ភ្នំពេញ៖ បុរសម្នាក់ស្រវឹងជោកជាំជិះម៉ូតូមួយគ្រឿងម៉ាក អាយខុនជ្រុលទៅបុកម៉ូតូម៉ាកហុងដា ឌ្រីមសេ125ដែលជិះបញ្ច្រាស់ទិសគ្នា ពេញទំហឹងបណ្ដាលអោយរងរបួសធ្ងន់និងស្រាលចំនួនបីនាក់។
ហេតុការណ៍គ្រោះថ្នាក់ចរាចរណ៍នេះបានកើតឡើង កាលពីវេលាម៉ោង២៣និង១០នាទីយប់ ថ្ងៃទី២៩ ខែមករា ឆ្នាំ២០១៦ នៅចំណុចខាងមុខក្រសួង ប្រៃសណីយ៍និងទូរគមនាគមន៍កម្ពុុជា តាមបណ្ដោយផ្លូវលេខ១៣ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
យោងតាមសាក្សីនៅកន្លែងកើតហេតុបានអោយដឹងថា នៅមុនពេលកើតហេតុ គេបានឃើញបុរសម្នាក់ជិះម៉ូតូម៉ាក អាយខុន ពណ៍លឿងលាយសរ ពាក់ស្លាកលេខ ព្រះវិហារ1B-0792 ស្ថិតក្នុងស្ថានភាពស្រវឹងជោក ធ្វើដំណើរតាមបណ្ដោយផ្លូវលេខ១៣ ទិសដៅពីជើងទៅត្បូងជិះនឿនមិនបានប្រុងប្រយ័ត្ន លុះមកដល់ចំណុចកើតហេតុក៏ជ្រុលទៅបុកម៉ូតូម៉ាក ឌ្រីមសេ125 ពណ៍ខ្មៅ ពាក់ស្លាកលេខ ភ្នំពេញ1H-4773 ជិះដោយបុរសនារីពីរនាក់ធ្វើដំណើរបញ្ច្រាសទិសគ្នាពេញទំហឹងបណ្ដាលអោយអ្នកជិះម៉ូតូអាយខុនរងរបួសបែកក្បាលនិងបុរសអ្នកបើកម៉ូតូឌ្រីមសង់រងរួសបែកចិញ្ចើមរីឯនារីជិះខាងក្រោយរងរបួសស្រាល។
ក្រោយកើតហេតុភាគីទាំងសងខាងនិយាយមិនត្រូវគ្នាបើទោះជាមានការសម្របសម្រួលពីសមត្ថកិច្ចក៏ដោយ ទើបកម្លាំងនគបាល ជំនាញចុះធ្វើការវាស់វែងយកទៅរក្សាទុកនៅអធិការដ្ឋានខណ្ឌដូនពេញ ដើម្បីរងចាំដោះស្រាយនៅពេលក្រោយ៕
ដោយ៖ ព្រែកជ័យ
