ខេត្តត្បូងឃ្មុំ ៖ ស្ត្រីម្នាក់បានស្លាប់យ៉ាងវេទនា ដោយត្រូវជនសង្ស័យជាឃាតក និងជាជាងធ្វើរធ្មេញ បានយកខ្សែរឹតកសម្លាប់ រួចយកសាកសពច្រកចូលបេការ៉ុង ញត់ចូលក្នុងទូដើម្បីប្លន់យកគ្រឿងអលង្ការ លុយ និងម៉ូតូ ខណៈដែលស្ត្រីរងគ្រោះរូបនេះទៅរកសេវាធ្វើធ្មេញនៅកន្លែងរបស់ជនសង្ស័យ។
ហេតុការណ៍ភ្ញាក់ផ្អើល រកឃើញសាកសពនេះកើតឡើងនៅវេលាម៉ោង ៣និង៣០នាទីរសៀល ថ្ងៃទី១២ ខែកក្តដា ឆ្នាំ២០១៥ នៅចំណុចផ្ទះជនសង្ស័យជួលប្រកបអាជីវកម្មធ្វើធ្មេញ ក្នុងភូមិដាផ្សារ ឃុំដារ ស្រុកមេមត់ ខេត្តត្បូងឃ្មុំ និងបន្ទាប់ពីមានពាក្យបណ្តឹងពីសាច់ញាតិស្ត្រីរងគ្រោះមកសមត្ថកិច្ចនគរបាល ដោយសារបាត់ស្ត្រីរងគ្រោះយូពេក។
លោកវរសេនីយ៍ឯក ប្រាក់ ប៊ុនណុន ស្នងការរងទទួលផែនព្រហ្មទណ្ឌនៃ ស្នងការដ្ឋាននគរបាលខេត្តត្បូងឃ្មុំបានប្រាប់ឲ្យដឹងថា ស្ត្រីរងគ្រោះក្នុងករណីនេះមាន ឈ្មោះ ឡៃ សំអាន ភេទស្រី អាយុ៤០ឆ្នាំ រស់នៅភូមិដារលិច ឃុំដារ ស្រុកមេមត់ ខេត្តត្បូងឃ្មុំ។ ចំណែកជនសង្ស័យជាជាងធ្មេញ ឈ្មោះហ៊ុយ សេង ភេទប្រុស អាយុ២៦ឆ្នាំ ស្នាក់នៅជួលផ្ទះធ្វើធ្មេញក្នុងភូមិ ឃុំកើតហេតុខាងលើ។
លោកស្នងការរងបានបញ្ជាក់ថា ជនសង្ស័យ បានធ្វើសកម្មភាពយកខ្សែរឹតក សម្លាប់ជនរងគ្រោះរួចច្រកបេការ៉ុង ដាក់ក្នុងទូផ្ទះបាយ ហើយគេចខ្លួនបាត់ ខណៈជនរងគ្រោះទៅព្យាបាលធ្មេញ។ សម្ភារជនរងគ្រោះបាត់បង់រួមមានៈ
១-ខ្សែកមាស១ខ្សែទំងន់៥ជី
២-ខ្សែដៃប្លាកទីន១ខ្សែទំងន់៥ជី
៣-ចិញ្ចៀន២វង់(មាស១វង់ទំងន់១,៥ជីប្លាទីន១វង់ ទំងន់១,៥ជី១វង់)
៤-ប្រាក់រៀលមួយចំនួន
៥-ម៉ូតូ១គ្រឿងផលិតនៅវៀតណាមពណ៍ក្រហម
លោកវរសេនីយ៍ត្រី ហុង គឹមហឿន អធិការនគរបាលស្រុកមេមត់ក៏បានបញ្ជាក់ដែរថា ជាមួយគ្នានេះដែរសាច់ញាតិស្ត្រីរងគ្រោះបានបញ្ជាក់ប្រាប់ឲ្យ បានដឹងថា មុនមានអំពើឃាតកម្ម នៅព្រឹកថ្ងៃដដែលស្ត្រីរងគ្រោះបានប្រាប់ទៅសាច់ញាតិថា មកធ្វើធ្មេញនៅផ្សារដារ ។ លុះពេលបាត់យូពេកបងប្អូនសាច់ញាតិក៏ជ្រួលច្របល់ ចែកគ្នាតាមស្វែងរក និងមកប្តឹងសមត្ថកិច្ចនគរបាលស្រុកមេមត់ ហើយសម្មត្ថកិច្ចនគរបាលស្រុកមេមត់ក៏បានដាក់ការសង្ស័យឲ្យកម្លាំងជំនាញតាមរកមើលផ្ទះដែលមានធ្វើធ្មេញ នៅតំបន់ដែលដាក់ការសង្ស័យ ហើយក៏ឃើញផ្ទះធ្វើរធ្មេញមួយក្នុងភូមិឃុំខាងលើបានបិទទ្វារគួរឲ្យសង្ស័យ។
លោកអធិការបានបន្តថា ភ្លាមនោះលោកក៏បានរាយការណ៍ ជូនទៅលោកឧត្តមសេនីយ៍ស្នងការ ម៉ៅ ពៅ ដើម្បីសុំគោលការណ៍ ហើយក៏មានគោលការណ៍ពីលោកឲ្យអនុវត្តតាមនីតិវិធី និងក៏បានការឯកភាពផ្នែកផ្លូវច្បាប់ពី លោកព្រះរាជអាជ្ញារសាលាដំបូងខេត្តកំពង់ចាមផងដែរ ហើយកម្លាំងក៏គាស់សោផ្ទះជនសង្ស័យដែលជួលនោះរកឃើញសពស្ត្រីរងគ្រោះតែម្តង។
លោកអធិការក៏បានបញ្ជាក់បន្ថែមថា ករណីនេះសមត្ថកិច្ចជំនាញនគបាលខេត្តបាននិងសហការជាមួយស្រុកស្រាវជ្រាវបំពេញឯកសារតាមនីតិវិធី និងតាមរកចាប់មុខសញ្ញាជនដៃដល់មកផ្តន្ទាទោសតាមច្បាប់ឲ្យខានតែបាន ៕ វណ្ណៈ
