ភ្នំពេញ៖ ប្រភពពីមន្ត្រីរដ្ឋបាលជលផលបានទម្លាយឲ្យដឹងថា មន្ត្រីសង្កាត់រដ្ឋបាលជលផលពញាឮ ខេត្តកណ្តាលលោកកែវ ពិទូ និងលោក ឈុន ហាងស៊ុង ប្រធានអង្គភាពនេសាទរដ្ឋកណ្តាលស្ទឹង រួមទាំងឧកញ៉ា២រូបទៀត ត្រូវបានអង្គភាពប្រឆាំងអំពើពុករលួយហៅទៅសួរនាំពាក់ព័ន្ធនឹងចំណូលពីការធ្វើអាជីវកម្មគន្លងដាយត្រីក្នុងស្រុកពញាឮ ខេត្តកណ្តាល ។
ឧកញ៉ាដែលពាក់ព័ន្ធនឹងរបររកស៊ីឃុបឃិតជាមួយមន្ត្រីជលផល គឺឧកញ៉ា ប៊ុត ចាន់ធូ និងឧកញ៉ា ឡូវ ហ៊ឹង ។ ពួកគេត្រូវបានកោះហៅម្នាក់ម្តងៗឲ្យមកបំភ្លឺពាក់ព័ន្ធទៅនឹងប្រជាពលរដ្ឋបានដាក់ពាក្យបណ្តឹងទៅកាន់អង្គភាពប្រឆាំងអំពើពុករលួយអំពីការបង្កើតឲ្យមានគន្លងដាយត្រីនៅក្នុងភូមិសាស្ត្រខេត្តកណ្តាល តាមដងទន្លេសាប ក្រោមរូបភាពវិនិយោគ និងការសិក្សាស្រាវជ្រាវ ។
ប្រភពបានឲ្យដឹងថា ឧកញ៉ាពីរនាក់ខាងលើត្រូវបានអង្គភាពប្រឆាំងអំពើពុករលួយហៅទៅសួរនាំរួចហើយ ប៉ុន្តែនៅឡើយមន្ត្រីរដ្ឋបាលជលផលពីរនាក់ខាងលើនោះមិនទាន់បានហៅទៅសួរនាំនៅឡើយទេ ។ គេខ្សិបឲ្យដឹងថា មន្ត្រីរដ្ឋបាលជលផលទាំងពីរនាក់ខាងលើនេះអាចនឹងមិនត្រូវបានហៅទៅសួរនាំនោះទេ បើទោះបីជាមានឈ្មោះហើយក៏ដោយ ពីព្រោះ ចម្លើយរបស់ឧកញ៉ាទាំងពីរនាក់នោះ ហាក់ដូចជាបានសម្រាលមួយអន្លើចំពោះមន្ត្រីរដ្ឋបាលជលផលទាំងពីរនាក់នោះ ។
បើតាមសេចក្តីរាយការណ៍បានឲ្យដឹងថា ប្រជាពលរដ្ឋក្នុងស្រុកពញាឮ ខេត្តកណ្តាលបានដាក់ពាក្យបណ្តឹងទៅអង្គភាពប្រឆាំងអំពើពុករលួយ ក្រោយពីរដ្ឋបាលជលផលបង្កើតគន្លងដាយថ្មីៗដែលស្របទៅនឹងគន្លងដាយចាស់ ដែលប្រជាពលរដ្ឋបានដេញថ្លៃ និងបង់ពន្ធជូនរដ្ឋរួចហើយ ។ ឡូត៍ដាយជាង១០គន្លង ដែលរដ្ឋបាលជលផលបង្កើតថ្មីក្រោមរូបភាពវិនិយោគ និងសិក្សាស្រាវជ្រាវ បានស្ទាក់ចាប់យកត្រីអស់មួយភាគធំដែលធ្វើឲ្យទិន្នផលត្រីនៅតាមឡូត៍ដាយស្របច្បាប់ថយចុះ ។
រីឯចំណូលដែលបានមកពីការធ្វើអាជីវកម្មគន្លងដាយតាមរូបភាពវិនិយោគលក់ឲ្យឧកញ៉ាទាំងពីររូបខាងលើដែលក្នុងមួយឆ្នាំៗតម្លៃរាប់ពាន់លានរៀលនោះ មិនបានចូលក្នុងខ្ទង់ថវិកាជាតិទេ ។
ឧកញ៉ាទាំងពីរខាងលើនេះ មិនលើកទូរស័ព្ទអ្នកកាសែតនោះទេ ។ ដូច្នេះ គេមិនអាចរកការបំភ្លឺបន្ថែមជុំវិញករណីនេះបានឡើយ ៕
