កំពង់ធំ=ស្រ្ដីម្នាក់ជិះម៉ូតូម៉ាកសង១២៥ ពណ៍ខ្មៅ សេរីឆ្នាំ២០១៤ពាក់ស្លាកលេខ កំពង់ធំ 1D4437 មិនប្រយ័ត្ន ធ្លាក់ចិញ្ចើមផ្លូវដួលបោកក្បាលខ្លួនឯងនៅត្រង់ចំនុចគល់ស្ពានត្រពាំងវែង ស្ថិតនៅក្នុងភូមិ ពោធ៍សែនស្នាយ សង្កាត់ស្រយ៉ូវ ក្រុងស្ទឹងសែនខេត្តកំពង់ធំ កាលពីព្រឹកថ្ងៃទី១២ ខែកក្កដាឆ្នាំ ២០១៥ ។
បើតាមប្រភពព័ត៍មានពីសមត្ថកិច្ច បានអោយដឹងថា: ស្រ្ដីរងគ្រោះឈ្មោះ ហ៊ុក ស្រីនាត អាយុ ២៣ឆ្នាំ មានកូនម្នាក់ និងប្ដីទៅធ្វើការនៅប្រទេសកូរ៉េ សព្វថ្ងៃ រស់នៅ ក្នុងភូមិ-ឃុំស្រយ៉ូវ ក្រុងស្ទឹងសែន ខេត្តកំពង់ធំ។ សមត្ថកិច្ចបន្តថា: មុនពេលកើតហេតុ ស្រ្ដីរូបនេះបានយកបាយ ទៅអោយឪពុកឈឺសំរាកនៅមន្ទីរពេទ្យចិន លុះ ត្រឡប់មកវិញមកដល់ចំនុចកើតហេតុក៏រ៉េចង្កូត ធ្លាក់ថ្នល់ ដួលបោកក្បាលតែម្ដង។
តាមការសន្និដ្ឋានរបស់សមត្ថកិច្ច គឺប្រហែលជាដៃចង្កូតម៉ូតូទាក់និងចានស្រាក់ដែលបានព្យួរនិងដៃចង្កូតម៉ូតូ រួចក៏រអិលធ្លាក់ចិញ្ចើមថ្នល់ដួលបោកក្បាល រលាត់ដៃជើងរបួសយ៉ាងធ្ងន់ធ្ងរ បន្ទាប់មក ក៏បញ្ចូនជនរងគ្រោះតាមរថយន្ដ សាម៉ុយទៅកាន់មន្ទីរពេទ្យភ្លាមៗ ចំណែកម៉ូតូប្រគល់អោយសាច់ញាតិបងប្អូននាំយកទៅផ្ទះ៕ ប៊ុន រិទ្ធី
