ភ្នំពេញ៖ បុរសម្នាក់ត្រូវកម្លាំងកងរាជអាវុធហត្ថឃាត់ខ្លួន បន្ទាប់ពីធ្វើសកម្មភាពតាមដានអស់រយៈពេល៣ថ្ងៃកន្លងមកហើយ ពាក់ព័ន្ធករណីប្តឹងរបស់នារីរងគ្រោះម្នាក់ថា បុរសម្នាក់នេះបានដាក់ថ្នាំសណ្តំមកលើខ្លួននាង រួចនាំទៅរំលោភសេពសន្ថវៈនៅក្នុងផ្ទះសំណាក់ឡាក់គី២ តាមបណ្តោយផ្លូវ២១៤ សង្កាត់បឹងព្រលឹត ខណ្ឌ៧មករា រាជធានីភ្នំពេញ ។
ប្រភពព័ត៌មានបានបង្ហើបថា ជនសង្ស័យឈ្មោះ បូ ចំរើន ៣៨ឆ្នាំ ទីលំនៅឋានជនសង្ស័យផ្លូវ៩៣ សង្កាត់អូឬស្សី៤ ខណ្ឌ៧មករា រាជធានីភ្នំពេញ។ នារីរងគ្រោះ ស.ច.ដ. អាយុ២០ឆ្នាំ ។
ពាក្យបណ្តឹងនារីរងគ្រោះបានបញ្ជាក់ថា កាលពីថ្ងៃទី១០ ខែមករា ឆ្នាំ២០១៦ នាងបានទៅចូលរួមកម្មវិធីខួបកំណើតមិត្តភក្តិមួយកន្លែង ដោយនៅពេលនោះនាងបានជួបជុំ និងស្គាល់បុរសសង្ស័យ ហើយនៅពេលចេញពីកកម្មវិធីខួបកំណើតនោះ ដោយសាររូបនាងពុំមានយានជំនិះធ្វើដំណើរត្រឡប់ទៅផ្ទះនោះ បុរសសង្ស័យក៏បានឲ្យនាងសុំដោយសារ គឺជិះរថយន្តជាមួយ ។
ប្រភពបន្តថា លុះទៅដល់ពាក់កណ្តាលផ្លូវ បុរសសង្ស័យបានបបួលនាងឲ្យចុះហូបអីបន្តិច ។ លុះនាងចុះហូបរួចហើយ ស្រាប់តែលែងដឹងខ្លួន ទន់ដៃទន់ជើង ។ ប្រភពបន្តថា លុះពេលនាងស្វាងដឹងខ្លួនវិញ ស្រាប់តែឃើញនៅក្នុងផ្ទះសំណាក់ឡាក់គី២ គ្រានោះទើបនាងដឹងថា ខ្លួនត្រូវចាញ់បោកបុរសសង្ស័យ ហើយក៏មកដាក់ពាក្យប្តឹងនៅអធិការដ្ឋានកងរាជអាវុធហត្ថខណ្ឌ៧មករា ដើម្បីឲ្យជួយអន្តរាគមន៍ ។
មន្ត្រីកងរាជអាវុធហត្ថមួយរូបបានសុំមិនបញ្ចេញឈ្មោះបញ្ជាក់ថា បន្ទាប់ពីទទួលបានពាក្យបណ្តឹងពីនារីរងគ្រោះ កម្លាំងអាវុធហត្ថបានធ្វើសកម្មភាពតាមដាន រហូតទើបតែចាប់បានខ្លួនជនសង្ស័យនៅវេលាម៉ោង៤និង៣០នាទីរសៀល ថ្ងៃទី១៤ ខែមករា ឆ្នាំ២០១៦ រួចនាំខ្លួនមកសួរនាំ និងកសាងសំណុំរឿងបញ្ជូនទៅតុលាការ ៕
ដោយ៖ ស រស្មី
