អន្តរជាតិ៖ ប្រជាជនជិត៥លាននាក់ រស់នៅក្នុងទ្វីបអាហ្រ្វិកខាងកើត កំពុងប្រឈមនឹងការអត់ឃ្លាន ខណៈដែលវត្តមានរបស់ហ្វូងកណ្តូបដ៏ច្រើនសន្ធឹកសន្ធាប់ បានទៅបំផ្លាញដំណំពួកគេ ។ នេះបើតាមការបញ្ជាក់ពី គណៈកម្មាធិការជួយសង្គ្រោះអន្តរជាតិ ហៅកាត់ថា (IRC) ។
នៅក្នុងសេចក្តីថ្លែងការណ៍ របស់គណៈកម្មាធិការជួយសង្គ្រោះអន្តរជាតិខាងលើនេះ បានលើកឡើងថា សត្វកណ្តូបវាលខ្សាច់ជំនាន់ទី៤ដែលមានចំនួនច្រើនជាងហ្វូងកណ្តូបមុនៗរហូតដល់ទៅ ៨០០០ដង អាចបំផ្លាញដំណាំគ្មានសល់ នៅពេលរដូវស្រែកឃ្លានរបស់ពួកវាមកដល់។ ហើយនៅពេលនោះ ប្រជាជនរាប់លាននាក់ នឹងត្រូវប្រឈមមុខជាមួយបញ្ហាស្បៀង និងគ្រោះអត់ឃ្លាន។ ការគំរាមកំហែងពីពពួកកណ្តូប ដែលមានកម្លាំងដ៏ធំធេងបែបនេះ គឺមិនធ្លាប់មានទេក្នុងរយៈ ៧០ឆ្នាំមកនេះ ហើយបូករួមទាំងជំងឺរាតត្បាតកូវីដ១៩មួយកម្រិតទៀត ហានិភ័យផ្សេងៗនៅក្នុងតំបន់នេះ នឹងបន្តកើតមានកាន់តែខ្លាំងឡើង។
សូមជម្រាបថា កណ្តូបវាលខ្សាច់គឺជាសត្វល្អិតដែលមានគ្រោះថ្នាក់បំផុតក្នុងពិភពលោក ដោយកណ្តូបមួយហ្វូងទំហំមួយគីឡូម៉ែត្រការ៉េ អាចស៊ីចំណីស្មើគ្នាទៅនឹងរបបអាហាររបស់មនុស្ស ៣៥,០០០នាក់ក្នុងមួយថ្ងៃ។ ហើយប្រសិនបើមនុស្សមិនបានចាត់វិធានការបង្ការឱ្យបានទាន់ពេលវេលាទេនោះ គ្រោះអត់ឃ្លានដ៏ធំបំផុតនឹងកើតមានឡើង។
បច្ចុប្បន្នប្រទេសនៅក្នុងទ្វីបអាហ្វ្រិកខាងកើតចំនួន៦ ដែលកំពុងរងការគំរាមកំហែងដោយសារហ្វូងកណ្តូបវាលខ្សាច់រួមមាន ប្រទេសអេត្យូពីកេនយ៉ា សូម៉ាលី ស៊ូដង់ខាងត្បូង អ៊ូហ្គង់ដា និងតង់ហ្សានី។ ហើយមូលហេតុចម្បង ដែលបណ្តាលឱ្យមានការលុកលុយរបស់ពពួកកណ្តូបនេះគឺដោយសារការប្រែប្រួលអាកាសធាតុខ្លាំងក្លាជាបន្តបន្ទាប់នៅទ្វីបអាហ្វ្រិកខាងកើត ដែលដំបូងឡើយមានគ្រោះរាំងស្ងួត បន្ទាប់មកក៏មានភ្លៀង និងគ្រោះទឹកជំនន់ជាហូហែ៕ដោយ៖ស តារា
