ភ្នំពេញ៖ មានការភ្ញាក់ផ្អើលថាស្ដ្រី បម្រើម្នាក់បានលួចយកកូនស្រីម្ចាស់ផ្ទះអាយុ៩ខែទៅបាត់ហើយត្រូវឪពុកម្ដាយ និងក្រុមគ្រួសារអំពាវនាវឱ្យសមត្ថកិច្ច ជួយតាមរក ។ ការភ្ញាក់ផ្អើលនេះកើត ឡើងកាលពីវេលាម៉ោង៥ព្រឹកថ្ងៃទី២២ ខែមករា ឆ្នាំ២០១៦ ស្ថិតនៅផ្ទះលេខ៤ ផ្លូវលេខ៤៣២ សង្កាត់បឹងត្របែក ខណ្ឌ ចំការមន រាជធានីភ្នំពេញ ។
ប្រភពពីពលរដ្ឋរស់នៅក្បែរកន្លែង កើតហេតុបានឱ្យដឹងថា ការបាត់ក្មេង ស្រីអាយុ៩ខែនេះត្រូវក្រុមគ្រួសារនិងឪពុកម្ដាយក្មេងស្រីរងគ្រោះបានដាក់ការសន្និដ្ឋានថាស្ដ្រីអ្នកបម្រើរូបនេះអាចយកកូនស្រីជាទីស្រឡាញ់របស់ខ្លួនទៅកាន់ប្រទេសថៃ ។
លោក នូ ដារ៉ា អាយុ៣៨ឆ្នាំ ត្រូវជាពូ របស់ក្មេងស្រីតូចបានឱ្យដឹងថា ស្ដ្រី បម្រើដែលលួចក្មួយស្រីរបស់គាត់នោះមានឈ្មោះ ជាតិ និមល អាយុ២៤ឆ្នាំ ។
ស្ដ្រីរូបនេះក៏ជាសាច់ញាតិនឹងម្ចាស់ ផ្ទះផងដែរ ប៉ុន្ដែមួយរយៈចុងក្រោយនេះ នាងបានធ្វើលិខិតឆ្លងដែននិងមានអ្នក នៅប្រទេសថៃទូរស័ព្ទមកស្ទើររាល់ថ្ងៃ ដូច្នេះស្ដ្រីរូបនេះអាចចេញទៅប្រទេស ថៃដោយយកក្មួយរបស់គាត់ទៅជាមួយ ខណៈឪពុកម្ដាយរបស់នាងដែលទើបតែមានកូនលើកដំបូង ។
ទាក់ទិនការភ្ញាក់ផ្អើលបាត់ក្មេងស្រី ខាងលើនេះលោក លាង សាមឿន នាយ នគរបាលប៉ុស្ដិ៍បឹងត្របែកបានឱ្យដឹងថា ពុំមានរឿងហេតុបែបនេះទេការពិតជា រឿងបំប៉ោងសភាពការណ៍ឱ្យសមត្ថកិច្ច វិលក្បុងតែប៉ុណ្ណោះ ។
លោកនាយនគរបាលប៉ុស្ដិ៍មាន ប្រសាសន៍ថា ការពិតក្មេងស្រីដែលបាត់ ខ្លួននេះត្រូវម្ដាយបង្កើតរបស់នាងព ចេញពីផ្ទះបន្ទាប់ពីមានទំនាស់ជាមួយប្ដីកាលពីយប់ ។ លោកថាក្រុមគ្រួសារនេះ បន្ទាប់ពីដឹងរឿងហេតុបែបនេះពួកគេ ដឹងកំហុសនិងមិនបានដាក់ពាក្យបណ្ដឹង នៅប៉ុស្ដិ៍នគរបាលបឹងត្របែកទេដែល ករណីនេះសមត្ថកិច្ចចាត់ទុកថាបាន បំប៉ោងសកម្មភាពក្នុងមូលដ្ឋានឱ្យវឹកវរមិនត្រូវប្រជាពលរដ្ឋឯទៀតយកគំរូតាមនោះឡើយ ៕
ដោយ៖ ស រស្មី
