អន្តរជាតិ៖ អាជ្ញាធរអាកាសចរណ៍ស៊ីវិលវៀតណាម (CAAV) នៅថ្ងៃទី២៩ ខែមិថុនាម្សិលមិញនេះ បានបញ្ជាឲ្យផ្អាកការងាររបស់អ្នកបើកបរយន្តហោះ ដែលកំពុងធ្វើការឲ្យអាកាសចរណ៍វៀតណាមទាំងអស់ ដែលកំពុងបម្រើការក្នុងតាមអាកាសចរណ៍ក្នុងស្រុក ។ ក្រោយមានការផ្ទុះឡើងក្ដីបារម្ភពីសុវត្ថិភាពផ្លូវអាកាស បន្ទាប់ពីសមាគមដឹកជញ្ជូនផ្លូវអាកាសអន្តរជាតិ (IATA) រកឃើញភាពមិនប្រក្រតីក្នុងការចេញអាជ្ញាបណ្ណបើកបរយន្តហោះរបស់អាកាសចរណ៍ប៉ាគីស្ថានអន្តរជាតិ។
យោងតាមប្រធានអាជ្ញាធរអាកាសចរណ៍វៀតណាម បាននិយាយថា ការដកបញ្ឈរជើងនេះ គឺជាវិធានការទប់ស្កាត់របស់ក្រុងហាណូយផងដែរ ក្រោយរកឃើញបញ្ហាក្នុងការចេញអាជ្ញាបណ្ណបើកបរយន្តហោះក្នុងចំណោមអ្នកបើកជនជាតិប៉ាគីស្ថាន។ ចំណែកនៅប៉ាគីស្ថានអ្នកបើកបរយន្តហោះចំនួន២៦២នាក់ ត្រូវបានដករួចហើយ។
ក្នុងសេចក្ដីថ្លែងការណ៍របស់ខ្លួន CAAV ការព្យួរការងារនេះ នឹងមានសុពលភាពរបស់រហូតដល់មានការជូនដំណឹងជាថ្មី។ ជាមួយនេះវៀតណាម ក៏បានទាក់ទងជាមួយប៉ាគីស្ថានដើម្បីតាមដានប្រវត្តិរូបអ្នកបើកបរដែលធ្វើការនៅវៀតណាម។
សូមជម្រាបថា អ្នកបើកបរយន្តហោះសញ្ជាតិប៉ាគីស្ថាន២៧នាក់ បានបំពេញការងារនៅវៀតណាម។ ក្នុងចំណោមនេះ ១២នាក់ កំពុងបំពេញការងារ ហើយ១៥នាក់ទៀត កំពុងសម្រាកដោយសារ COVID-19 ។ ម្នាក់ក្នុងចំណោម១២នាក់ បើកយន្តហោះឲ្យអាកាសចរណ៍Jetstar Pacific ឯ១១នាក់ទៀត ធ្វើនៅអាកាសចរណ៍ Vietjet ។ អាកាសចរណ៍ជាតិរបស់វៀតណាម Vietnam Airlines និង Bamboo Airways មិនបានជួលអ្នកបើកបរយន្តហោះប៉ាគីស្ថានឡើយ។ នេះជាការបញ្ជាក់របស់ CAAV ។
គួរបញ្ជាក់ថា កាលពីសប្ដាហ៍មុន ប៉ាគីស្ថាននិយាយថា ខ្លួននឹងបញ្ឈរជើងអ្នកបើកបរយន្តហោះ២៦២នាក់ ដែលសង្ស័យថា បានបន្លំអាជ្ញាបណ្ណបើកបររបស់ពួកគេ ។ ដោយឡែកអាជ្ញាធរអាកាសចរណ៍វៀតណាម គូសបញ្ជាក់ថា សព្វថ្ងៃនេះ វៀតណាមមានអ្នកបើកបរចំនួន១២៦០នាក់ហើយពាក់កណ្ដាល ជាជនបរទេស ៕ ដោយ៖ស តារា
