនោះគាត់ខ្ចប់រួចបានឈរនិយាយទូរស័ព្ទដៃទៅកាន់មិត្តភក្តិ បែរខ្នង ក៏ត្រូវជនកំហូចជាភ្ញៀវ២នាក់នោះឆក់យកតែម្តង ។ ប៉ុន្តែចៃដន្យទូរស័ព្ទម៉ាកសាំសុងកាឡាក់ស៊ីណូតរបស់គាត់បានជ្រុះធា្លក់ទៅលើថ្នល់ បណ្តាលអោយបែកកញ្ចក់អេក្រង់ ហើយរូបគាត់ស្រែកថាចោរៗ ក៍មានបុរសអ្នករត់ម៉ូតូឌុបមា្នក់នៅក្បែរនោះឃើញទាន់ក៏ជិះម៉ូតូ ដេញបំបុកបណ្តាលឲ្យដួលហើយជនសង្ស័យទាំង២នាក់នោះទុកម៉ូតូចោល នាំគ្នារត់គេចខ្លួនបាត់ស្រមោលតែម្តង។
ក្រោយមកទើបកម្លាំង ល្បាតកងរាជអាវុធហត្ថខណ្ឌទួលគោក មកដល់នាំជនរងគ្រោះ ទៅដាក់ពាក្យបណ្តឹងនៅមូលដ្ឋានកងរាជអាវុធហត្ថខណ្ឌទួលគោកដោយនាំទាំងម៉ូតូរបស់ជនសង្ស័យរក្សាទុកជាភស្តុតាងនិងបន្តស្រាវជ្រាវរកជនសង្ស័យទាំងពីរនាក់ចាប់ខ្លួនមកផ្តន្ទាទោសឲ្យបាន ៕
ដោយ៖ ប្រាថ្នា
