ភ្នំពេញ៖ នគរបាលការិយាល័យប្រឆាំងគ្រឿងញៀនរាជធានីបានចាប់ខ្លួនជនសង្ស័យ ម្នាក់ ពាក់ព័ន្ធចែកចាយគ្រឿងញៀន គ្រាដែលជនសង្ស័យរូបនេះធ្វើសកម្មភាពនៅក្នុងផ្ទះរបស់ខ្លួន។
ការឃាត់ខ្លួនជនសង្ស័យខាងលើនេះប្រព្រឹត្តទៅកាលពីវេលាម៉ោង៣ និង១០នាទីរសៀល ថ្ងៃទី២៨ ខែមករា ឆ្នាំ២០១៦នៅផ្ទះរបស់ជនសង្ស័យ តាមបណ្ដោយផ្លូវលំ ស្ថិតក្នុងភូមិមានជ័យ១ សង្កាត់ស្ទឹងមានជ័យ ខណ្ឌមានជ័យ ។
ជនសង្ស័យដែលត្រូវសមត្ថកិច្ចចាប់ខ្លួនមានឈ្មោះ ចាន់ រ៉ាវី ភេទប្រុស អាយុ២៦ឆ្នាំ មុខរបររើសអេតចាយ មានទីលំនៅកន្លែងកើតហេតុ ។
សមត្ថកិច្ចឲ្យដឹងថា ខណៈដែលចាប់ខ្លួនជនសង្ស័យ សមត្ថកិច្ចដកហូតបានវត្ថុតាងរួមមាន ថ្នាំញៀនប្រភេទក្រាមពណ៌សថ្លា៤កញ្ចប់តូច និង២កញ្ចប់ធំ, ឧបករណ៍សម្រាប់ប្រើប្រាស់គ្រឿងញៀនមួយចំនួន, សៀវភៅបញ្ជីកត់ត្រាថ្លៃជំពាក់គ្រឿងញៀន១ក្បាល និងដាវសាំម៉ូរ៉ៃ២ដើម ។
ជនសង្ស័យរូបនេះត្រូវបានបញ្ជូនទៅកាន់ការិយាល័យនគរបាលប្រឆាំងគ្រឿងញៀននៃស្នងការដ្ឋាននគរបាលរាជធានីភ្នំពេញដើម្បីធ្វើការសាកសួរ និងចាត់ការតាមនីតិវិធី៕
ដោយ៖ ប្រាថ្នា
