ខេត្តស្វាយរៀង៖ សមត្ថកិច្ចកងរាជអាវុធហត្ថស្រុកសហការជាមួយអាវុធហត្ថខេត្តស្វាយរៀង បានធ្វើការចុះបង្ក្រាបនិងឃាត់ខ្លួនជនសង្ស័យ៥នាក់ពាក់ព័ន្ធនឹងការប្រើប្រាស់គ្រឿងញៀន កាលពីរសៀលម៉ោង១ និង៣៥នាទីថ្ងៃទី១៤ ខែមករា ឆ្នាំ២០១៦ស្ថិតត្រង់ចំណុចភូមិពោធិ៍ ឃុំមេសថ្ងក ស្រុកចន្ទ្រា ខេត្តស្វាយរៀង។

យោងតាមមន្ត្រីកងរាជអាវុធហត្ថ ស្រុកចន្ទ្រាបានឲ្យដឹងថា ជនសង្ស័យដែលប្រើប្រាស់គ្រឿងញៀន មានទិ១.ឈ្មោះ តាំង លីណែត ភេទប្រុសអាយុ ១៧ឆ្នាំ ទី២.ឈ្មោះ ហែម វិសាល ភេទប្រុស អាយុ ១៨ឆ្នាំ, ទី៣. ឈ្មោះ សោម ចាន់សីហា ភេទប្រុស អាយុ ២០ឆ្នាំ, ទី៤. ឈ្មោះ ពៅ គីរ៉ាន់ ភេទប្រុស អាយុ ២០ឆ្នាំ និងទី៥. ឈ្មោះ ឃិម រតនៈ ប្រុសអាយុ ១៦ឆ្នាំដោយទាំង៥នាក់នេះមានទៅលំនៅនៅស្រុកចន្ទ្រា។

សមត្ថកិច្ចបន្តថាចំពោះវត្ថុតាងដែលរឹបអូសបាន ពីក្រុមជនសង្ស័យ រួមមាន ម៉ូតូ ០១គ្រឿង ទូរសព្ទដៃ ០១គ្រឿង និងរបស់របរមួយចំនួនទៀត ព្រមទាំងធ្វើតេសទឹកនោម ឃើញថាមានសារធាតុញៀនពិតប្រាកដ ចំនួន០៤នាក់ និងម្នាក់ទៀត ឈ្មោះ ឃិម រតនៈ មិនមានសារធាតុញៀនទេ។

បច្ចុប្បន្ន សមត្ថកិច្ចកងរាជអាវុធហត្ថខេត្តស្វាយរៀងបានបញ្ជូនជនសង្ស័យចាត់ការតាមនីតិវិធីច្បាប់។ ជាមួយគ្នានោះ ឪពុកម្ដាយរបស់អ្នកញៀនគ្រឿងញៀនទាំង៤នាក់ ក៏បានសំណូមពរឲ្យសមត្ថកិច្ចជួយនាំពួកគេទៅបន្សាបសារធាតុញៀននៅមណ្ឌលឱកាសខ្ញុំ (រាជធានីភ្នំពេញ) ៕

ដោយ៖ យឹម សុថាន