ភ្នំពេញ ៖ កម្លាំងនគរបាលខណ្ឌចំការមន ឃាត់ខ្លួនជនជាតិចិនម្នាក់ ក្នុងចំណោមបក្ខពួក៥នាក់ បានធ្វើសកម្មភាពចាប់ជម្រិតទារប្រាក់ពីបុរសជនជាតិចិនម្នាក់ ចំនួន២០ម៉ឺនយ័ន ដោយប្រើអាវុធខ្លីម៉ាកK៥៩ ទៅគំរាម និងបង្ខាំងទុកក្នុងបន្ទប់ ។
លោកវរសេនីយ៍ឯក យិន សាន អធិការនគរបាលខណ្ឌចំការមន បានឲ្យដឹងនៅរសៀលថ្ងៃទី៥ ខែឧសភា ឆ្នាំ២០២០នេះថា កម្លាំងជំនាញបានស្រាវជ្រាវចាប់ខ្លួនជនសង្ស័យខាងលើនេះ បានកាលវេលាម៉ោង០៩យប់ ថ្ងៃទី៣ ខែឧសភា ឆ្នាំ ២០២០ នៅចំណុចបរិវេណកោះពេជ្រក្រុម៧៨ ស្ថិតនៅភូមិ១៤ សង្កាត់ ទន្លេបាសាក់ ខណ្ឌចំការមន ។
លោកអធិការខណ្ឌបន្តថា ជនសង្ស័យឈ្មោះ វិន តៃ ភេទប្រុស អាយុ ៣៥ឆ្នាំ ជនជាតិចិន មុខរបរ និងទីលំនៅ មិនស្គាល់ នគរបាលដកហូតបានអាវុធខ្លីចំនួន១ដើម ម៉ាកk៥៩ បង់ចំនួន១ មានគ្រាប់ចំនួន៧ ។ ចំណែកជនរងគ្រោះ ឈ្មោះ លី ឈិន ភេទប្រុស អាយុ ៣៤ឆ្នាំ ជនជាតិចិនមុខរបរបុគ្គលិកក្រុមហ៊ុនអ៊ូឆឹង ស្នាក់នៅបុរីអេលីហ្សេ ក្នុងកោះពេជ្រ សង្កាត់ទន្លេបាសាក់ ខណ្ឌចំការមន ។ ដោយបានដាក់ពាក្យបណ្ដឹងកាលពីថ្ងៃទី២០ ខែ ឧសភា ឆ្នាំ ២០២០ ពីបទប្រើកាំភ្លើងភ្ជង់គំរាម បង្ខាំងជំទារប្រាក់២ម៉ឺនយ័ន បើមិនព្រមវេរលុយ ចូលកុងទេ និងមិនអាចចេញពីបន្ទប់ ។
តាមប្រភពពីមន្រ្តីនគរបាលព្រហ្មទណ្ខខណ្ឌ បានឲ្យដឹងថា កាលពីថ្ងៃទី២០ ខែមេសា ឆ្នាំ២០២០ គឺក្រុមជនសង្ស័យជាជនជាតិចិនមានគ្នា៥នាក់ ក្នុងចំណោមម្នាក់ ជាមិត្តភក្តិជនរងគ្រោះ ហើយបានលួងលោមជនរងគ្រោះឲ្យមកបន្ទប់ខ្លួន ដោយមានមនុស្ស៤នាក់ទៀត ក្នុងបន្ទប់នោះបានយកកាំភ្លើងភ្ជង់ ជនរងគ្រោះជាជនជាតិចិនដូចគ្នា ដើម្បីជម្រិតទារលុយ ២០ម៉ឺនយ័ន ។ ក្រោយមកជនរងគ្រោះ បានយកលុយឲ្យជនសង្ស័យ ទើបដោះលែងមកវិញ ។
ប្រភពដដែលបន្តថា ក្រោយមកជនរងគ្រោះជិះឡានដើរលេងជាមួយមិត្តភក្តិលុះដល់យប់ថ្ងៃទី១ ខែ ឧសភា ឆ្នាំ២០២០ ជិះរថយន្តតាមផ្លូវក៏ឃើញបុរសជនជាតិ ដកកាំភ្លើងភ្ជង់ខ្លួននោះ ក៏ចាប់យកមកប្រគល់ឲ្យនគរបាលតែម្តង ។
ក្រោយឃាត់ខ្លួនសមត្ថកិច្ចឆែកឆេរក្នុងកាបូបខ្មៅ១ មានអាវុធខ្លីម៉ាកk៥៩ ចំនួន១ដើម បច្ចុប្បន្នជនសង្ស័យកំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌចំការមន និងកសាងសំណុំរឿង បញ្ចូលទៅតុលាការ ដើម្បីចាត់ការតាមផ្លូវច្បាប់៕ដោយ៖ស រស្មី
