មានករណីវាយប្រហារដោយគ្រាប់បែកបង្កៃនៅក្នុងរថយន្ត កើតឡើងនៅតំបន់ Azaz ភាគខាងលិចប្រទេសស៊ីរី បណ្តាលឲ្យមនុស្ស៩០នាក់ស្លាប់និងរបួស។
ការវាយប្រហារកើតឡើងនៅថ្ងៃទី១៩ ខែកក្កដា ស្ថិតនៅក្នុងភូមិ Siccu តំបន់Azaz ភាគខាងលិចប្រទេសស៊ីរី ជាប់ព្រំដែនខេត្តភាគខាងត្បូងគឺខេត្តKillis របស់ប្រទេសទួរគី។
ការវាយប្រហារខាងលើបណ្តាលឲ្យមនុស្ស៥នាក់ស្លាប់ និង ៨៥នាក់រងរបួសជាទម្ងន់ ។ អ្នករងរបួស១៥នាក់ក៏បានបញ្ជូនទៅព្យាបាលនៅក្នុងប្រទេសទួរគីផងដែរ ក្នុងនោះមានម្នាក់របួសធ្ងន់។
ហេតុការណ៍វាយប្រហារខាងលើកើតឡើងក្នុងពេលដែលស៊ីរីចាប់ផ្តើមបោះឆ្នោតសភានៅទូទាំងប្រទេស។មូលហេតុដែលបណ្តាលឲ្យមានការវាយប្រហារគ្រាប់បែកខាងលើ ក្រុមជំនាញកំពុងតែធ្វើការស្រាវជ្រាវ ហើយមកទល់ពេលនេះមិនទាន់មានក្រុមណាមួយចេញមុខទទួលស្គាល់នៅឡើយទេ។
ពាក់ព័ន្ធនឺងការបោះឆ្នោតនៅស៊ីរីនាថ្ងៃទី១៩ខែកក្កដា ដែលជាការបោះឆ្នោតលើកទី៣ចាប់តំាងពីឆ្នាំ២០១១មក។ មកទល់ពេលនេះមិនទាន់មានលទ្ធផលនៅឡើយ ប៉ុន្តែមានការព្យាករថា គណបក្សកាន់អំណាចរបស់ប្រធានាធិបតី អាល់អាសាដ នឹងទទួលបានការគាំទ្រខ្ពស់ ៕
ដោយ៖ ធី រីណា
