ខេត្តកំពង់ឆ្នាំង៖ កម្មការិនី១៦នាក់បានរងរបួសធ្ងន់និងស្រាលនៅក្នុងឧប្បត្តិហេតុក្រឡាប់ រ៉ឺម៉កដឹកកម្មការិនីដែលចេញពីធ្វើការ ដែលហេតុការណ៍នេះបានកើតឡើងកាលពីល្ងាចថ្ងៃទី១៦ ខែមករា ឆ្នាំ២០១៦ នៅតាមផ្លូវគ្រួសក្រហម ភូមិស្នាយ ឃុំតាជេស ស្រុកកំពង់ត្រឡាច ។
សមត្ថកិច្ចបានអោយដឹងថា កាលពីល្ងាចថ្ងៃកើតហេតុកម្មការិនីជាច្រើននាក់បានចេញពីធ្វើការ និងបានជិះរ៉ឺម៉កទៅផ្ទះវិញ ពេលឆ្លងចូលទៅដល់ដីភូមិ គឺក្រាលគ្រួសក្រហម អ្នកបើកបររ៉ឺម៉កដែលកំពុងបើកបរក្នុងទិសដៅពីលិចទៅកើត ដើម្បីដាក់កម្មការិនីតាមផ្ទះក្នុងភូមិនេះ ប៉ុន្តែនៅពេលមកដល់ចំណុចកើតហេតុស្រាប់តែមានឧបសគ្គនៅពីមុខ ហើយអ្នកបើកបរព្យាយាមគេចឧបសគ្គនោះ ក៍បណ្តាលអោយរ៉ឺម៉កក្រឡាប់ធ្លាក់ប្រឡាយតែម្តង ចំណែកឯកម្មការិនីដែលជិះនៅលើរ៉ឺម៉កនោះបានខ្ទាតប៉ើងចេញពីរ៉ឺម៉ក បណ្តាលអោយរងរបួសធ្ងន់ និងស្រាលចំនួន១៦នាក់តែម្តង ។
ក្រោយពេលកើតហេតុ កម្មការិនីទាំងនេះបានដឹកតាមរថយន្ត សង្គ្រោះយកមកព្យាបាលនៅគ្លីនិកឯកជនមួយក្នុងស្រុកកំពង់ត្រឡាច ដែលជាគ្លីនិកបានចុះ កុងត្រាជាមួយនឹងរោងចក្រ ក្នុងពេលមានគ្រោះថ្នាក់ការងារ ។
រហូតមដល់នឹងថ្ងៃទី១៨ ខែមករានេះ ស្ថានភាពជំងឺរបស់កម្មការិនីទាំងអស់មានសភាព ធូរស្បើយគ្រាន់បើវិញ ដែលអ្នកខ្លះបានចេញទៅផ្ទះ និង អ្នកខ្លះនៅបន្តសម្រាកនៅនឹងគ្លីនិកបន្តទៀត ៕
ដោយ៖ ចន្ថា
