ភ្នំពេញ៖ រដ្ឋមន្ដ្រីក្រសួងព័ត៌មាន និងជាអ្នកនាំពាក្យរាជរដ្ឋាភិបាលកម្ពុជា លោកខៀវ កាញារិទ្ធី បានលើកឡើងថា អ្នកបើកបររថយន្តរបស់ថ្នាក់ដឹកនាំរដ្ឋាភិបាល មិនសូវយល់ដឹងពីច្បាប់ចរាចរណ៍ ដែលទាមទារឲ្យមានការអប់រំផ្សព្វផ្សាយបន្ថែម ។ ការលើកឡើងបែបនេះ បានធ្វើឡើងក្នុងកិច្ចប្រជុំផ្សព្វផ្សាយច្បាប់ស្ដីពីចរាចរណ៍ផ្លូវគោកអ្នកអ្នកសារព័ត៌មាន និងមន្ដ្រីមន្ទីរព័ត៌មានកាលពីថ្ងៃទី២៦ ខែមករា ឆ្នាំ២០១៦។
លោក ខៀវ កាញារីទ្ធ មានប្រសាសន៍ថា ក្រៅពីការផ្សព្វផ្សាយជូនអ្នកសារព័ត៌មាន ក្រុមការងារផ្សព្វផ្សាយច្បាប់នេះ ក៏ត្រូវតែរៀបចំសិក្ខាសាលាមួយទៀតឲ្យអ្នកបើកបររថយន្តរបស់ថ្នាក់ ដឹកនាំ ដូចជាអ្នកបើកបររថយន្តឲ្យរដ្ឋមន្ត្រី និងអ្នកតំណាងរាស្ត្រ បានចូលក្នុងពិធីផ្សព្វផ្សាយច្បាប់ចរាចរណ៍ផ្លូវគោក ដើម្បីចូលរួមកាត់បន្ថយគ្រោះថ្នាក់ចរាចរណ៍។ ការផ្សព្វផ្សាយនេះ នឹងចូលរួមចែករំលែកដោយអ្នកជំនាញខាងផ្លូវ និងអ្នកបច្ចេកទេសច្បាប់។ លោកថា អ្នកបើកបររថយន្ដឱ្យថ្នាក់ដឹកនាំទាំងអស់ ដោយរាប់ចាប់ពីថ្នាក់ប្រធាននាយកដ្ឋានទៅ ត្រូវតែរៀន និងពន្យល់តៗគ្នា។ ចំណែកអ្នកសារពព័ត៌មាន ក៏ត្រូវតែយល់ច្បាស់ ព្រោះមានបញ្ហាច្រើនណាស់ដែលកើតមាន ព្រោះតែអ្នកសារព័ត៌មានមិនយល់ពីច្បាប់។
ដោយឡែកក្រុមអ្នកសារព័ត៌មានដែលបានចូលរួមក្នុងកិច្ចប្រជុំនោះបានលើកឡើងថា វាជារឿង សំខាន់ណាស់ ដែលអ្នកសារព័ត៌មានត្រូវតែយល់ពីច្បាប់ចរាចរណ៍ ក៏ដូចជាច្បាប់ផ្សេងៗទៀតដែរ។ ការធ្វើបែបនេះ មិនត្រឹមតែជាការបង្កើនចំណេះដឹងដល់បុគ្គលអ្នកសារព័ត៌មានផ្ទាល់តែប៉ុណ្ណោះទេ តែថែមទាំងជាមធ្យោបាយផ្សព្វផ្សាយដ៏មានប្រសិទ្ធភាពដល់មជ្ឍដ្នានទូទៅ ដើម្បីឱ្យពួកគាត់បានយល់កាន់ និងបានដឹងកាន់តែទូលំទូលាយអំពីច្បាប់នេះទៀតផង។
