ភ្នំពេញ: បុរសវ័យចំណាស់ម្នាក់ បើកម៉ូតូម៉ាកហុងដាសេ១២៥ពណ៌ខ្មៅ កែច្នៃដាក់កង់៣បានជ្រុល ចង្កូតទៅប្រទះបុកកាងមុខរថយន្ត ម៉ាកកាមរីបាឡែន១គ្រឿង ដែលកំពុងបើកព័ទ្ធរង្វង់មូលកាំកូស៊ីធីបណ្តាលឲ្យខ្ទាតធ្លាក់ពីលើម៉ូតូស្លាប់ភ្លាមៗនៅកន្លែងកើតហេតុ ។
ឧប្បត្តិហេតុនេះបានកើតឡើងនៅវេលាម៉ោង៥និង១៥នាទីល្ងាចថ្ងៃទី២១ ខែមករា២០១៦ផ្លូវលេខ៥៩៨កែងនិងផ្លូវម៉ុងឬទ្ធី ក្នុងសង្កាត់បឹងកក់ទី១ ខណ្ឌទួលគោក ។
សពជនរងគ្រោះមានឈ្មោះយ៉ាន់ សុវណ្ណា អាយុ៦១ឆ្នាំ ស្នាក់នៅក្រុមទី១១ ភូមិទួលគោក សង្កាត់ទួលសង្កែ ខណ្ឌឬស្សីកែវ ក្រុងភ្នំពេញ។ជនរងគ្រោះ ជិះម៉ូតូម៉ាកហុងដាឌ្រីម ពណ៌ខ្មៅ កែច្នៃដាក់កង់៣។ ចំណែកអ្នកបើករថយន្តមានឈ្មោះដាញ់ សុវង្ស ភេទប្រុស អាយុ៦៣ឆ្នាំ ស្នាក់នៅផ្ទះលេខ២ ផ្លូវបេតុង ក្រុម៦ ភូមិទួលគោក សង្កាត់ទួលសង្កែ ខណ្ឌ ឬស្សីកែវ បើករថយន្តម៉ាកកាមរីបាឡែន ពណ៌ទឹកប្រាក់ ។
ប្រភពព័ត៌មានពីកន្លែងកើតហេតុឲ្យដឹងថា មុនពេលកើតហេតុគេបានឃើញរថយន្តម៉ាកកាមរីបាឡែន បើកបរតាមផ្លូវលេខ៥៩៨ ពីត្បូងទៅជើង ។ចំណែកម៉ូតូជនរងគ្រោះជិះតាមផ្លូវម៉ុងឬទ្ធី ពីលិចទៅកើត ហើយពេលមកដល់ចំណុចកើតហេតុខាងលើ ស្រាប់តែម៉ូតូជនរងគ្រោះបើកមកក្នុងល្បឿនលឿនចាប់ហ្រ្វាំងមិនទាន់ ក៏ជ្រុលទៅបុកនឹងកាងមុខរថយន្ត បណ្តាលឲ្យជនរងគ្រោះខ្ទាតធ្លាក់ពីលើម៉ូតូដួលផ្ងារក្រោយស្លាប់នៅកន្លែងកើតហេតុតែម្តង។ ឯអ្នកបើកបររថយន្ត ត្រូវសមត្ថកិច្ចឃាត់ខ្លួននៅនិងកន្លែងកើតហេតុផងយកទៅសួរនាំ ។
សាច់ញាតិរបស់ជនរងគ្រោះ ឲ្យដឹងថាកន្លងមក ជនរងគ្រោះមានអាការៈទន់ជើងដើរអត់រួចទើបក្រុមគ្រួសារកែច្នៃម៉ូតូកង់បីឲ្យគាត់ជិះ ។ លុះមកដល់ថ្ងៃកើតហេតុជួបគ្រោះថ្នាក់យ៉ាងដូច្នេះពិតជាគួរឲ្យហួសចិត្តណាស់ ។ទោះយ៉ាងណា ដោយសារតែមិនអស់ចិត្តថាជនរងគ្រោះស្លាប់នោះក្រុមគ្រួសារ បានដឹកជនរងគ្រោះយកទៅកាន់មន្ទីរពេទ្យឲ្យជួយសង្រ្គោះ ប៉ុន្តែគ្រូពេទ្យប្រាប់ថាស្លាប់ហើយ ទើបដឹកយក មកផ្ទះវិញ ដើម្បីរៀបចំធ្វើបុណ្យតាមប្រពៃណី ៕ ប្រាថ្នា
