មន្ត្រីរដ្ឋាភិបាលខេត្តអូគីណាវ៉ា​ របស់ជប៉ុនបានប្រកាសឲ្យដឹងថា ទីតាំងទាហានជើងទឹកពីរកន្លែងរបស់អាមេរិកត្រូវបានបិទ​ក្រោយរកឃើញមានទាហាន​៦២នាក់ឆ្លងកូវីដ​-១៩​។
តាមការលើកឡើងរបស់កម្លាំងទាហាន អាមេរិក​បានបញ្ជាក់ថា ចាប់តាំងពីថ្ងៃទី​៧ខែកក្កដា​ដល់ធ្ងៃទី​១១ខែកក្កដា នៅទីតាំងទាហានជើងទឹកវាយឡើងគោកFutenma និងCamp Hansen បានរកឃើញមានទាហានជាច្រើនឆ្លងកូវីដ​-១៩​។ ទីតាំងយោធាខាងលើត្រូវបានបិទ មិនឲ្យទាហានចេញចូលឡើយដើម្បីទប់ស្កាត់ការឆ្លងរាលដាល។
ឧត្តមសេនីយ៍​Stacy Clardy មេបញ្ជាការកងទ័ពអាមេរិក​ប្រចាំនៅអូគីណាវ៉ា ក៏បានផ្តល់ព័ត៌មាន​ដល់ថ្នាក់ដឹកនាំ និងរដ្ឋាភិបាលអាមេរិក​តាមទូរស័ព្ទពាក់ព័ន្ធនឹងការឆ្លងកូវីដ​-១៩​។
តាមការលើកឡើងរបស់មន្ត្រីខេត្តអូគីណាវ៉ា របស់ជប៉ុន ទីតាំងទាហានអាកាស Kadena និង McTureous ក៏រកឃើញមានករណីឆ្លងកូវីដ​-១៩ផងដែរ​។ ទីតាំងយោធាអាមេរិក​គឺប្រមូលផ្តុំគ្នានៅក្នុងខេត្តអូគីណាវ៉ា​។ នៅក្នុងខេត្តនេះដែរ មានករណីឆ្លងកូវីដ​-១៩ចំនួន១៤៨ នាក់ ដែលចំនួននេះមិនបូកបញ្ជូលទាហានអាមេរិកនោះឡើយ៕

ដោយ៖ ធី រីណា