ខេត្តសៀមរាប៖ បើតាមការបញ្ជាក់ពីលោក អ៊ឹម សុខរិទ្ធី បុរាណវិទូ និងជាប្រធាននាយកដ្ឋានអភិរក្សប្រាសាទក្នុងឧទ្យាន អង្គរ និងបុរាណវិទ្យាបង្ការ កាលពីថ្ងៃទី២៤ ខែមិថុនា ឆ្នាំ២០២០ គឺមាន អ្នកជំនាញអាជ្ញាធរជាតិអប្សរាប្រទះឃើញ ភាសាសំស្រ្កឹតនៅលើថ្មមួយផ្ទាំង ពេលដែលមន្រ្តីរើថ្មដើម្បីដំណើរការជួសជុលប្រាសាទទន្លេស្ងួត។
លោក អ៊ឹម សុខរិទ្ធី បុរាណវិទូ និងជាប្រធាននាយកដ្ឋានអភិរក្សប្រាសាទក្នុងឧទ្យាន អង្គរ និងបុរាណវិទ្យាបង្ការបានឱ្យដឹងថា នៅពេលដែលមន្រ្តីជំនាញអាជ្ញាធរជាតិអប្សរារើថ្ម ដើម្បីដំណើរការជួសជុលប្រាសាទទន្លេស្ងួត ក៏បានប្រទះឃើញភាសាសំស្រ្កឹតថ្មីនៅលើថ្មមួយផ្ទាំង ដែលតាមការកត់សម្គាល់តាមប្រភេទ និងតួអក្សរនេះ ជំនាញសន្និដ្ឋានជំហានដំបូងថា ជាភាសាសំស្រ្កឹត ដែលចារនៅចុងសតវត្សរ៍ទី១១ និងដើមសតវត្សរ៍ទី១២ ប៉ុន្តែភាសាសំស្រ្កឹត និងថ្មនេះ គឺមិនមែនជារបស់ប្រាសាទទន្លេស្ងួតទេ បើតាមការសិក្សាស្រាវជ្រាវ ភាសាសំស្រ្កឹត និងថ្មនេះមានអាយុកាលមុនការកសាងទន្លេស្ងួតនេះ ប៉ុន្តែប្រហែលនៅពេលសាងសង់ទន្លេស្ងួតខ្វះថ្ម ទើបគេយកថ្មដែលមានជាប់ភាសាសំស្រ្កឹតនេះ ពីតំបន់ផ្សេងមកបន្ថែម។
លោក អ៊ឹម សុខរិទ្ធី បានបន្តថា៖ ពេលនេះយើងមិនទាន់ដឹងថា ភាសាសំស្រ្កឹតនេះ និយាយអំពីអ្វីនៅឡើយទេ ដោយរងចាំអ្នកជំនាញខាងភាសាសំស្រ្កឹតធ្វើការបកប្រែសិន តែទោះជាយ៉ាងណា នេះជាវត្ថុតាំងមួយថ្មីទៀតដែលឱ្យអ្នកជំនាញបានសិក្សា និងទទួលបាន ព័ត៌មានថ្មីៗទៀតពាក់ព័ន្ធប្រវត្តិសាស្រ្តខ្មែរ។
បច្ចុប្បន្ននេះ ផ្ទាំងថ្មដែលមានភាសាសំស្រ្កឹតនេះ ត្រូវបានយកមករក្សាទុកនៅអាជ្ញាធរ ជាតិអប្សរាជាបណ្តោះអាសន្ន ដើម្បីសម្អាត និងដើម្បីឱ្យអ្នកជំនាញធ្វើការសិក្សាសា្រវ ជ្រាវបន្ត៕
ដោយ៖ សហការី
