ភ្នំពេញ៖ ស្រះរួមមួយកន្លែងជាកេរ្តិ៍ដំណែលតាំង ឆ្នាំ១៩៧៩ ស្ថិតនៅក្នុងភូមិ ប៉ប្រក់ខាងត្បូង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ត្រូវបានអាជ្ញាធរប្រកាសលក់ ដោយសន្យាថា នឹងចែកលុយអោយប្រជាជន ប៉ុន្តែរហូតមកដល់ពេលនេះ មានរយៈពេលជិត១ឆ្នាំហើយ មិនទាន់ឃើញស្រមោលលុយនោះសោះ ។
ប្រជាពលរដ្ឋ កំពុងអស់ជំនឿ ថានឹងបានលុយចំណែក 1 ពាន់ដុល្លារក្នុង មួយគ្រួសារ ពីការលក់ស្រះរួមមួយកន្លែង ដែលជាកេរ្តិ៍អាករ តាំងពីឆ្នាំ1979 មក ។ ប្រជាពលរដ្ឋ ដែលជាអ្នកភូមិ ប៉ប្រក់ខាងត្បូង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ប្រមាណ100នាក់ ដែលតំណាងអោយប្រជាពលរដ្ឋចំនួន 250 គ្រួសារ បានមកជួបជុំគ្នា នៅតំបន់ស្រះនោះ កាលពីព្រឹកថ្ងៃទី១៧ ខែមករា ឆ្នាំ២០១៦ ដោយបាននាំគ្នាសំដែងការមិនទុកចិត្តចំពោះអាជ្ញាធរខណ្ឌពោធិ៍សែនជ័យ ដែលបានសន្យាថា អោយលុយពួកគាត់ ក្នុងមួយគ្រួសារ 1 ពាន់ដុល្លានោះ រយៈពេលជិតមួយឆ្នាំហើយនៅតែ ចាំថ្ងៃនេះ ថ្ងៃនោះ រហូត។
យោងតាមសំដីប្រជាពលរដ្ឋ បានបញ្ជាក់ថាដីស្រះនេះ លក់បានចំនួន ជាង70 ម៉ឺន ដុល្លារ បែងចែកអោយប្រជាជន ចំនួន250 គ្រួសារ អស់ចំនួន 25 ម៉ឺនដុលា្លរ។ ទិញស្នាក់ការភូមិ 2 ល្វែង អស់10 ម៉ឺនដុលារ។ នេះជាការសន្យាជាក់ស្តែង តែចំណែកថា នឹងជួយជួសជុលប្រព័ន្ធលូ នឹង ឈូសឆាយផ្លូវ វាមិនមានលក្ខណៈប្រាកដ ប្រជានោះទេ។ ដូច្នេះសរុប សាច់លុយចំណាយជាក់ស្តែង អស់តែ 35 ម៉ឺនដុល្លារប៉ុណ្ណោះ ។ នេះបើសិនពួកគាត់បានទទួលលុយពិតប្រាកដមែននោះ ៕
ដោយ៖ សុខាសែនជ័យ
