ភ្នំពេញ៖ បុរសម្នាក់ដែលកម្លាំង កងរាជអាវុធហត្ថខណ្ឌ៧មករាឃាត់ខ្លួន តាមពាក្យបណ្ដឹងនារីរងគ្រោះម្នាក់ថា បុរសម្នាក់នេះបានដាក់ថ្នាំសណ្ដំ រួចនាំយកនាងទៅរំលោភសេព សន្ថវៈនៅក្នុងផ្ទះសំណាក់យីហោឡាក់គី២ តាមបណ្ដោយផ្លូវ២១៤ សង្កាត់បឹង ព្រលឹត ខណ្ឌ៧មករា រាជធានីភ្នំពេញកាលពីយប់ថ្ងៃទី១០ខែមករាឆ្នាំ២០១៦ រួច ថែមទាំងប្លន់យកគ្រឿងអលង្ការនិងទូរស័ព្ទ អស់ពីខ្លួនទៀតនោះត្រូវបានសមត្ថកិច្ចដោះលែងហើយ។
ការដោះលែងជនសង្ស័យដែលគេស្គាល់ថាឈ្មោះ បូរ ចំរើន អាយុ៣៧ ឆ្នាំ ជាកូនប្រុសថៅកែថតរូបហាង ពេញចិត្ត មានទីលំនៅផ្ទះលេខ១៨៩ ផ្លូវលេខ៩៣ សង្កាត់ អូរឫស្សី៤ ខណ្ឌ៧មករា រាជធានីភ្នំពេញ ត្រូវបានសមត្ថកិច្ចដោះលែងនោះដោយសំអាងលើអ្វី ? តើស្ថាប័នតុលាការ ឬ កងរាជអាវុធហត្ថរាជធានី ភ្នំពេញជាម្ចាស់ករណីកសាងសំណុំរឿងនេះជាអ្នកដោះលែងនោះទេ ។ ប៉ុន្តែបើតាមប្រភពពីមន្ត្រីកងរាជអាវុធហត្ថរាជធានីវិញបាននិយាយ ការដោះលែង នេះគឺយោងតាមការស៊ើបអង្កេតឃើញថារឿងនេះមិនពិតដូចការចោទប្រកាន់របស់ស្រី្តរងគ្រោះនោះទេ ជាពិសេសសមត្ថកិច្ចបានសហការជាមួយម្ចាស់ផ្ទះសំណាក់យីហោឡាក់គី២ ស្រាវជ្រាវរកពុំឃើញមានករណីចាប់រំលោភស្រី្តរងគ្រោះនោះឡើយ ។
ដើម្បីបញ្ជាក់ការពិតរឿងនេះបែបណានោះ ភ្នាក់ងារកាសែតនគរវត្តបានទូរស័ព្ទ សុំការបញ្ជាក់ពីលោកម៉ាំង លុច្ស ប្រធានការិយាល័យស្រាវជ្រាវបទល្មើសព្រហ្មទណ្ឌនៃបញ្ជាការដ្ឋានកងរាជអាវុធហត្ថរាជធានីកាលពីរសៀលថ្ងៃទី១៦ខែមករាឆ្នាំ២០១៦ ដោយទូរស័ព្ទចូល តែលោកប្រាប់ថា « ជាប់រវល់ »រួចបិទទូរស័ព្ទចោល ។
ដោយឡែកស្រី្តរងគ្រោះវិញបានប្រាប់កាសែតនគរវត្តយ៉ាងខ្លីថា « អយុត្តិធម៌ណាស់សម្រាប់រូបខ្ញុំ» ។
សូមបញ្ជាក់ថា កាលពីវេលាម៉ោង៤និង៣០នាទីរសៀលថ្ងៃទី១៤ ខែមករា ឆ្នាំ២០១៤ នៅតាម បណ្ដោយផ្លូវលេខ១០៧ សង្កាត់មនោរម្យ ខណ្ឌ៧មករា កងរាជអាវុធហត្ថខណ្ឌ៧មករា បានឃាត់ខ្លួនបុរសឈ្មោះ បូរ ចំរើន តាមពាក្យបណ្តឹងរបស់ស្រី្តរងគ្រោះដោយចោទពីបទចាប់រំលោភនិងប្លន់យកគ្រឿងអលង្កាអស់ពីខ្លួនក្នុងផ្ទះសំណាក់ឡាក់គី២រួចបញ្ជូនទៅសមត្ថកិច្ចកងរាជអាវុធហត្ថរាជធានីចាត់ការបន្ត ។ លុះក្រោយមកមិនដឹងរឿងអីស្រាប់ត្រូវបានគេដោះលែងជនសង្ស័យឲ្យមានសេរីភាពវិញ ធ្វើឲ្យស្រី្តរងគ្រោះហួសចិត្តខ្លាំងណាស់ ៕
ដោយ៖ ស សម
