ភ្នំពេញ៖ ប្រភេទល្បែងចាក់ភា្នល់ ស៊ីសងខុសច្បាប់រួមមានក្រៅពីកន្ទុយ លេខ សង្វៀនបញ្ជល់មាន់-បៀ-អាប៉ោង គឺមានកន្លែងចាក់បាល់កំពុងរីកដុះដាលយ៉ាងពេញបន្ទុកនៅតាមមូលដ្ឋាន តាម ផ្សារនានាក្នុងខណ្ឌពោធិ៍សែនជ័យ តែ បើការបង្ក្រាបវិញហាក់បីដូចជាស្ដួច ស្ដើងបំផុតដែលគេមិនដឹងថា អាជ្ញាធរ សមត្ថកិច្ចបិទភ្នែកត្រូវថ្នាំសណ្ដំ ឬមិន ហ៊ានខ្លាចប៉ះខ្សែយ៉ាងណានោះទេ ។
សង្វៀនបញ្ជល់មាន់មួយកន្លែងដែលល្បីពេញភូមិរហូតពលរដ្ឋលាន់មាត់ថា ម្ចាស់សង្វៀនជាតារាចម្រៀងល្បីពេញ និយមម្នាក់បើកលេងល្បែងបញ្ជល់មាន់ ស្ថិតនៅខាងលិចប៉ុស្ដិ៍ត្រញំងក្រសាំង កណ្ដាលព្រៃឫស្សីម៉ុងចិន ក្នុងភូមិខ្វែ សង្កាត់ត្រញំងក្រសាំង ខណ្ឌពោធិ៍សែន ជ័យដោយបើកលេងលាយជាមួយល្បែងអាប៉ោងផងដែរ ។ សមត្ថកិច្ចឬអាជ្ញាធរ ខណ្ឌមើលរំលងមិនឃើញ ដោយសារតែ បាំងបិទទៅដោយគុម្ពឫស្សីក៏មិនដឹង ទើបមិនបានបង្ក្រាប ។ រីឯកន្លែងចាក់ បាល់វិញកើតមានច្រើនកន្លែងជ្រក ក្រោមស្លាកអ៊ីនធើណេតមួយកន្លែងនៅ តាមផ្លូវជាតិលេខ៣យីហោ 188 Net ក្នុងភូមិព្រៃព្រីងត្បូង សង្កាត់ចោមចៅ និងមួយកន្លែងទៀតនៅតាមផ្លូវជាតិ លេខ៤ជាប់ខ្លោងទ្វារច្រកចូលបុរីចោម ចៅយីហោ AA2888 Net ក្នុងភូមិព្រៃ ព្រីងជើង សង្កាត់ចោមចៅ ហើយពុំ ដែលឃើញអាជ្ញាធរសមត្ថកិច្ចហ៊ានក្អកចុះទៅមើលឡើយ ។
តាមប្រជាពលរដ្ឋនៅសង្កាត់ត្រញំងក្រសាំងប្រាប់ឱ្យដឹងថា សង្វៀនបញ្ជល់ មាន់ដែលសូម្បីតែក្មេងក្នុងភូមិក៏ដឹងដែរ ថាម្ចាស់អ្នកបើកជាតារាចម្រៀងល្បី ពេញនិយមហើយក៏ជាពិធីករក្នុងពិធី មង្គលការផងដែរ បន្ទាប់ពីលួចបើក សង្វៀនបញ្ជល់មាន់ខុសច្បាប់នៅក្នុង ខណ្ឌឫស្សីកែវ ហើយត្រូវបានសមត្ថកិច្ច ចុះបង្ក្រាបបំបែកទីតាំងឆ្នាំងបាយរបស់តារាចម្រៀងនោះរួចមកក៏បានមកលួចបើកសង្វៀនបញ្ជល់មាន់ខុសច្បាប់ ដោយលួចលាក់ក្នុងព្រៃឫស្សីម៉ុងខ្មោច ក្បែរសាលាសង្កាត់ត្រញំងក្រសាំង សាជាថ្មីដើម្បីបំពេញបង្គ្រប់បន្ថែមពីលើរបរអាជីពជាតារាចម្រៀង ។
ពលរដ្ឋឱ្យដឹងបន្ដទៀតថា ទីតាំង បញ្ជល់មាន់ក្នុងព្រៃម៉ុងខ្មោចខាងលើ មានបង្កប់ទៅដោយល្បែង បៀ អាប៉ោង ដែលអ្នកភូមិស្គាល់ច្បាស់ឈ្មោះក្រឹម ជាមេខ្លោង ដែលរស់នៅភូមិក្បែរនោះ ។ វង់ល្បែងស៊ីសងទាំងនោះហាក់បីដូចជា មានសេចក្ដីសុខណាស់ ខណៈដែលសមត្ថ កិច្ចមិនទាន់ហ៊ានបង្ក្រាបឬមើលមិន ឃើញក៏មិនដឹង ។
ចំណែកពលរដ្ឋនៅក្នុងភូមិព្រៃព្រីង ទាំងត្បូងទាំងជើង សង្កាត់ចោមចៅ វិញបានឱ្យដឹងថា នៅក្នុងមូលដ្ឋានកើត មានល្បែងស៊ីសងខុសក្រៅពីកត់ឆ្នោត មានកន្លែងចាក់បាល់ចំនួន២ធំៗបើក បម្រើសេវាកម្ម២៤ម៉ោងលើ២៤ម៉ោង គ្មានញញើតអាជ្ញាធរឬសមត្ថកិច្ចថ្នាក់ តូចតាចឡើយ ដែលជ្រកក្រោមស្លាក អ៊ីនធើណេតប្រកបទៅដោយភាពរលូន គ្មានសមត្ថកិច្ចនិងអាជ្ញាធរណាហ៊ាន ក្អក ឡើយ ។
ពលរដ្ឋបានឱ្យដឹងផងដែរថា ទោះជា អាជ្ញាធរគ្រប់លំដាប់ថ្នាក់ ដាក់ពង្រាយ ស្លាកផ្ទាំងប៉ាណូផ្សព្វផ្សាយពីគោលនយោ បាយទាំង៩យ៉ាងរបស់ភូមិ-សង្កាត់-ឃុំ មានសុវត្ថិភាពយ៉ាងណាក៏ដោយក្នុង នោះចំណុចទី៥ដែលបញ្ជាក់ថា គ្មានការ លេងល្បែងស៊ីសងខុសច្បាប់គ្រប់ប្រភេទ កើតមានក្នុងមូលដ្ឋាន ដើម្បីដាក់ ពង្រឹង និងរក្សាបាននូវសន្ដិសុខ សុវត្ថិភាព ជូន ប្រជាពលរដ្ឋក្នុងមូលដ្ឋាន ផ្ទុយទៅវិញ ល្បែងស៊ីសងខុសច្បាប់ រីកផុសផុលទាំង តូចទាំងធំ តែបើការបង្ក្រាបវិញហាក់បី ដូចជាស្រួចស្រាល់ជាទីបំផុតរហូតដល់ពលរដ្ឋលើកឡើងថា ចាប់បានតែតូចៗ រីឯទីតាំងធំៗចាប់មិនទាន់បាន ខណៈ ដែលដាក់ប្រទាក់ក្រឡាមិនត្រូវ ឬមិន ហ៊ានបង្ក្រាបមិនត្រឹមតែមានកើត ប៉ុណ្ណោះទេនៅមានជាច្រើនមុខជាច្រើនកន្លែងទៀតរាប់មិនអស់ទូទាំងខណ្ឌពោធិ៍ សែនជ័យ ៕
ដោយ៖ ហេង សូរិយា
