ខេត្តក្រចេះ៖ គំនរឈើប្រណីតប្រភេទធ្នង់ ក្រឡឹង និងសុក្រំ ស៊ីឡាំង សុក្រំមូល ត្រូវបានគេប្រទះឃើញលាក់ទុកក្នុងព្រៃយ៉ាងច្រើនសន្ធឹកសន្ធាប់ ក្នុងនោះត្រូវបានគេសង្ស័យថា ជាឈើរបស់ឈ្មួញធំៗចំនួន៣នាក់ក្នុងខេត្តក្រចេះ ដែលជាអ្នកប្រមូលទិញឈើដឹកជញ្ជូនយ៉ាងអនាធិបតេយ្យ និងទ្រង់ទ្រាយធំផងដែរ ។
គំនរឈើដែលត្រូវបានគេប្រទះឃើញស្ថិតនៅចំណុចឃុំរលួសមានជ័យ ស្រុកសំបូរ ខេត្តក្រចេះ ក្នុងនោះ ឈើប្រណីតធ្នង់ ក្រឡឹងត្រូវបានលើកតម្រៀបគរលើគ្នា ឈើសុក្រំមូល និងសុក្រំស៊ីឡាំង ត្រូវបានគេលាក់ទុកនៅតាមគុម្ពោធព្រៃរបស់ក្រុមហ៊ុន CV ។ សមត្ថកិច្ចបានឲ្យដឹងថា កាលពីព្រឹកថ្ងៃទី២២ ខែមករា ឆ្នាំ២០១៦ នៅក្នុងព្រៃ និងតាមផ្លូវលំ មានឃើញផ្សែងខ្មួលខ្មាញ ដោយសកម្មភាពរបស់ជនខិលខូចបាននាំគ្នាដុតគំនរឈើប្រណីតនៅតាមដងផ្លូវចូលទៅកាន់ទីតាំងខាងលើក្នុងគោលបំណងបំបាត់ភស្តុតាង ឬក៏បំភ័ន្តសមត្ថកិច្ចថា ឈើនៅក្នុងពេលនេះគ្មានការលាក់ទុក ដោយពួកគេដុតបំផ្លាញអស់ហើយ ។
ប៉ុន្តែកម្លាំងជំនាញ បានបន្តរុករកក្នុងព្រៃ ក៏ប្រទះឃើញឈើទាំងនោះយ៉ាងច្រើនសន្ធឹកសន្ធាប់ ហើយលោក សាន ប៊ុនថាន មេបញ្ជាការកងរាជអាវុធហត្ថខេត្តក្រចេះ ក៏បានដឹកនាំបញ្ជាកម្លាំងឲ្យទៅកាន់ទីនោះដើម្បីយាមកាម មិនអនុញ្ញាតឲ្យមានឈ្មួញ ឬជនខិលខូចណាបន្លាស់ឈើចេញពីទីតាំងនោះបានឡើយ ។
លោក ទ្រី សុភក្ត្រ នាយខណ្ឌរដ្ឋបាលព្រៃឈើខេត្តក្រចេះបានប្រាប់នគរវត្តតាមទូរស័ព្ទ នាព្រឹកថ្ងៃទី២៣ ខែមករា ឆ្នាំ២០១៦ ថា ពិតជាមានគំនរឈើនៅទីនោះមែន ដោយសារជំនាញរដ្ឋបាលព្រៃឈើសហការល្អជាមួយនឹងខាងកម្លាំងកងរាជអាវុធហត្ថ ក្នុងនោះ លោក សាន ប៊ុនថាន មេបញ្ជាការកងរាជអាវុធហត្ថខេត្ត ក៏បានដឹកនាំកម្លាំងទៅកាន់ទីនោះ ហើយគ្នារបស់លោក ក៏នឹងត្រូវរៀបចំឲ្យមានក្រុមការងារដើម្បីវាស់វែង ។
លោកទ្រី សុភក្ត្របន្តថា ខ្ញុំមិនទាន់ប៉ាន់ប្រមាណបានទេថា ឈើទាំងនោះមានចំនួនប៉ុន្មាន ជារបស់អ្នកណា និងស្ថិតនៅក្នុងក្រុមហ៊ុនណា ចាំមើល ការមើលផែនទី ឬចុច GPS សិន ។
