ភ្នំពេញ៖ នៅព្រឹកថ្ងៃអង្គារ ១០កើត ខែពិសាឍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី៣០ ខែមិថុនា ឆ្នាំ២០២០នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ បានអញ្ជើញដឹកនាំកិច្ចប្រជុំឆ្លងសេចក្ដីព្រាងផែនការសកម្មភាពឆ្នាំ២០២០ របស់អគ្គនាយកដ្ឋានភស្តុភារ និងហិរញ្ញវត្ថុ នៅទីស្ដីការក្រសួងមហាផ្ទៃ។
ក្រោមអធិបតីភាពសម្ដេចក្រឡាហោមឧបនាយករដ្ឋមន្រ្តី កិច្ចប្រជុំនេះ មានការអញ្ជើញចូលរួមពីលោក លោកស្រីរដ្ឋលេខាធិការ អនុរដ្ឋលេខាធិការ អគ្គនាយក និងអស់លោក លោកស្រី ជាថ្នាក់ដឹកនាំ និងមន្រ្តីនៃអគ្គនាយកដ្ឋានភស្តុភារ និងហិរញ្ញវត្ថុ ព្រមទាំងមន្រ្តីនៃអគ្គនាយកដ្ឋាន និងអង្គភាពចំណុះក្រសួងមហាផ្ទៃមួយចំនួនទៀត។
សេចក្ដីព្រាងផែនការសកម្មភាពឆ្នាំ២០២០ របស់អគ្គនាយកដ្ឋានភស្ដុភារ និងហិរញ្ញវត្ថុ មានភាពប្រទាក់ក្រឡាគ្នា ដើម្បីសម្រេចបាននូវចក្ខុវិស័យនៃផែនការយុទ្ធសាស្រ្ត សំដៅចូលរួមគាំទ្រដល់គ្រប់កិច្ចប្រតិបត្តិការ ការគ្រប់គ្រងរដ្ឋបាលដែនដី ការថែរក្សាសន្តិភាព ស្ថេរភាពនយោបាយ សន្តិសុខសណ្ដាប់ធ្នាប់សាធារណៈ ដើម្បីលើកកម្ពស់ការផ្ដល់សេវាសាធារណៈ និងការអភិវឌ្ឍ។
នាយឧត្តមសេនីយ៍ សេង យូអ៊ាន់ អគ្គនាយកនៃអគ្គនាយកដ្ឋានភស្ដុភារ និងហិរញ្ញវត្ថ បានធ្វើរបាយការណ៍ជូនសម្ដេច ព្រមទាំងអង្គពិធីថាបន្ទាប់ពីបានរៀបចំកិច្ចប្រជុំពិភាក្សាកម្រិតបច្ចេកទេសផ្ទៃក្នុង អគ្គនាយកដ្ឋាន នាយកដ្ឋាន អង្គភាពចំណុះ និងបានប្រជុំឆ្លងថ្នាក់ដឹកនាំរដ្ឋលេខាធិការទទួលបន្ទុករួចមក សេចក្ដីព្រាងផែនការនេះបានដាក់ចេញនូវយុទ្ធសាស្រ្តចំនួន៥ ចង្កោមសកម្មភាពចំនួន២០ សកម្មភាព១០៥ និងសូចនាករ១៥៩។
យុទ្ធសាស្រ្តទាំង៥នៃសេចក្ដីព្រាងផែនការកម្មភាពនេះ រួមមាន ការពង្រឹង និងបង្កើនប្រសិទ្ធភាពការដឹកនាំធនធានមនុស្ស និងកិច្ចសហប្រតិបត្តិការ, ពង្រឹង និងបង្កើនប្រសិទ្ធភាពលើការគ្រប់គ្រងហិរញ្ញវត្ថុសាធារណៈ, ពង្រឹង និងបង្កើនប្រសិទ្ធភាពការងារផ្គត់ផ្គង់ភស្តុភារ និងការសិក្សា ស្រាវជ្រាវឧបករណ៍បច្ចេកទេស, ពង្រឹង និងកែលម្អយន្តការការអប់រំផ្សព្វផ្សាយព័ត៌មាន និងបង្កើនប្រសិទ្ធភាពសេវាសុខាភិបាល និងការពង្រឹងគុណភាពសំណង់ និងវិស្វកម្ម។
នៅក្នុងកិច្ចប្រជុំនោះដែរ លោកអគ្គនាយកក៏បានបន្តរាយការណ៍ជូនសម្ដេច ព្រមទាំងអង្គពិធីការអនុវត្តផែនការកាត់សន្សំចំណាយរបស់ក្រសួងមហាផ្ទៃនៅក្នុងបរិបទនៃការរីករាលដាលជំងឺកូវីដ១៩ តាមការណែនាំរបស់រាជរដ្ឋាភិបាលដែរ ក្នុងនោះរួមមានការកាត់សន្សុះលើចំណាយប្រេងឥន្ធនៈ និងប្រេងរំអិល, សម្ភារការិយាល័យ និងសម្ភារបរិក្ខាបច្ចេកទេសព័ត៌មានវិទ្យា, សម្ភារ និងបរិក្ខាបច្ចេកទេសមិនមែនព័ត៌មានវិទ្យា សង្ហារឹម និងសម្ភារប្រើប្រាស់។
