ខេត្ដសៀមរាប៖ សកម្មភាពប្រព្រឹត្ដ បទល្មើសជលផលកើតឡើងពេញបន្ទុក តែរដ្ឋបាលជលផលដំដែកហាក់គ្មានវិធានការទប់ស្កាត់បង្ក្រាបបទល្មើសដែល ករណីនេះត្រូវបានគេដឹងថា មានការ ឃុបឃិតគ្នារវាងកម្លាំងសហគមន៍ នឹង រដ្ឋបាលជលផលជាអ្នកបើកភ្លើងខៀវ ទើបណ្ដោយឱ្យមានការដាក់ឆ្នុកនិងរុញស៊ីបកើតឡើងមិនតិចជាង៤០០ឆ្នុក នៅកណ្ដាលទន្លេ ។
ប្រភពពីប្រជាពលរដ្ឋបានឱ្យដឹងថា កានេសាទដោយការរុញស៊ីបបែបនេះ បានកើតឡើងជារៀងរាល់ថ្ងៃ ចាប់ពីឃុំ កំពង់ឃ្លាំងដល់ភូមិមាត់ខ្លា និងភូមិស្ទឹង ជ្រៅក្នុងភូមិសាស្ដ្រឃុំអន្លង់សំណ ស្រុក ជីក្រែង ខេត្ដសៀមរាប ក្នុងនោះការ ដាក់ឆ្នុក និងរុញស៊ីបលើផ្ទៃទឹកប្រមូល យកត្រីដោយប្រើប្រាស់ឧបករណ៍ខុស ច្បាប់សង្ស័យថា មានការបើកភ្លើង ខៀវពីសំណាក់នាយសង្កាត់រដ្ឋបាលជលផល ដែលបណ្ដែតបណ្ដោយឱ្យមានការ ដាក់រុញស៊ីបនៅពេលយប់ ដោយមិន មានការខ្លាចញញើតច្បាប់ក៏ដូចជាបទបញ្ជារបស់រាជរដ្ឋាភិបាលនោះឡើយ ។
ប្រភពដដែលបានអះអាងថា ការ ប្រព្រឹត្ដបទល្មើសរុញស៊ីបគឺយកត្រីទាំង នោះមកកិនជាចំណីកូនត្រីឆ្ដោ ដែល មានចិញ្ចឹមយ៉ាងអនាធិបតេយ្យក្នុង ភូមិស្ទឹងជ្រៅនេះបានចិញ្ចឹមកូនត្រីឆ្ដោ ក្នុង១ផ្ទះ២ទៅ៣ស្រះ ។ ពួកគាត់ថា បើនៅតែបែបនេះទៀត មិនយូរមិន ឆាប់ទេពូជត្រីទាំងឡាយនឹងត្រូវវិនាសហិនហោចជាមិនខាន ។ ហេតុនេះពួក គាត់បានសំណូមពរឱ្យអាជ្ញាធរពាក់ព័ន្ធ ជាពិសេសរដ្ឋបាលជលផល ដែលមាន លោករឹមសំអុន ជាអ្នកគ្រប់គ្រងគួរ ចាត់វិធានការឱ្យបានរួសរាន់ដើម្បីទប់ស្កាត់ឱ្យបានទាន់ពេលវេលាជៀសវាង ក្របីចូលផឹកស៊ីទើបធ្វើរបង ៕
ដោយ៖ ប៊ុន រិទ្ធី
