អន្តរជាតិ៖ ការិយាល័យស៊ើបអង្កេតសហព័ន្ធអាមេរិកហៅកាត់ថា FBI បានធ្វើការសួរនាំអ្នកកាន់ទិដ្ឋាការជនជាតិចិនជាច្រើននាក់ ដែលរស់នៅក្នុងទីក្រុងចំនួនច្រើនជាង ២៥ របស់សហរដ្ឋអាមេរិក ពីបទសង្ស័យថា បានលាក់បាំងអត្តសញ្ញាណ​ជាសមាជិកយោធាចិនរបស់ពួកគេខណៈជនជាតិចិន ០៣នាក់ហើយត្រូវបានឃាត់ខ្លួន។ នេះបើយោងតាមសេចក្តីរាយការណ៍របស់ក្រសួងយុត្តិធម៌អាមេរិក នៅថ្ងៃព្រហស្បតិ៍ទី២៣ ខែកក្កដា ឆ្នាំ២០២០ (ក្នុងពេលវេលានៅវ៉ាស៊ីនតោន) ។

បើតាមទីភ្នាក់ងារសារព័ត៌មាន CNA ចេញផ្សាយនៅព្រឹកថ្ងៃសុក្រ ទី២៤ ខែកក្កដា ឆ្នាំ២០២០នេះថា លោក ចន ឌីមើស៍ (John Demers) ជំនួយការនៃអគ្គរដ្ឋអាជ្ញារងអាមេរិក បានលើកឡើងថា «សមាជិកនៃកងទ័ពរំដោះប្រជាជនចិន (PLA) បានដាក់ពាក្យសុំទិដ្ឋាការស្រាវជ្រាវនៅសហរដ្ឋអាមេរិក ខណៈដែលពួកគេទាំងនោះ​បានលាក់សម្ព័ន្ធភាពពិតរបស់ពួកគេជាមួយ PLA… នេះគឺជាផ្នែកមួយទៀតនៃផែនការរបស់បក្សកុម្មុយនីស្តចិន ដើម្បីទាញយកផលប្រយោជន៍ ពីសង្គមដ៏បើកចំហរបស់យើង និងបានកេងចំណេញពីស្ថាប័នអប់រំ​របស់យើងច្រើនណាស់»។

ក្រសួងយុត្តិធម៌អាមេរិក បានគូសបញ្ជាក់ថា ស្ថាប័នFBI បានឃាត់ខ្លួនជនជាតិចិន ០៣នាក់ ពីបទលាក់បាំងសមាជិកភាព នៅក្នុងកងទ័ពប្រជាជនចិន PLA នៅពេលពួកគេបានដាក់ពាក្យស្នើសុំទិដ្ឋាការ ដើម្បីធ្វើការស្រាវជ្រាវ នៅស្ថាប័នសិក្សារបស់សហរដ្ឋអាមេរិក។ ក្រសួងយុត្តិធម៌អាមេរិកបានបន្ថែមថា FBI កំពុងស្វែងរកចាប់ខ្លួនជនសង្ស័យទី ០៤ ដែលបានស្វែងរកការជ្រកកោន​នៅក្នុងស្ថានកុងស៊ុលចិននៅរដ្ឋសាន់ហ្វ្រាន់ស៊ីស្កូ បន្ទាប់ពីត្រូវបានសម្ភាសន៍​ដោយការិយាល័យកាលពីខែមិថុនាកន្លងទៅនេះ។

សូមជម្រាបថា កាលពីម្សិលមិញនេះ រដ្ឋាភិបាលអាមេរិកបានសម្រេចចិត្តទុកពេលឲ្យចិន ៧២ម៉ោង ដើម្បបិទស្ថានកុងស៊ុលរបស់ខ្លួន នៅក្នុងទីក្រុងហូស្តុន (Houston) នៃរដ្ឋតិចសាស់ ដែលជាស្ថានកុងស៊ុលចំណាស់ជាងគេបំផុតរបស់ចិន នៅលើទឹកដីសហរដ្ឋអាមេរិក។ការសម្រេចចិត្តបែបនេះ ត្រូវបានធ្វើឡើងក្រោមហេតុផល ការពារកម្មសិទ្ធិបញ្ញា និងព័ត៌មានឯកជនរបស់ប្រជាជនអាមេរិក ពីការស៊ើបការណ៍ ឬលួចពីសំណាក់ទីក្រុងប៉េកាំង។

ជុំវិញបញ្ហានេះ ក្រសួងការបរទេសចិន បានប្រកាស​នៅក្នុងសប្តាហ៍នេះថា ខ្លួនច្រានចោលរាល់ការចោទប្រកាន់ ដែលមិនសមហេតុផលទាំងឡាយ​ពីសំណាក់សហរដ្ឋអាមេរិក និងបានចាត់ទុកទង្វើបិទស្ថានកុងស៊ុលចិន ព្រមទាំងគំរាមកំហែងនានា ពីសំណាក់ប្រធានាធិបតីអាមេរិកលោក ដូណាល់ ត្រាំ គ្រាន់តែជាការបិទបាំងភាពបរាជ័យ នៅមុនការបោះឆ្នោតប្រធានាធិបតី​នៅក្នុងខែវិច្ឆិកាខាងមុខនេះប៉ុណ្ណោះ៕ដោយ៖ស តារា