ការកាត់សន្សំចំណាយរបស់ក្រសួងមហាផ្ទៃ ក៏បានផ្ដោតទៅលើមុខសញ្ញាមួយចំនួនទៀតដែរ ដូចជាសោហ៊ុយបណ្ដុះបណ្ដាលក្នុង និងក្រៅប្រទេស កិច្ចប្រជុំសិក្ខាសាលា សន្និសីទ ការឃោសនា និងផ្សព្វផ្សាយព័ត៌មានសាធារណៈ, ការតាំងពិពណ៌ក្នុង និងក្រៅប្រទេស, សោហ៊ុយទទួលភ្ញៀវជាតិ និងភ្ញៀវបរទេស, ការទិញវត្ថុអនុស្សាវរិយ៍, បេសកម្មក្នុងប្រទេស និងក្រៅក្រទេស, ព្យួរការចំណាយទិញរថយន្តសម្រាប់បំរើការងារដ្ឋបាល លើកលែងតែរថយន្តអគ្គិភ័យ និងដឹកឱសថ។
បន្ទាប់មក សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញមានប្រសាសន៍ទៅកាន់អង្គប្រជុំ ដោយនៅក្នុងឱកាសនោះ សម្ដេចបានថ្លែងនូវការអរគុណ កោតសរសើរ និងវាយតម្លៃខ្ពស់ ចំពោះថ្នាក់ដឹកនាំ រដ្ឋលេខាធិការ អនុរដ្ឋលេខាធិការ និងអគ្គនាយកទទួលបន្ទុកអង្គភាពនីមួយៗដែលបានខិតខំប្រឹងប្រែងរៀបចំផែនការយុទ្ធសាស្រ្ត៥ឆ្នាំ និងផែនការសកម្មភាពប្រចាំឆ្នាំ។
សម្ដេចបានបន្តថា«ផែនការសកម្មភាពនេះ ជាផែនទីដ៏សំខាន់ដើម្បីដឹកនាំគ្រប់គ្រងការងារតាមតួនាទី និងភារកិច្ចរបស់ខ្លួន និងបានចាត់ទុកជាលក្ខខណ្ឌនៃការដឹកនាំ ការគ្រប់គ្រង មិនអាចខ្វះបាន ព្រោះប្រសិនណាបើការដឹកនាំគ្រប់គ្រង់ដោយគ្មានផែនការ និងកម្មវិធីបានច្បាស់លាស់ទេនោះ យើងនឹងមិនអាចសម្រេចបានលទ្ធផលល្អទេ ប៉ុន្តែពេលនេះយើងមានគ្រប់គ្រាន់ហើយ នៅសល់តែការចាត់ចែងអនុវត្តប៉ុណ្ណោះ»។
សម្ដេចក៏បានសម្ដែងក្ដីសង្ឃឹមជឿជាក់ថាគ្រប់អគ្គនាយកដ្ឋាន ក៏ដូចជាថ្នាក់ដឹកនាំទទួលបន្ទុកនៅតាមអគ្គនាយកដ្ឋាននីមួយៗ នឹងបន្តខិតខំប្រឹងប្រែងដើម្បីកសាងអង្គភាពរបស់ខ្លួនឱ្យមានស្នាដៃកាន់តែច្រើនក្នុងការចូលរួមចំណែកគ្រប់គ្រងប្រទេសជាតិក្នុងវិស័យដែលខ្លួនទទួលខុសត្រូវ។ សម្ដេចបានមានប្រសាសន៍ថា«លក្ខណៈពិសេសឬបញ្ហាសំខាន់របស់អគ្គនាយកដ្ឋានភស្តុភារ និងហិរញញ្ញវត្ថុ ក៏ដូវជាខាងសវនកម្មដែរ ពិសេសខាងភស្តុភារនេះ គឺភាគច្រើនការងារនេះរដ្ឋមន្រ្តីបានដឹកនាំប្រចាំថ្ងៃច្រើន»។
សម្ដេចបានមានប្រសាសន៍ថាសម្ដេចមានភាពជឿជាក់ និងមានទំនុកចិត្តទៅលើមន្រ្តីដែលសម្ដេចបានប្រគល់ភារកិច្ច ដោយសម្ដេចបានសង្កត់ធ្ងន់ទៀតថា«ពីព្រោះបើយើងមិនជឿជាក់ យើងកុំប្រើគេ! ចំណុចនេះសំខាន់ណាស់! ខ្ញុំចង់ទាមទារមកវិញថាឥលូវ ខ្ញុំជឿជាក់ ប៉ុន្តែធ្វើម៉េចកុំឱ្យមិនជឿជាក់ខ្ញុំ បានន័យថាយើងកុំធ្វើអ្វីតាមនឹកឃើញ ឬឈរលើផលប្រយោជន៍នេះនោះ! ដូច្នេះសូមយកចិត្តទុកដាក់ ព្រោះបញ្ហានេះសំខាន់ណាស់»។
ដោយឡែក សម្ដេចឧបនាយករដ្ឋមន្រ្តី ក៏បានគូសបញ្ជាក់ដែរថាកិច្ចការធំក្នុងការងារកំណែទម្រង់ស្ថាប័ន គឺនៅសល់បញ្ហាការវិភាគមុខងារ និងការកំណត់ក្របខណ្ឌ ដែលជារឿងស្មុគស្មាញ និងប្រឈមច្រើន ហើយទាមទារមិនឱ្យមានការដោះស្រាយប្រកបដោយការយកចិត្តាទុកដាក់។ ក្រៅពីនេះគឺការយកចិត្តទុកដាក់លើការជំរុញលិខិតបទដ្ឋានគតិយុត្តទាំងឡាយដែលនៅសេសសល់ ដូចជាការងារអត្តសញ្ញាណកម្ម កិច្ចការនគរបាល និងកិច្ចការគ្រប់គ្រងព័ត៌មានវិទ្យាជាដើម៕
ដោយ៖ សហការី
