អន្តរជាតិ៖ នៅថ្ងៃទី១២ ខែកក្កដាម្សិលមិញនេះ អាជ្ញាធរចិន បានប្រកាសអាសន្នកម្រិតខ្ពស់លំដាប់ទីពីរ ក្នុងការឆ្លើយតបនឹងទឹកជំនន់ ដែលហូរចេញយ៉ាងគំហុកពីទន្លេយ៉ង់សេ ខណៈតំបន់ភាគខាងកើតនៃខេត្តជាំងស៊ូ និងខេត្តជាំងស៊ី កំពុងរងផលប៉ះពាល់ពីទឹកជំនន់ខ្លាំងជាងគេ ។
យោងតាមទីភ្នាក់ងារព័ត៌មានរដ្ឋចិន Xinhua បានចេញផ្សាយថា ការប្រកាសអាសន្នក្នុងការឆ្លើយតបទៅនឹងទឹកជំនន់នេះ ត្រូវបានបែងចែកជាបួនកម្រិត ដោយកម្រិតទី១ជាកម្រិតធ្ងន់ធ្ងរបំផុត។ ដោយទឹកជំនន់ក្នុងតំបន់ Poyang ខេត្តជាំងស៊ី បណ្តាលឲ្យកម្ពស់ទឹកក្នុងបឹង Poyang ដែលជាបឹងទឹកសាបធំជាងគេ កើនដល់២២,៥ម៉ែត្រ ដែលជាកម្ពស់មិនធ្លាប់មាន និងដែលលើសកម្ពស់១៩,៥ម៉ែត្រដែលជាកម្រិតប្រកាសអាសន្ន។ ជាមួយនឹងការប្រកាសអាសន្នកម្រិតទីពីរក្នុងខេត្ត Jiangxi គេប៉ាន់ស្មានថា នឹងមានគ្រោះមហន្តរាយបន្ថែមទៀតដូចជាការបាក់ទំនប់ឬទឹកជំនន់ធ្ងន់ធ្ងរមិនធ្លាប់មានក្នុងទន្លេជាច្រើន។
សូមជម្រាបថា ក្នុងហេតុការណ៍គ្រោះទឹកជំនន់នេះដែរ អាជ្ញាធរយោធា នៅតាមខេត្តបានបញ្ជូនទាហានរាប់ពាន់នាក់ ឲ្យទៅជួយពង្រឹងច្រាំងប្រវែង៩គីឡូម៉ែត្រនៅជុំវិញមាត់បឹង ដើម្បីបង្ការការបាក់ច្រាំង ដែលនឹងអាចបណ្តាលឲ្យទឹកហូរចេញកាន់តែច្រើន។ រីឯ នៅតំបន់ជាំងចូវ នៃខេត្តជាំងស៊ី ឯណោះវិញ អាជ្ញាធរតំបន់ បានអំពាវនាវតាមរយៈបណ្តាញសង្គមឲ្យបុរសអាយុពី១៨ឆ្នាំទៅ៦០ឆ្នាំ ឲ្យចូលរួមគ្នាប្រយុទ្ធនឹងទឹកជំនន់ដោយទៅជួយពង្រឹងទំនប់។
បើយោងតាមទិន្ន័យពីក្រសួងធនធានទឹកចិន ក៏បានបញ្ជាក់ថា កម្ពស់ទឹកនៅក្នុងទន្លេចំនួន២១២ បានកើនឡើងហួសពីកម្រិតប្រកាសអាសន្ននាដើមខែកក្កដា ក្នុងនោះកំពស់ទឹកក្នុងទន្លេចំនួន១៩ កើនដល់កម្ពស់មិនធ្លាប់មាន។ ក្នុងពេលជាមួយគ្នានេះដែរ ទីក្រុងផ្សេងទៀតនៅតាមទន្លេយ៉ង់សេ ក៏បានប្រកាសកម្រិតអាសន្នរៀងៗខ្លួន ដោយសារកំណើនទឹកយ៉ាងខ្លាំង ក៏ដូចជាភ្លៀងឥតឈប់ឈរ ដែលបណ្តាលឲ្យបាក់ដី និងជន់លិចផ្លូវ និងស្រែចំការផងដែរ ។
គួរបញ្ជាក់ថា ក្រោយប្រកាសអាសន្នកម្រិតខ្ពស់លំដាប់ពីរ នៅខេត្ត Jiangsu និង Jiangxi នៅភាគខាងកើត ទីភ្នាក់ងារឧតុនិយមចិន ក៏បានព្យាករផងដែរពីព្យុះភ្លៀងនៅខេត្តស៊ីឈ័ន និងទីក្រុងចុងឈីង នៅភាគនារតីប្រទេស ខេត្តហ៊ូប៉ី នៅកណ្តាល និងខេត្តហ៊ូណាននៅខាងត្បូងប្រទេស៕ដោយ៖ស តារា
