ខេត្តកណ្តាល៖ អ្នកបើកបររថយន្តម្នាក់ដែលបើកបុកមនុស្សបណ្តាលស្លាប់ម្នាក់នៅកន្លែងកើតហេតុកាលពីយប់ថ្ងៃទី២១ ខែមករា ឆ្នាំ២០១៦ កន្លងទៅ ឥឡូវត្រូវបានចៅក្រមស៊ើបសួរសាលាដំបូងខេត្តកណ្តាលសម្រេចឃុំខ្លួនបណ្តោះអាសន្នហើយនៅរសៀលថ្ងៃទី២២ ខែមករា ឆ្នាំ២០១៦ ។
លោកឧត្តមសេនីយ៍ត្រីវ៉ែន សុវិន ស្នងការរងនគរបាល ខេត្តកណ្តាលទទួលការងារសណ្តាប់ធ្នាប់ចរាចរបានអោយដឹងថា អ្នកបើកបររថយន្តលុច្សស៊ីសដែលបើកបុកមនុស្សស្លាប់ម្នាក់របួសធ្ងន់២នាក់កាលពីយប់ថ្ងៃទី២១ ខែមករា ឆ្នាំ២០១៦ នៅលើផ្លូវលេខ ១១០ ភូមិព្រែកស្វាយ២ ឃុំឈើទាល ស្រុកកៀនស្វាយ ត្រូវបានលោកអ៉ី សុវណ្ណ ចៅ ក្រមស៊ើបសួរសាលាដំបូងខេត្តកណ្តាល ចេញដីការឃុំបណ្តោះអាសន្ន លេខ១៩៨ ចុះថ្ងៃទី២២ ខែមករា ឆ្នាំ២០១៦ បង្គាប់ឃុំខ្លួនឈ្មោះជុំ សំណាង ភេទប្រុស អាយុ៣២ឆ្នាំ មានទីលំនៅភូមិដើមមាន សង្កាត់ដើមមាន ក្រុងតាខ្មៅ ចោទប្រកាន់ពីបទ បើកបរដោយធ្វេសប្រហែល ខ្ជីខ្ជា មិនប្រុងប្រយ័ត្ន មិនគោរពកាតព្វកិច្ច បណ្តាលអោយមានរបួសនិងស្លាប់អ្នកដទៃ តាមបញ្ញត្តិមាត្រា៨៣និង៨៥ នៃច្បាប់ស្តីពីចរាចរផ្លូវគោក ។
លោកស្នងការរងបានបន្តថា បើគិតពីជំនាញចរាចរ បទល្មើសនេះកើតឡើងដោយសារកំហុសរួមគ្នា ដោយសារម៉ូតូបើកឆ្លងផ្លូវមិនប្រយ័ត្ម ចំណែកអ្នកបើកបររថយន្តនឹកថាពេលយប់ស្ងាត់ក៍បើកក្នុងល្បឿនលឿនស្រាប់តែបុកអ្នកជិះម៉ូតូពេញទំហឹងតែម្តង ។ បើនិយាយពីកំហុសស្មើគ្នា តែបើនិយាយពីផ្លូវច្បាប់វិញ អ្នកបើកបររថយន្តមានកំហុសច្រើនជាង ពោលគឺបើកបរបណ្តាលអោយមនុស្សស្លាប់ ។
សូមបញ្ជាក់ថា កាលពីវេលាម៉ោង៩និង១០នាទី យប់ថ្ងៃទី២១ ខែមករា ឆ្នាំ២០១៦ នៅលើកំណាត់ផ្លូវជាតិលេខ១១០ ស្ថិតក្នុងភូមិព្រែកស្វាយ២ ឃុំឈើទាល ស្រុកកៀនស្វាយ ខេត្តកណ្តាល មានករណីគ្រោះថ្នាក់ចរាចរបង្កឡើងដោយ
រថយន្តម៉ាកឡិចស៊ីស RX 300 ពណ៌សលាយស្ក ពាក់ស្លាកលេខភ្នំពេញ2AF-0342 បើកបរដោយឈ្មោះ ជុំ សំណាង ភេទប្រុស អាយុ៣២ឆ្នាំ មុខរបរជាង ធ្វើគ្រឿងសង្ហារឹម មានទីលំនៅក្នុងភូមិដើមមៀន សង្កាត់ដើមមៀន បានបើកបុកអ្នកជិះម៉ូតូបណ្តាលអោយស្លាប់ម្នាក់របួសធ្ងនើ២នាក់ ។
ស្ត្រីដែលស្លាប់នៅកន្លែង កើតហេតុមានឈ្មោះ សួង ភណ្ឌ័ ភេទស្រី អាយុ៤៥ឆ្នាំ មុខរបរកសិករ រីឯអ្នករងរបួសធ្ងន់ឈ្មោះ ទ្បាច ចន្ថា ភេទប្រុស អាយុ៣៥ឆ្នាំ មុខរបរកសិករ ជាអ្នកបើកបរម៉ូតូ និងម្នាក់ទៀតឈ្មោះ គង់ ស្រីវង់ ភេទស្រី អាយុ១៦ឆ្នាំ មុខរបរសិស្ស ។ ជនរងគ្រោះទាំង៣នាក់នេះមានទីលំនៅក្នុងភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ជិះម៉ូតូធុនសេ១០០កូរ៉េ ពណ៌ក្រហម ពាក់ស្លាកលេខញ1E-8749 ។
នគរបាលចរាចរបានអោយ ដឹងថា នៅមុនពេលកើតហេតុ សាក្សីបានឃើញរថយន្តបង្កបើកបរតាមបណ្តោយផ្លូវជាតិលេខ១១០ ទិសដៅពីស្អាងទៅ ភ្នំពេញ លុះបើកដល់ចំណុចកើតហេតុបានបុកម៉ូតូជនរងគ្រោះដែលកំពុងជិះចេញពីក្លោងទ្វាវត្តស្រែអំពិលពេញមួយទំហឹង បណ្តាលម៉ូតូដួលបោកទៅលើផ្លូវធ្វើឲ្យស្ត្រីម្នាក់ស្លាប់ភ្លាមៗមួយរំពេច រីឯបុរសជាអ្នកបើកបរនិងនារីរួមដំណើរជាមួយរងរបួសធ្ងន់ ។ ក្រោយពីមានហេតុការណ៍កើតឡើងអ្នកបើកបររថយន្តបង្កបានព្យាយាមបើកគេចចេញពីកន្លែងកើតហេតុ តែត្រូវបានកម្លាំងនគរបាលប៉ុស្តិ៍រដ្ឋបាលឈើទាលតាមចាប់បានទាំងរថយន្ត និងអ្នកបើកបរ ដើម្បីកសាងសំណុំរឿងចាត់ការតាមច្បាប់ ។
ជនរងគ្រោះដែលរងរបួសធ្ងន់ ត្រូវបានរថយន្តសង្គ្រោះបន្ទាន់ដឹកបញ្ជូនទៅសង្គ្រោះនៅមន្ទីរពេទ្យក្នុងរាជធានីភ្នំពេញ ។ ដោយឡែកសាកសពជនរងគ្រោះត្រូវបានប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី ៕
ដោយ៖ សណ្តោស
