ភ្នំពេញ៖ បុរសម្នាក់បានស្លាប់ និងរបួសធ្ងន់ ខណៈដែលជិះម៉ូតូឌុបគ្នាទៅធ្វើការ ត្រូវបានរថយន្តក្រុង របស់ក្រុមហ៊ុនវុឌ្ឍន៍ សុភាព បុកចំពាក់កណ្តាលពេញទំហឹងកាលពីម៉ោង ៦ និង ៣០នាទីព្រឹកថ្ងៃទី ២៥ ខែមករា ឆ្នាំ ២០១៦ នៅចំនុចផ្លូវលេខ ១៩៦៦កែង ១០១១ ក្រុម៤ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
អ្នកស្លាប់ឈ្មោះ ខាន់ សារ៉ាន់ ភេទប្រុស អាយុ៣១ ឆ្នាំ មុខរបរ សន្តិសុខ ស្នាក់នៅភូមិ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។ និងមានស្រុកកំណើតនៅភូមិត្រពាំងចិកសា ឃុំជ្រៃបាក់ ស្រុករលៀប្អៀ ខេត្តកំពង់ឆ្នាំង។
ចំណែកអ្នករងរបួសធ្ងន់ ឈ្មោះ ចាន់ រិទ្ធិ ភេទប្រុស អាយុ ៤២ ឆ្នាំ មុខរបរសន្តិសុខឯកជន ស្នាក់នៅភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ។
ចំណែកតៃកុងរថយន្ត ឈ្មោះ អោម ទី ភេទប្រុសអាយុ ៣០ឆ្នាំ ក្នុងកាហ្គារាសក្រុមហ៊ុន នៅម្តុំផ្សារដើមគរ។ មានស្រុកកំណើតនៅភូមិដូង ឃុំស្ទោង ស្រុកស្ទោង ខេត្តកំពង់ធំ។
ប្រភពពីកន្លែងកើតហេតុបានអោយដឹងថា នៅមុខពេលកើតហេតុគេឃើញមាន បុរសពីរម្នាក់ជិះម៉ូតូហុនដាឌ្រីម ពណ៌ខ្មៅ សេរី២០១៥ មានស្លាកលេខ ភ្នំពេញ 1FJ-8326 ក្នុងទិសដៅពីកើតទៅលិចតាមបណ្តោយផ្លូវ ១៩៦៦ ខណៈឆ្លងជិតផុត ស្រាប់តែមានរថយន្តក្រុងពណ៌ស ឆ្នោតខៀវ ម៉ាក់ KIA ពាក់ស្លាកលេខភ្នំពេញ 3C-9288 ជារបស់ក្រុមហ៊ុនវុឌ្ឍន៍ សុភាព បើកបរតាមបណ្តោយផ្លូវលេខ១០១១ ក្នុងទិសដៅពីជើងទៅត្បូង មកដល់ចំនុចខាងលើបានបុកម៉ូតូចំពាក់កណ្តាលពេញទំហឹង ខ្ទាតម៉ូតូ និងមនុស្សជាង ១០ម៉ែត្របណ្តាលអោយរងរបួសធ្ងន់ដេកសន្លប់ស្តូកស្តឹងទាំងពីរនាក់នៅកន្លែងកើតហេតុ។
ប្រភពបានបន្តថា ក្រោយពីកើតហេតុ មានរថយន្តសង្គ្រោះបន្ទាន់ឯកជន១គ្រឿងបានមកលើកជនរងគ្រោះតែម្នាក់ដាក់លើរថយន្ត ហើយត្រូវបានប្រជាពលរដ្ឋរារាំងអោយលើកអ្នក បួសទៅទាំងពីរនាក់ ក្រោយមកត្រូវបានអ្នក បើករថយន្តសង្គ្រោះ បានទម្លាក់អ្នករបួសខាងលើចុះមកវិញ។ មួយសន្ទុះក្រោយមកក៏មានរថយន្តសង្គ្រោះមួយគ្រឿងទៀតមកដល់និងលើកអ្នករបួសតែម្នាក់ទៅបាត់បន្សល់ទុកបុរសម្នាក់សល់ដង្ហើមចង្រិតរហូតដល់ដាច់ខ្យល់ ស្លាប់នៅនិងកន្លែងយ៉ាងអាណោចអធម។
ទាក់ទងនឹងរថយន្តសង្គ្រោះទាំងពីរខាងលើត្រូវបានប្រជាពលរដ្ឋអះអាងថា រថយន្តទី១ ជារបស់មន្ទីរពេទ្យ ឃឹម រ៉ានីទួលគោក ទី ២ របស់មន្ទីរពេទ្យ IU សែនសុខ។
បច្ចុប្បន្នសពបានប្រគល់អោយសាច់ញាតិយកទៅធ្វើបុណ្យតាមប្រពៃណី ចំណែកអ្នករងបួសធ្ងន់កំពុងសង្គ្រោះបន្ទាន់នៅបន្ទីរពេទ្យ ព្រះកុសុមៈ ដោយឡែករថយន្តបង្ក និងម៉ូតូ និងអ្នកបើកបរត្រូវបានបញ្ជូនទៅការន់ការិយា ល័យចរាចរណ៍គោករាជធានីភ្នំពេញ៕
ដោយ៖ តុង សីហា
