ប្រធានាធិបតីអាមេរិក ដូណាល់ ត្រាំ គឺជាលើកដំបូងហើយដែលបានពាក់ម៉ាស់ ពេលទៅសួរសុខទុក្ខទាហានរងរបួសនៅក្នុង​មជ្ឈមណ្ឌលសុខាភិបាលយោធា នៅតំបន់Walter Reed កាលពីថ្ងៃទី​១១ខែកក្កដា​ ក្រោយជាច្រើនលើក លោកត្រាំបដិសេធពាក់ម៉ាស់រហូត។
ប្រធានាធិបតីដូណាល់ ត្រាំ ត្រូវពាក់ម៉ាស់​ចំពោះមុខមហាជន​។ ទាំងនោះបានបង្ហាញឲ្យឃើញថា នៅទីបំផុត​លោកត្រំាក៏ត្រូវទទួលរងសម្ពាធ​ឲ្យបង្កើតរូបភាព​គំរូដល់សុខភាពសាធារណៈ ក្នុងពេលកូវីដ-១៩ កំពុងតែឆ្លងរាលដាលកាន់តែខ្លាំងនៅអាមេរិក។
លោកត្រាំពាក់ម៉ាស់ពណ៌ខ្មៅ​ ទៅសួរសុខទុក្ខទាហាន។ លោកត្រាំ​មិនបានឆ្លើយនូវសំណួររបស់អ្នកសារព័ត៌មាន​នោះឡើយ ពេលដែលលោកផ្លាស់ប្តូរឥរិយាបថភ្លាមៗនោះ​។​កន្លងមកលោកត្រាំ បានប្រឆាំងយ៉ាងខ្លាំងដល់ក្រុមអ្នកឯកទេសសុខាភិបាល​ពាក់ព័ន្ធនឹងការពាក់ម៉ាស់។
លោកត្រាំបានប្រកាសទៅកាន់ក្រុមអ្នកសារព័ត៌មានថា​« ខ្ញុំអាចនឹងត្រូវពាក់ម៉ាស់។ ពេលខ្ញុំនៅមន្ទីរពេទ្យយោធា​ខ្ញុំត្រូវនិយាយជាមួយទាហានជាច្រើន ដូច្នេះការពាក់ម៉ាស់គឺជារឿងត្រឹមត្រូវសមហេតុផល​។ ខ្ញុំមិនដែលប្រឆាំងការពាក់ម៉ាស់ឡើយ​ ប៉ុន្តែគឺត្រូវតែធ្វើឡើងសមស្រប»។
តាមសារព័ត៌មាន​ CNNបញ្ជាក់ថា នេះជាលើកទីមួយហើយដែល លោកត្រាំពាក់ម៉ាស់ជាសាធារណៈ។ បច្ចុប្បន្នអាមេរិកមានចំនួនអ្នកឆ្លងកូវីដ​-១៩​កើនឡើងដល់ ​3,355,646​ នាក់ ស្លាប់137,403នាក់ និងជាសះស្បើយ1,490,446នាក់ផងដែរ៕

 

ដោយ៖ ធី រីណា