ខេត្តស្ទឹងត្រែង៖ យុវជនម្នាក់បានស្លាប់ភ្លាមៗនិងយុវជន២នាក់ទៀតបានរងរបួសធ្ងន់ ខណៈជិះម៉ូតូលឿនទៅបុកសត្វក្របីដែលកំពុងដើរឆ្លងផ្លូវពេលយប់ថ្ងៃទី០៤ ខែឧសភា ២០១២០ ស្ថិតនៅលើដងផ្លូវជាតិលេខ៩ ត្រង់ចំណុចអូរផ្អៀងក្នុងភូមិ ថាឡា ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង។
សមត្ថកិច្ចបានឱ្យដឹងថា ជនរងគ្រោះដែលស្លាប់មានឈ្មោះ ធារ៉ា ភេទ ប្រុស អាយុប្រហែល២០ឆ្នាំ ជនជាតិខ្មែរ មុខរបរកសិករ និងជនរងគ្រោះ២នាក់ទៀត ជាអ្នករួមដំណើរមាន១.ឈ្មោះ អឿន សុខា ភេទប្រុស អាយុ១៨ឆ្នាំ រងបួសធ្ងន់ ២.ឈ្មោះឌាំង ភេទប្រុស អាយុ១៨ឆ្នាំ រងរបួសធ្ងន់ អ្នកទាំង៣ រស់នៅភូមិចំការលើឃុំចំការលើ ស្រុកថាឡាបរិវ៉ាត់ ខេត្តស្ទឹងត្រែង។
សមត្ថកិច្ចបញ្ជាក់ថា ជនរងគ្រោះទាំង៣នាក់ បានជិះម៉ូតូម៉ាកវ៉េវ ពណ៌ខៀវគ្មានស្លាកលេខ គ្មានពាក់មួកសុវត្ថិភាពក្នុងទិសដៅពីជើងទៅត្បូង ដោយបើកបរក្នុងល្បឿនលឿន បានជ្រុលទៅបុកសត្វក្របីពេញទំហឹង ដែលកំពុងដើរឆ្លងផ្លូវ ទើបបណ្តាលឱ្យយុវជនជាអ្នកបើកបរបានស្លាប់ភា្លមៗ នៅនិឹងកន្លែងកើតហេតុ និងយុវជន២នាក់ទៀតរងរបួសធ្ងន់ ត្រូវបានបញ្ជូនទៅកាន់មន្ទីរពេទ្យបង្អែកខេត្តស្ទឹងត្រែង រីឯសត្វក្របីក៏បានរងបួសធ្ងន់ដូចគ្នាផងដែរ។
បច្ចុប្បន្នសាកសពជនរងគ្រោះត្រូវបានសមត្ថកិច្ច ប្រគល់ជូនក្រុមគ្រួសារដើម្បីយកទៅបុណ្យ តាមប្រពៃណីព្រះពុទ្ធសាសនា៕
ដោយ៖ មាស សុផាត
