អន្តរជាតិ៖ យោងតាមបទបញ្ជារបស់ក្រសួងដឹកជញ្ជូនវៀតណាម ដែលចេញនៅល្ងាចថ្ងៃទី២៧ ខែកក្កដាម្សិលមិញនេះថា ដើម្បីទប់ស្កាត់ការរាតត្បាតCOVID-19 នៅក្នុងប្រទេសមួយនេះ អាជ្ញាធរក្រុងដាណាង បានសម្រេចបិទជើងហោះហើរ និងប្រព័ន្ធដឹកជញ្ជូននៅក្នុងទីក្រុង ចាប់ពីម៉ោង ១២យប់ ថ្ងៃទី២៨ ខែកក្កដានេះតទៅ ។ ចំណែក ដំណើរការនៃការជម្លៀសប្រជាជនចេញពីទីក្រុងក៏ត្រូវផ្អាកផងដែរ ។
ក្រសួងដឹកជញ្ជូនវៀតណាម បានចេញបទបញ្ជាថ្មីមួយ នៅល្ងាចថ្ងៃទី២៧ ខែកក្កដា ដោយផ្អាកជើងហោះហើរក្នុងស្រុក ចេញ និងចូលក្រុងដាណាងទាំងអស់ ក្នុងរយៈពេល ១៥ថ្ងៃ ចាប់ពីម៉ោង១២យប់ថ្ងៃទី២៨ ខែកក្កដាតទៅ។ ដោយឡែក ជើងយន្តហោះជម្លៀសអ្នកដំណើរ ត្រូវតែចាកចេញពីក្រុងដាណាងមុនម៉ោង ១២យប់ថ្ងៃទី២៨ ខែកក្កដា ហើយជើងហោះហើរនៅសល់ត្រូវផ្អាកសិន។ គិតត្រឹមថ្ងៃទី២៧ ខែកក្កដាទីក្រុងដាណាង បានរាយការណ៍ពីករណីឆ្លងសរុបចំនួន ១៥ករណីហើយ ដែលមានពាក់ព័ន្ធនឹងមន្ទីរពេទ្យចំនួន៣ នៅក្នុងទីក្រុងទេសចរណ៍មួយនេះ។ នេះបើតាមការចុះផ្សាយនៅលើគេហទំព័ររដ្ឋាភិបាលវៀតណាម VGP NEWS។
តាមការបញ្ជាក់របស់រដ្ឋមន្ត្រីស្តីទីសុខាភិបាលវៀតណាម ជំងឺ COVID-19 ពេលនេះ គឺជាប្រភេទថ្មី ដោយផ្អែកទៅតាមការវិភាគលើហ្សែនរបស់វីរុស ហើយឆ្លងខ្លាំងជាងមុខ។ ទើបធ្វើឲ្យវៀតណាមត្រូវតែចេញចំណាត់ការជាបន្ទាន់ និងជាបន្តបន្ទាប់ ដើម្បីទប់ស្កាត់ករណីឆ្លងនេះ។ ជាមួយគ្នានេះ វៀតណាម ក៏បានផ្អាកការធ្វើដំណើរនៅក្នុងទីក្រុង និងការធ្វើដំណើរចេញចូលក្រុងដាណាងផងដែរ លើកលែងករណីចាំបាច់ដូចជាអ្នកជំងឺ កម្មករជំនាញ បុគ្គលិកក្នុងរោងចក្រម្ហូបអាហារប៉ុណ្ណោះ។
សូមជម្រាបថា ប្រជាជនវៀតណាម ដែលរស់នៅក្នុងសង្កាត់ចំនួន៦ ក្នុងក្រុងដាណាង ត្រូវបានអាជ្ញាធរស្នើឲ្យស្នាក់នៅផ្ទះបណ្តោះអាសន្នសិន ដើម្បីជៀសវាងការឆ្លងCOVID-19។ ប្រជាជនទាំងនោះ ក៏អាចចាកចេញពីផ្ទះ ក្នុងករណីចាំបាច់តែប៉ុណ្ណោះ ដូចជា៖ ម្ហូបអាហារថ្នាំពេទ្យ និងអ្នកធ្វើការក្នុងរោងចក្រជាដើម។
បច្ចុប្បន្ន មន្ទីរពេទ្យចំនួនបីក្នុងក្រុងដាណាង ដែលត្រូវបានគេរកឃើញថាមានពាក់ព័ន្ធនឹងករណីឆ្លង COVID-19 ក៏ត្រូវអាជ្ញាធរបិទផងដែរ។បើគិតត្រឹមថ្ងៃទី២៧ ខែកក្កដា វៀតណាម បានធ្វើតេស្តលើប្រជាជនចំនួន ៧៦១នាក់ ដែលមានពាក់ព័ន្ធនឹងអ្នកជំងឺ COVID-19។ ករណីCOVID-19 សរុបរបស់វៀតណាម បានកើនដល់ ៤៣១នាក់ និងមិនមានករណីស្លាប់។ រីឯអ្នកជាសះស្បើយមានចំនួន ៣៦៥នាក់៕ ដោយ៖ស តារា
