ខេត្ដមណ្ឌលគិរី៖ ពំនូកឈើដែលឆេះ នៅក្នុងក្រុមហ៊ុនប៊ិនហ្វឿក១ មានទីតាំង នៅភូមិចក់ចារ ឃុំស្រែឈូក ស្រុកកែវ សីមា ខេត្ដមណ្ឌលគិរី បើគិតមកដល់ ព្រឹកថ្ងៃទី២២ ខែមករា ឆ្នាំ២០១៦មាន រយៈពេលថ្ងៃ៤បីយប់ហើយ នៅមិនទាន់ មានសមត្ថកិច្ចឬមន្ដ្រីជំនាញពន្លត់នៅ ឡើយទេ ។ នេះបើតាមពលរដ្ឋដែលរស់ តំបន់នេះនាំគ្នាអះអាងកាលពីល្ងាចថ្ងៃ ទី២២ ខែមករានេះ ។
ពលរដ្ឋដែលរស់នៅភូមិចក់ចារបានរៀបរាប់ថា គំនរឈើត្រូវបានគេដុតនៅ ក្នុងបរិវេណក្រុុមហ៊ុនប៊ិនហ្វឿក១តាំងពីយប់ថ្ងៃទី១៩មកម្ល៉េះរហូតដល់ថ្ងៃនេះ គំនរខ្លះបានឆេះក្លាយជាផេះអស់ទៅ ហើយ ។ ពួកគាត់បានបន្ថែមថា គេនាំ គ្នាដុតចំនួន៦ទៅ៧កន្លែងផ្សេងគ្នាមួយ កន្លែងៗមានចំនួនមិនតិចជាង១០០កំណាត់នោះទេ ហើយឈើហ៊ុបប្រភេទសុក្រំ នៅក្នុងបរិវេណក្រុមហ៊ុនប៊ិនហ្វឿក១រាប់ពាន់កំណាត់ត្រូវបានសមត្ថកិច្ចចម្រុះចុះ ទៅវាស់វែងផងដែរ ។
លោក ជុយ សុឃាង នាយផ្នែករដ្ឋបាល ព្រៃឈើស្រុកកែវសីមាបានឱ្យដឹងថា រហូត ដល់ពេលនេះមន្ដ្រីជំនាញនៅមិនទាន់ កំណត់បានអំពីតួលេខចំនួនឈើនៅ ឡើយទេ ។ លោកនិយាយថា “ខ្ញុំទើបតែ មកកាន់ការថ្មីមិនទាន់ដឹងថាគំនរឈើ ណាមានត្រានៅឡើយទេ វាមានចំនួន ច្រើន ហើយមន្ដ្រីជំនាញចែកគ្នាធ្វើការ តាមគោលដៅផ្សេងគ្នានៅមិនទាន់បូកបញ្ចូលគ្នានៅឡើយទេ ចំណែកឈើដែល ឆេះគឺឆេះអស់ហើយក្លាយទៅជាផេះគ្មានសេសសល់អ្វីទេ” ។
បើតាមអ្នកភូមិអះអាងថា ករណីដុត ឈើទាំងនោះគឺដើម្បីបំបាត់ភស្ដុតាង ។ ប៉ុន្ដែថាតើនរណាដុតគឺមិនដឹងនោះទេ? ខ្លះថា ក្រុមហ៊ុនជាអ្នកដុត អ្នកខ្លះទៀត ថាក្រុមហ៊ុនបានលក់ឈើទៅឱ្យក្រុម ឧកញ៉ាល្បីឈ្មោះរួចអស់ហើយ ៕
ដោយ៖ ហេង សូរិយា