គួររំលឹកថា ឈើប្រណីតទាំងនេះ ត្រូវបានគេទម្លាយឲ្យដឹងថា ជាឈើរបស់មេឈ្មួញឈ្មោះ ឃី ផេង ជាមន្ត្រីយោធា ក្នុងតំបន់ប្រតិបត្តិការសឹករងក្រចេះ ឈ្មោះ ហាក់ វុត្ថា ហៅ ថាកខ្លី ជាមេបញ្ជាការរងយោធាវរការពារព្រំដែនលេខ២០៤ នៅស្រុកស្នួល និងម្នាក់ទៀត ឈ្មោះ ហៀប រស់នៅស្រុកស្នួល ខេត្តក្រចេះ ។ ឈ្មួញទាំង៣រូបនេះ ជាមុខសញ្ញាបទល្មើសព្រៃឈើដ៏ចេញមុខ និងយូរឆ្នាំមកហើយ ទាំងសកម្មភាពប្រមូលទិញឈើក្នុងព្រៃ ការដឹកជញ្ជូន ហើយមួយរយៈនេះ ឈ្មោះ ហាក់ វុត្ថា ហៅ ថាកខ្លី ខ្លួនជាសមត្ថកិច្ចដែលមានតួនាទីភារកិច្ច ជាអ្នកចូលរួមទប់ស្កាត់បង្ក្រាបបទល្មើស បែរជាឈ្មួញក្នុងការទិញឈើ លក្ខណៈទ្រង់ទ្រាយធំចេញពីទឹកដីស្រុកកោះញែក ខេត្តមណ្ឌលគិរី និងយកមកលាក់ទុកក្នុងទឹកដីស្រុកសំបូរ ខេត្តក្រចេះ ។
គំនរឈើរាប់ពាន់កំណាត់ដែលត្រូវបានកម្លាំងកងរាជអាវុធហត្ថចុះបង្ក្រាបនៅចំណុចអូរគគីរ ឃុំរលួសស្រែចេស ស្រុកសំបូរ ហើយនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ជាប្រធានគណៈកម្មការជាតិដើម្បីទប់ស្កាត់ បង្ក្រាបបទល្មើសព្រៃឈើ កន្លងទៅក៏បានដឹកនាំក្រុមការងារទៅកាន់ទីនោះដោយផ្ទាល់ និងបានបញ្ជាដល់ក្រុមការងារត្រូវតែចាត់វិធានការស៊ើបអង្កេតរកឲ្យ ឃើញពីប្រភពឈើទាំងនេះ បានកាត់ចេញពីក្រុមហ៊ុន ឬក៏កាប់ពីកន្លែងផ្សេងយកមកលាក់ទុកនៅទីនេះដើម្បីចាត់វិធានការទៅតាមនីតិវិធី ។
ឈ្មួញ ហាក់ វុត្ថា ហៅ ថាកខ្លី មេបញ្ជាការរងយោធា វរៈការពារព្រំដែនលេខ២០៤ គាត់ជាអ្នកប្រមូលទិញឈើ និងលាក់ឈើរាប់ពាន់កំណាត់ ពិសេសប្រភេទឈើធ្នង់ និងឈើសុក្រំ ទុកសម្រាប់លក់បន្ត ឬជាអ្នកគ្រប់គ្រងឈើឲ្យទៅឧកញ៉ា វន ប៊ុនថៃ ហៅឧកញ៉ា ថៃ ។ ឈ្មួញនៅទីនោះបង្ហើបថា ហាក់ វុត្ថា ជាអ្នកមានតួនាទី ប្រមូលទិញឈើ យកមកលាក់ទុកក្នុងព្រៃ ដល់ពេលឧកញ៉ា វន ប៊ុនថៃ ជាអ្នកគ្រប់គ្រងឈើនៅលើរថយន្ត ឬត្រូវបានដឹកចេញ ។
សមត្ថកិច្ចគួរតែចាត់វិធានការមេឈ្មួញទាំង៣រូប ហាក់ វុត្ថា ឃី ផេង និងឈ្មួញ ហៀប អ្នកទាំងនេះហើយដែលជាប្រភពបង្កើតឲ្យមានបទល្មើសព្រៃឈើនៅក្នុងទឹកដីខេត្តក្រចេះ និងរាលដាលទៅដល់ទឹកដីស្រុកកែវសីមា ស្រុកកោះញែក ខេត្តមណ្ឌលគិរីផងដែរ ។
ពាក់ព័ន្ធនឹងបទល្មើសលាក់ឈើដ៏សន្ធឹកសន្ធប់នេះ បើទោះជាប្រភពខ្លះអះអាងថា អ្នកទាំង៣បានលាក់ទុក និងបាន ប្រើប្រាស់កម្មកររបស់ខ្លួន ដុតបំផ្លាញមួយចំនួនក៏ដោយ ប៉ុន្តែនគរវត្តមិនអាចទាក់ទងបានទេនាព្រឹកថ្ងៃទី២៣ ខែមករា ឆ្នាំ២០១៦ ដោយគ្មានលេខទូរស័ព្ទ ។ ប៉ុន្តែនៅព្រឹកថ្ងៃដដែលនេះ កម្លាំងសមត្ថកិច្ចកងរាជអាវុធហត្ថ និងជំនាញរដ្ឋបាលព្រៃឈើមួយចំនួនទៅដល់ទីនោះ មួយចំនួនទៀតកំពុងចេញដំណើរក្នុងប្រតិបត្តិការការងារបង្ក្រាប និងវាស់វែង ៕
ដោយ៖ សុខ ខេមរា
