ភ្នំពេញ៖ យុវជនម្នាក់ត្រូវកម្លាំងកងរាជអាវុធហត្ថខណ្ឌពោធិ៍សែនជ័យឃាត់ខ្លួន តាមពាក្យបណ្ដឹងរបស់ស្ត្រីម្នាក់ ក្នុងបទគំរាមកាប់ប្រហារ ព្រោះតែយុវជនរូបនេះខឹងនឹងស្ត្រីនោះ រារាំងមិនឱ្យកូនស្រីមកស្រឡាញ់រូបគេ ហើយក៏ផឹកស្រវឹង លីដាវទៅគំរាមកាប់តែម្តង ។
ហេតុការណ៍គំរាមសម្លាប់នេះ បានធ្វើឡើងកាលពីវេលាម៉ោង១រំលងអធ្រាត្រឈានចូលថ្ងៃទី២៧ ខែមករា ឆ្នាំ២០១៦នេះស្ថិតនៅចំណុចផ្ទះជួលក្នុងភូមិព្រៃសាលា សង្កាត់កាកាប ខណ្ឌពោធិសែនជ័យ។
ជនសង្ស័យដែលត្រូវឃាត់ខ្លួនឈ្មោះ សាន់ និស្សិត ភេទប្រុស អាយុ២៥ឆ្នាំ មុខរបរកម្មករសំណង់ស្នាក់នៅផ្ទះជួល ភូមិព្រៃសាលា សង្កាត់កាកាបក្បែរផ្ទះជនរងគ្រោះ មានស្រុកកំណើតនៅភូមិស្ពាន ឃុំកោះចេក ស្រុកពាមជរ ខេត្តព្រៃវែង ។ ចំណែក ស្ត្រីរងគ្រោះឈ្មោះ នី មុំ អាយុ៤៦ឆ្នាំ មានទីលំនៅបន្ទប់ជួល ក្នុងភូមិខាងលើ។
យោងតាមពាក្យបណ្ដឹងរបស់ស្ដ្រីរងគ្រោះបានឱ្យដឹថា កន្លងមកជនសង្ស័យ បានលួចស្រលាញ់កូនស្រីរបស់ជនរងគ្រោះ ប៉ុន្តែជនរងគ្រោះមិនពេញចិត្តនិង អត្តចរិត របស់ជនសង្ស័យទើបមិនព្រមអោយកូនស្រីរបស់ខ្លួនស្រលាញ់ជនសង្ស័យ។ ក្រោយមកជនរងគ្រោះក៏បានបញ្ជូនកូនស្រីរបស់ខ្លួនអោយទៅធ្វើការនៅ ប្រទេសថៃបាត់ទៅដើម្បីគេចពីជនសង្ស័យ។ លុះដល់ថ្ងៃកើតហេតុជនសង្ស័យផឹកស្រា ស្រវឹង ក៏បានលីដាវសាំមូរ៉ៃមករករឿងគំរាមកាប់សម្លាប់ជនរងគ្រោះ ដល់បន្ទប់ជួលតែត្រូវជនរងគ្រោះប្ដឹងទៅកម្លាំងសមត្ថកិច្ចក៏ត្រូវកម្លាំង កងរាជអាវុធហត្ថចុះមកឃាត់ខ្លួនតែម្តងទៅ។
បច្ចុប្បន្នជនសង្ស័យ ត្រូវបានសមត្ថកិច្ចកសាងសំណុំរឿង បញ្ជូនខ្លួនទៅបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីចាត់ការបន្ដតាមនីតិវិធីរួមនឹងវត្ថុតាងដាវសាមូរ៉ៃ១ដើប្រវែងជិត១ម៉ែត្រផងដែរ ៕
ដោយ៖ វិបុល
