ភ្នំពេញ៖ នៅក្នុងកិច្ចប្រជុំគណៈរដ្ឋមន្ត្រី នៅព្រឹកថ្ងៃទី១៥ ខែមករា ឆ្នាំ២០១៦ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើការព្រមានធ្ងន់ៗ និងបញ្ជាឲ្យអភិបាលខេត្តត្បូងឃ្មុំ ព្រមទាំងអភិបាលស្រុកមេមត់ បិទច្រករត់ពន្ធឈើនានាឆ្ពោះទៅប្រទេសវៀតណាម និងពិនិត្យមើលឈ្មួញឈើទាំងនោះ។ នេះបើតាមការបង្ហោះនៅលើបណ្តាញសង្គមរបស់ លោក ខៀវ កាញារិទ្ធ រដ្ឋមន្ត្រីក្រសួងព័ត៌មាន។
លោក ខៀវ កាញារិទ្ធ បានសរសរនៅក្នុងបណ្តាញសង្គមរបស់លោកថា «សម្តេចតេជោចេញបញ្ជាឲ្យបិទច្រករត់ពន្ធ ឈើ ទៅវៀតណាម ពិសេស លោកបានស្រង់សម្តីកាសែតដែលលើកឡើងពីករណី ឧកញ៉ា លឹម ប៊ុណ្ណា ហៅ ខ្នា និង ស៊ឹង សំអុល ដែលកាងដឹកឈើ។ ដោយលោកចេញបញ្ជាឲ្យ លោក ប្រាជ្ញ ចន្ទ និងអភិបាលស្រុកមេមត់ ទទួលធ្វើឲ្យបាន បើមិនចង់អស់បុណ្យស័ក្ដិ»។
លោក ខៀវ កាញារិទ្ធ បានឲ្យដឹងទៀតថា «តាមសំនើរបស់សម្តេចក្រឡាហោម ស ខេង សម្តេចតេជោ បានបង្កើត គណៈកម្មការបង្ក្រាបការរត់ឈើទៅវៀតណាម ដោយ ឧត្តមសេនីយ៍ សៅ សុខា ជាប្រធាន អគ្គស្នងការរងនគរបាល ជាអនុប្រធាន គ្រប់អភិបាលខេត្តជាប់ព្រំដែននិង អភិបាលខេត្តកំពង់ចាម ។ សម្តេចប្រគល់ឧទ្ធម្ភាចក្រ ពីរ គ្រឿង សំរាប់ប្រតិបត្តិការ»។
សូមបញ្ជាក់ថា កន្លងមកឈើប្រណីតរាប់សិបរថយន្តក្នុងមួយយប់ៗ ត្រូវបានគេរាយការណ៍មកថា ក្រុមឈ្មួញជាឧកញ៉ាមួយក្តាប់តូចបានដឹកជញ្ជូនយ៉ាងគគ្រឹកគគ្រេងតាមច្រកព្រំដែនមួយចំនួននៅក្នុងស្រុកមេមត់ នៃខេត្តត្បូងឃ្មុំ ដូចជាច្រកដូនរ័ត្ន និងច្រកដា ជាដើម ដោយពុំមានការទប់ស្កាត់។ ករណីដឹកជញ្ជូនឈើប្រណីតនេះ ត្រូវគេចាត់ទុកថា គឺធ្វើឡើងដោយកិច្ចសហការណ៍ជាប្រព័ន្ធ ចាប់តាំងពីរដ្ឋបាលព្រៃឈើ នគរបាល និងគយបើកច្រកព្រំដែនផង៕
ដោយ៖ ហេង សូរិយា
