ខេត្តកណ្ដាល៖ ចោរមួយក្រុមមានគ្នា៣នាក់ប្រដាប់ដោយកាំភ្លើង២ដើមនិងដំបងចូលធ្វើសកម្មភាពភ្ជង់ស្ដ្រី២នាក់ម្ដាយនិងកូនដែលកំពង់អង្គុយលក់ចាប់ហួយក្នុងផ្ទះដ៏តូចមួយ ប្រមូលយកទ្រព្យសម្បត្ដិមួយចំនួនរួចរត់គេចខ្លួនបាត់ដោយសុវត្ថិភាព ។ ករណីប្លន់ប្រដាប់អាវុធនេះបានកើតឡើងនៅវេលាម៉ោង១៩និង១០នាទី ថ្ងៃទី៣១ ខែមករា ឆ្នាំ២០១៦ ស្ថិតក្នុងភូមិតាគោក ឃុំឈ្វាំង ស្រុកពញាឮ ខេត្ដកណ្ដាល ។
ជនរងគ្រោះទី១ឈ្មោះ ព្រីង ស៊ឹម ភេទស្រី អាយុ៤៥ឆ្នាំ មុខរបរលក់ចាប់ហួយ និងម្នាក់ទៀតជាកូនបង្កើតឈ្មោះ តេង រ៉ាន់ ភេទស្រី អាយុ២៥ឆ្នាំ រស់នៅផ្ទះជាមួយគ្នាក្នុងភូមិកើតហេតុខាងលើ ។ ជនរងគ្រោះទាំង២នាក់មិនត្រូវបានក្រុមចោរវាយនិងបាញ់ឲ្យរបួសនោះទេ ពោលគឺគ្រាន់តែបាត់បង់ទ្រព្យសម្បតិ្ដមួយចំនួនប៉ុណ្ណោះ ។
ស្ដ្រីរងគ្រោះ២នាក់ម្ដាយនិងកូនបានអះអាងប្រាប់សមត្ថកិច្ចនគរបាលថា ក្រុមចោរមានគ្នា៣នាក់ ប្រដាប់ដោយកាំភ្លើងវែង១ដើម ,ខ្លី១ដើម និងដំបងឬស្សី១ដើម បានសម្រុកចូលមកភ្ជង់រួចរើកកាយប្រមូលយកទ្រព្យសម្បត្ដិមួយចំនួនរួមមាន ប្រាក់ដុល្លារចំនួន១១០០ដុល្លារសហរដ្ឋអាមេរិក ,ចិញ្ចៀនពេជ្រ៥វង់ស្មើនិងតម្លៃសរុប៨០០០ដុល្លារសហរដ្ឋអាមេរិក ,ខ្សែដៃចំនួន៤ខ្សែ ,ប័ណ្ណសម្គាល់យានយន្ដ(កាតគ្រីម៉ូតូ)ចំនួន៣និងទូរស័ព្ទដៃចំនួន២គ្រឿងផងដែរ ។
ស្ដ្រីរងគ្រោះជាម្ចាស់ផ្ទះបានបញ្ជាក់ថា នៅមុនពេលកើតហេតុពួកគាត់បាននាំគ្នាអង្គុយនៅក្នុងផ្ទះបើកទ្វារលក់អីវ៉ាន់ចាប់ហួយជាធម្មតាដូចសព្វមួយដង ខណៈនោះមានជនស៊ីវិល៣នាក់ ម្នាក់ពាក់អាវសលាយផ្កា ២នាក់ទៀតស្លៀកពាក់ខ្មៅមួយឈុតប្រដាប់ដោយកាំភ្លើងវែង-ខ្លីនិងដំបងឬស្សីមួយដើមសម្រុកចូលមកក្នុងផ្ទះភ្ជង់មិនឲ្យស្រែក ។ ហើយបក្ខពួកវាបានរើកកាយសម្ភារៈនៅក្នុងផ្ទះប្រមូលយកទ្រព្យសម្បត្ដិ រួចគេចខ្លួនទៅទិសខាងត្បួង(ទៅភ្នំបាសិទ្ធិ)បាត់ទៅ ។
ក្រោយពីមានអំពើប្លន់ប្រដាប់អាវុធកើតឡើងគេសង្កេតឃើញវត្ដមានលោកឧត្ដមសេនីយ៏ត្រី រឿន ណារ៉ា ស្នងការរងនគរបាលខេត្ដកណ្ដាល ដឹកនាំកម្លាំងនគរបាលការិយាល័យជំនាញព្រហ្មទណ្ឌសហការជាមួយនគរបាលស្រុកពញាឮ និងស្រុកអង្គស្នួលចុះធ្វើការស្រាវ ជ្រាវស្វែងរកចាប់ខ្លួនក្រុមចោរ ទោះជាយ៉ាងណាក្ដីក្រុមចោរបានគេចខ្លួនទៅបាត់មុនពេលសមត្ថកិច្ចទៅដល់ ។ បច្ចុប្បន្នសមត្ថកិច្ចនគរបាលព្រហ្មទណ្ឌខេត្ដកណ្ដាលបន្ដសហការជាមួយសមត្ថកិច្ចនគរបាលស្រុកពញាឮដែលជាម្ចាស់ករណី ដើម្បីស្វែងរកចាប់ខ្លួនក្រុមចោរទាំងនោះយកមកផ្ដន្ទាទោសតាមច្បាប់ ៕
ដោយ៖ ស្អាងជ័យ
