ខេត្តកំពង់ឆ្នាំង៖ កូនក្រមុំដែលរត់ចោលរោងការ ក្នុងថ្ងៃសូត្រមន្ត ពេលនេះបានវិលត្រឡប់មកក្រាបសំពះសុំទោសម្តាយ និង ឪពុករបស់ខ្លួនវិញហើយ កាលពីថ្ងៃទី២៥ ខែមករា ឆ្នាំ២០១៦ បន្ទាប់ពីកូនក្រមុំរូបនេះបានគេចខ្លួនអស់រយៈពេល៣ថ្ងៃ ទៅជាមួយនិងគូកំណាន់របស់ខ្លួន ។
ស្ត្រីឈ្មោះផាន់ សិរី អាយុ៣៩ឆ្នាំត្រូវជាម្តាយ បានរៀបរាប់អោយដឹងថា ក្រោយពីសារព័ត៌ក្នុងស្រុកបានចុះផ្សាយពី ការបានខ្លួនកូនស្រី ដែលជាកូនក្រមុំត្រៀមចូលរោងការនោះ កូនស្រីរបស់គាត់បានត្រឡប់មកដល់វិញហើយ បន្ទាប់ពីគាត់បានអំពាវនាវដល់កូនអោយត្រឡប់មកផ្ទះដោយមិនប្រកាន់ទោសពៃ។
ស្ត្រីជាម្តាយបានប្រាប់ទៀតថា កាលពីថ្ងៃទី២៥ ខែមករា វេលាម៉ោងជាង៧ព្រឹក កូនស្រីរបស់គាត់បានមកក្រាបសុំទោស ពីកំហុសឆ្គងរបស់ខ្លួនដែលប្រព្រឹត្តខុសកាលពីថ្ងៃទី២៣ មករា ដោយបានរត់ចោលរោងការ ។
នៅចំពោះមុខម្តាយ កញ្ញា សុខសិរីវឌ្ឍន៍ ដែលកូនក្រមុំបានគេចខ្លួនថ្ងៃចូលរោងការនោះបានក្រាបសំពះសុំទោស ដោយក្តីអាណិតមេត្តាពីម្តាយ និង ឪពុក អំពីទង្វើដែលមិនគួរ គប្បីធ្វើអោយញាតិផងគេស្តីថា ។ មូលហេតុដែលនាងរត់ចោលរោងការ គឺដោយសារតែនាងមានទំនាក់ទំនងស្នេហ៍ជាមួយនឹងបុរសឈ្មោះ ទក នេះទើបនឹងបានរយៈពេលជាង១ខែប៉ុណ្ណោះ ហើយបានស្រឡាញ់គ្នា ហើយក៏បានសម្រេចចិត្តរត់ចោលរោងការតែម្តង ។
ស្ត្រីជាម្តាយបានប្រាប់បន្តថា បើទោះបីជាកំហឹងខឹងពុះកញ្ជ្រោលយ៉ាងណា ប៉ុន្តែដោយក្តីមេត្តា ក្នុងនាមជាម្តាយនឹងឪពុកបានរំងាប់អារម្មណ៍ ដែលម្តាយគ្រប់រូបតែងសណ្តោសកូនគ្រប់ពេលវេលា នៅពេលដែលកូនបានទទួលកំហុស និងបានមកក្រាបសំពះចំពោះមុខឪពុក ម្តាយសុំទោសនេះ ។
ក្នុងរយៈពេល៣ថ្ងៃដែលកូនស្រីរបស់គាត់ដែលរត់ចោលរោងការនោះគឺបានទៅជាមួយនឹងបុរសម្នាក់ ឈ្មោះ ទក ហៅយ៉ា ដែលជាអ្នកធ្វើការនៅរោងចក្រ អឹម និង វ៉េជាមួយគ្នា ដែលក្នុងអំឡុងពេលនោះនាង(កូនស្រី) បានទៅភ្នំពេញ ។
ម្តាយកូនក្រមុំបានប្រាប់ទៀតថា គាត់មិនប្តឹងផ្តល់ចំពោះបុរសឈ្មោះទក ហៅយ៉ា នោះទេ ដោយគ្រាន់តែសម្រុះសម្រួលគ្នា អោយបុរសដែលនាំកូនស្រីចេញថ្លៃបណ្តាការ ដែលកូនកម្លោះប្រគល់ជូនគាត់ចំនួន២០០០ដុលា្លរប៉ុណ្ណោះ ហើយនឹងរកពេលវេលាសម ស្របណាមួយដើម្បីរៀបចំផ្សំផ្គុំ កូនស្រីរបស់គាត់ជាមួយនឹងបុរសឈ្មោះទក ដែលនាំកូនគាត់ចេញពីរោងការ ។
ស្ត្រីនេះបានប្រាប់ទៀតថា ចំណែកឯកភាគីកូនកំលោះដែលត្រៀមខ្លួនជាស្រេចសម្រាប់ចូលរោងការនោះ ក៏មិនបានប្តឹងផ្តល់អ្វីដែរ គ្រាន់តែទាមទារ នូវជំនូនបណ្តាការដែលប្រគល់ចំនួន២០០០ដុល្លារតែប៉ុណ្ណោះ។
ជាចុងក្រោយម្តាយកូនក្រមុំក៏បានសំណូមពរ សូមកុំអោយកូនសាងកំហុសបែបនេះតទៅទៀត ព្រោះវាធ្វើអោយកិត្តិយស កិត្តិនាមក្រុមគ្រួសារនឹងរលាយសាបសូន្យតែមួយប៉ព្រឹចភ្នែក នូវទង្វើមិនគប្បីរបស់កូនដែលបានសាងអោយក្រុមគ្រួសារ ហើយសូមអោយកូនធ្វើអ្វីគោរពតាមប្រពៃណី និង តាមការណែនាំរបស់ម្តាយនិងឪពុក ៕
ដោយ៖ ចន្ថា