ក្រុមអ្នកសារព័ត៌មានទាំងនោះក៏បានសំណូមពរទៀតថា អង្គភាពជំនាញ គួរតែបង្កើនការផ្សព្វផ្សព្វពីច្បាប់ ដោយការអប់រំអ្នកសារព័ត៌មានឱ្យបានទូលាយ ព្រោះថា អ្នកសារព័ត៌មាន គឺជាអ្នកបញ្ជូនសារដ៏រហ័ស ហើយប្រសិនបើអ្វីដែលពួកគាត់ទទួលបានមិនត្រឹមត្រូវ នោះសារដែលពួកគាត់បញ្ជូនដល់មហាជនក៏ច្បាស់ជាមិនបានច្បាស់លាស់ដែរ។ លើសពីនេះទៀត មិនចំពោះតែច្បាប់ចរាចរណ៍តែប៉ុណ្ណោះទេ ក្រុមអ្នកសារព័ត៌មានថា ថ្នាក់នាំ គួរតែមានវគ្គសិក្ខាសាលាណែនាំ ឱ្យបានច្រើនចំពោះរាល់ច្បាប់ទាំងឡាយដែលបង្កើតថ្មី ឱ្យទូលំទូលាយ។
គួររំលឹកថា របាយការណ៍អគ្គស្នងការដ្ឋាននគរបាលជាតិឆ្នាំ២០១៥ បង្ហាញថា អ្នកទទួលរងគ្រោះថ្នាក់ចរាចរណ៍មានចំនួនជាង ២.២០០នាក់ គិតជាមធ្យមស្លាប់ក្នុងមួយថ្ងៃពី ៥នាក់ទៅ ៦នាក់។ បើប្រៀបធៀបទៅនឹងបណ្ដាប្រទេសក្នុងតំបន់អាស៊ាន កម្ពុជា ប្រឈមនឹងហានិភ័យខ្ពស់ជាងគេ។ ក្នុងចំណោមគ្រោះថ្នាក់មាន៩៤ភាគរយនៃអ្នកបញ្ជាយានយន្ត ពុំគោរព និងពុំសូវយល់ដឹងពីច្បាប់ចរាចរណ៍។ ដោយយោងលើមូលហេតុនេះ រាជរដ្ឋាភិបាលកម្ពុជា ក៏បានអនុម័តបង្កើតច្បាប់ចរាចរណ៍ថ្មី ដែលមានលក្ខណៈតឹងរ៉ឹងជាងមុន ក្នុងបំណងដើម្បីរឹងបន្ដឹងឱ្យអ្នកបើកបរទាំងឡាយ បង្កើនការយកចិត្តទុកដាក់ លើការបញ្ជាយានយន្ដរបស់ខ្លួននៅលើដងផ្លូវ។ ប៉ុន្តែក្រោយពីប្រកាសប្រើប្រាស់ជាផ្លូវការនៃច្បាប់ថ្មីនេះ ក៏មានមានបញ្ហាប្រឈមច្រើន ដែលធ្វើឱ្យប្រជាពលរដ្ឋមានការរួញរាក្នុងការអនុវត្តច្បាប់នេះ។ កត្តានេះ ត្រូវបានអ្នកវិភាគលើកឡើងថា នេះគឺអាចដោយសារតែ ច្បាប់នេះទើបនឹងចេញ ដែលប្រជាពលរដ្ឋគ្រប់រូម ពុំទាន់មានការយល់ដឹងទូលំទូលាយពីច្បាប់នេះ។ ក្រៅពីនេះ ក្រុមអ្នកផ្សព្វផ្សាយទៀតសោត ជាពិសេសអ្នកសារព័ត៌មាន ក៏ហាក់ពុំទាន់ជ្រាបច្បាប់ ដែលអាចជាមូលហេតុ ដែលធ្វើឱ្យការផ្សព្វផ្សាយ ពុំចំខ្លឹមសារច្បាប់ដែលបានចែង ហើយអាចនឹងបង្កឱ្យមានការភាន់ច្រឡំ។
ក្រុមអ្នកវិភាគបានលើកឡើងថា ហេតុនេះ ប្រសិនបើចង់ឱ្យការនុវត្តច្បាប់នេះបានជ្រួតជ្រាបដល់ប្រជាពលរដ្ឋគ្រប់រូប រាជរដ្ឋាភិបាលគួរតែផ្ដល់ការបណ្ដុះបណ្ដាលពីច្បាប់នេះ ដល់អ្នកសារព័ត៌មានផង ដើម្បីឱ្យការផ្សព្វផ្សាយត្រឹមត្រូវតាមខ្លឹមសារដែលបានចែង៕
ដោយ៖ វិបុល
