ខេត្ដបន្ទាយមានជ័យ៖ មនុស្សប្រុស ស្រី៨នាក់បានរងរបួសធ្ងន់ស្រាលដោយសារជិះរថយន្ដក្រុងរបស់ក្រុមហ៊ុនលាំងយូអេសដឹកអ្នកដំណើរបើកក្នុងល្បឿន លឿនហួសកំណត់ជាន់ហ្វ្រាំងមិនទាន់ក៏ ជ្រុលចង្កូតធ្លាក់ប្រឡាយ ។
កាលពីម៉ោង៥និង១៥នាទីល្ងាច ថ្ងៃទី១៧ ខែមករា ឆ្នាំ ២០១៦តាមបណ្ដោយផ្លូវជាតិលេខ៥ ត្រង់ចំណុចក្បែរសាលាស្រុកអូរជ្រៅឋិតក្នុងភូមិកូបជើង ឃុំកូប ស្រុកអូរជ្រៅ ខេត្ដបន្ទាយ មានជ័យ ។
សមត្ថកិច្ចស្រុកអូរជ្រៅបានប្រាប់ថារថយន្ដរបស់ក្រុមខាងលើពាកស្លាកលេខភ្នំពេញ 3B-2777 ពណ៌ក្រហមលាយស ចង្កូតឆ្វេងតែអ្នកបើកបរមិនស្គាល់អត្ដសញ្ញាណ ។
ប្រភពបន្ដថា មុនពេលកើតហេតុ មានភ្លៀងធ្លាក់ហើយរថយន្ដរបស់ក្រុមហ៊ុនខាងលើបានធ្វើដំណើរខណៈមានភ្លៀង ធ្លាក់ផ្លូវរអិលពីកើតមកលិចឆ្ពោះចូល ក្រុងប៉ោយប៉ែតក្នុងល្បឿនលឿនដោយ មិនបានគិតពីសុវត្ថិភាពរបស់អ្នកធ្វើ ដំណើរឡើយ។ លុះមកដល់កន្លែងកើត ហេតុជាន់ហ្វ្រាំងមិនទាន់ក៏ជ្រុលចង្កូត ធ្លាក់ចូលប្រឡាយធ្វើឱ្យមនុស្សប្រុសស្រីក្នុងរថយន្ដ៨នាក់រងរបួសធ្ងន់ស្រាលដោយ សារបោកនឹងកញ្ចក់រថយន្ដតែសំណាងល្អគ្មានអ្នកស្លាប់ ចំណែកអ្នកបើកបរក្រោយ កើតហេតុរត់គេចខ្លួនបាត់។
ក្រោយកើតហេតុគេបានឃើញកម្លាំង នគរបាលស្រុកអូរជ្រៅចុះធ្វើកំណត់ហេតុ និងហៅរថយន្ដដឹកអ្នករងរបួសធ្ងន់មួយចំនួនទៅសង្គ្រោះនៅមន្ទីរពេទ្យមិត្ដភាពកម្ពុជា-ជប៉ុនមង្គលបុរី។ ចំណែកអ្នករង របួសស្រាលត្រូវបានសាច់ញាតិដឹកទៅព្យាបាលនៅក្រុងប៉ោយប៉ែត។
សមត្ថកិច្ចបានបញ្ជាក់ថា រថយន្ដដឹក អ្នកដំណើរខាងលើខូចខាតផ្នែកខាងមុខ ធ្ងន់ហើយក្រោយពីវាស់វែងរួចរថយន្ដ នេះត្រូវបានយកទៅរក្សាទុកនៅអធិការដ្ឋាននគរបាលស្រុកអូរជ្រៅរង់ចាំដោះ ស្រាយតាមផ្លូវច្បាប់ ៕
ដោយ៖ វណ្ណា
