ភ្នំពេញ៖ ជនសង្ស័យ២នាក់ត្រូវបានកម្លាំងនគរបាលប៉ុស្តិ៍ក្បាលកោះចាប់ខ្លួនពាក់ព័ន្ធករណីរក្សាទុកដោយខុសច្បាប់នូវសារធាតុញៀន ដកហូតបានថ្នាំញៀន ៣កញ្ចប់តូច និងម៉ូតូ១ គ្រឿង។

ករណីចាប់ខ្លួនជនសង្ស័យ ទាំង២នាក់នេះបានធ្វើឡើងនៅវេលាម៉ោង១១, និង៣០នាទីយប់ថ្ងៃទី២០ ខែមករា ឆ្នាំ២០១៦ នៅផ្ទះជួល ផ្លូវលំ ភូមិព្រែកធំ២ សង្កាត់ក្បាលកោះ ខណ្ឌច្បារអំពៅ ។

ជនសង្ស័យមានឈ្មោះ ស៊ឹម ចិត្រា ភេទប្រុស អាយុ៣០ឆ្នាំ គ្មានមុខរបរពិតប្រាកដ មានទីលំនៅផ្ទះលេខ៥១៧ ភូមិយកបាត្រ១ សង្កាត់ក្បាលកោះ ខណ្ឌច្បារអំពៅ និងម្នាក់ទៀតមាន ឈ្មោះអុល ចាន់ថន ភេទប្រុស អាយុ៣៣ឆ្នាំ មុខរបរជាកម្មករសំណង់ មានទីលំនៅភូមិពពាលខែ ឃុំដីឥដ្ឋ ស្រុកកៀនស្វាយ ខេត្តកណ្តាល ។

ក្នុងការបង្ក្រាបជនសង្ស័យ ទាំង២នាក់នេះសមត្ថកិច្ចដកហូតថ្នាំញៀនប្រភេទម៉ាទឹកកក ៣កញ្ចប់តូច និងម៉ូតូ១គ្រឿងម៉ាកហុងដា សេ១២៥ ពណ៍ខ្មៅ ពាក់ស្លាកលេខ តាកែវ 1A-1016 ។

លោក មាស ហ៊ែល នាយប៉ុស្តិ៍នគរបាលក្បាលកោះបានអោយដឹងថា ជនសង្ស័យទាំង២នាក់នេះត្រូវបានចាប់ខ្លួននៅពេលដែលកម្លាំងនគរបាលចុះល្បាតនៅក្នុងមូលដ្ឋានដើម្បីការពារសន្តិសុខជូនប្រជាពលរដ្ឋ ។ ពេលជួបកម្លាំងនគរបាលជនសង្ស័យបានទម្លាក់ចោលនៅក្បែជើង ភ្លាមនោះសមត្ថកិច្ច បានរើសយកមកពិនិត្យទើបដឹងថាជាកញ្ចប់ថ្នាំញៀនហើយឈានដល់ការឃាត់ខ្លួនតែម្តង ហើយជនសង្ស័យម្នាក់ឈ្មោះចិត្រា មានដីការស្វែងរកចាប់ ខ្លួនថែមទៀតផង ។

ក្រោយចាប់ខ្លួនជនសង្ស័យ ទាំង២នាក់រួមនិងវត្ថុតាងត្រូវបានបញ្ចូនទៅកាន់អធិការដ្ឋាននគរបាលខណ្ឌដើម្បីកសាងសំណុំរឿងបញ្ចូនទៅតុលាការចាត់ការតាមផ្លូវច្បាប់ ៕

ដោយ៖ សណ្តោស