ខេត្តកណ្តាល៖ នៅថ្ងៃទី ០២ ខែកក្កដា ឆ្នាំ២០២០ កម្លាំងសមត្ថកិច្ច របស់ គណៈម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) បានចុះបង្ក្រាបទីតាំងសិប្បកម្ម លីងកាហ្វេ និងសណ្តែក យីហោ ឈ្មោះថុន ណាត ដែលអន់គុណភាព និងខុសច្បាប់ ស្ថិតនៅភូមិត្រពាំងខ្ទឹម ឃុំក្រាំងម្កាក់ ស្រុកអង្គស្នួល ខេត្តកណ្តាល ។ ការចុះបង្ក្រាបនេះ មានការសម្របសម្រួលដោយលោក ឯក ស៊ុន រស្មី ព្រះរាជអាជ្ញារង នៃអយ្យការអមសាលាដំបូងខេត្តកណ្តាល និងមានការចូលរួមពីសមត្ថកិច្ចពាក់ព័ន្ធ អាជ្ញាធរដែនដី និងតំណាងមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកណ្តាល។ ក្រោយពីការចុះត្រួតពិនិត្យ គណៈកម្មាធិការអន្តរក្រសួង របស់ គ.ប.ផ.ក. បានរកឃើញផលិតផលអន់គុណភាព និងខុសច្បាប់ជាច្រើនមុខរួមមាន ៖
១-គ្រាប់សណ្តែកសៀង ចំនួន៦០បាវ, ២-គ្រាប់កាហ្វេលេខ១ ចំនួន០៦បាវ, ៣-គ្រាប់កាហ្វេលេខ២ ចំនួន១០បាវ, ៤-កាហ្វេលីងរួច ចំនួន០៦បាវ, ៥-ម៉ាស៊ីនលាយប៊ឺ ចំនួន០១គ្រឿង, ៦-ម៉ាស៊ីនលាយស្ករ ចំនួន០១គ្រឿង, ៧-កាហ្វេច្រកជាកញ្ចប់រួច ចំនួន៣០កញ្ចប់, ៨-ប៊ឺរ ចំនួន០៦ធុង, ៩-មេក្លិនសំរាប់លាយកាហ្វេ ចំនួន១២ធុង, ១០-ទឹកត្រី ចំនួន០៣កាដុង, ១១-ស្រាស ចំនួន ០១កាន, កាហ្វេផលិតរួច ចំនួន ១៤កញ្ចាប់ (កាហ្វេខ្មែរធម្មជាតិ) ។ ក្នុងនោះក៏មានគ្រឿងសំរាប់លាយកាហ្វេមួយចំនួន៖ ប៊ឺរ, ទឹកស្ករ CARAMEL, មេក្លិនសំរាប់លាយកាហ្វេ, ល័ក្ខពណ៌, ស្ករស, អំបិល, ទឹកត្រី, ស្រាស, ប៊ីចេង, ទឹក,ដោះគោ, សណ្តែកសៀង។
ក្រោយពីការត្រួតពិនិត្យរួច សមត្ថកិច្ចចម្រុះ អន្តរក្រសួង របស់ គ.ប.ផ.ក ពិនិត្យឃើញថាទីតាំងសិប្បកម្ម
លីងកាហ្វេ និងសណ្តែកនេះមានកំហុសជាច្រើន៖
– មិនមានលើកស្លាកយីហោ
-ពុំមានចុះបញ្ជីផលិតផល(ចបផ)
-គ្មានវិញ្ញាបនប័ត្រត្រួតពិនិត្យគុណភាព
-នៅលើសំបកវិចខ្ចប់កាហ្វេមិនមានដាក់អាសយដ្ចាន និងរបៀបប្រើប្រាស់
-នៅលើសំបកវិចខ្ជប់កាហ្វេដាក់កាហ្វេសុទ្ធ១០០% ដែលនៅក្នុងការវិចខ្ជប់នោះលាយសារធាតុផ្សំជាច្រេីន
– ទីតាំងគ្មានអនាម័យ

មន្ត្រីជំនាញបានបញ្ជាក់ថា៖ ក្រៅពីសម្ភារៈវត្ថុតាងខាងលើនេះ សមត្ថកិច្ចពុំបានចាប់យក ឬធ្វើអោយខូចខាតរបស់របរអ្វីទេ ហើយតំណាងអយ្យការបានអនុញ្ញាតឲ្យ សមត្ថកិច្ចចម្រុះ ឃ្លុំបេបិទទីតាំង និងអញ្ជើញម្ចាស់ទីតាំងខាងលើមកបំភ្លឺពាក់ពន្ធ័ករណីខាងលើ នៅលេខាធិការដ្ឋាន នៃគ.ប.ផ.ក. ដើម្បីអនុវត្តតាមនីតិវិធី​ នៃច្បាប់​ ជាបន្តតាមនីតវិធី៕

ដោយ៖ សូរិយា