ភ្នំពេញ៖ កម្លាំងនគរបាលព្រហ្មទណ្ឌខណ្ឌជ្រោយចង្វា សហការជាមួយប៉ូលិសប៉ុស្តិ៍ជ្រោយចុះស្រាវជ្រាវឃាត់ខ្លួនជនសង្ស័យ៣នាក់ ដែលជាមុខសញ្ញាជួញដូរគ្រឿងញៀនត្រូវបាន កាលពីវេលាម៉ោង9ព្រឹកថ្ងៃទី២៧ ខែមករា ឆ្នាំ២០១៦ ស្ថិតនៅចំណុចផ្លូវជាតិលេខ៦ភូមិគៀនឃ្លាំង សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។
ជនសង្ស័យទាំង៣នាក់នោះ រួមមាន៖ ទី១/ ឈ្មោះ ទូច ម៉េងហ័រ ភេទប្រុស អាយុ២២ឆ្នាំ ស្នាក់នៅភូមិរកាកោង ឃុំរកាកោង ស្រុកមុខកំពូល ខេត្តកណ្តាល ទី២/ ឈ្មោះ ឃៀង គឹមហ័រ ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅសង្កាត់ផ្សារដេប៉ូ ខណ្ឌទួលគោក និងទី៣/ ឈ្មោះ វុធ មករា ភេទប្រុស អាយុ១៥ឆ្នាំ សិស្សថ្នាក់ទី១០ រៀននៅវិទ្យាល័យវត្តកោះ ។
សមត្ថកិច្ចបានបន្តថា នៅពេលឃាត់ខ្លួនជនសង្ស័យ៣នាក់ខាងលើនេះ កម្លាំងសមត្ថកិច្ចរកឃើញគ្រឿងញៀន ( ក្រាមពណ៌សថ្លា ) ចំនួន៤៣កញ្ចប់និង ម៉ូតូសងប៉ិច១គ្រឿង ពាក់ស្លាកលេខភ្នំពេញ1FO-3822រួមនិងសម្ភារះមួយចំនួន។
បច្ចុប្បន្នជនសង្ស័យទាំង៣នាក់កំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេចាត់ការបន្តតាមនីតិវិធី ៕
ដោយ៖ ជ្រោយពេជ្រ
