អន្តរជាតិ៖ លោកAmit Shah រដ្ឋមន្ត្រីមហាផ្ទៃឥណ្ឌា នៅថ្ងៃទី២ ខែសីហា ឆ្នាំ២០២០ បានអះអាងថា លោក ស្ថិតក្នុងចំណោមប្រជាជនឥណ្ឌាកចំនួនជាង១,៨លាននាក់ផ្សេងទៀត ដែលឆ្លង COVID-19 ។ បន្ទាប់ពីលោកមានផ្ទុក COVID-19 និងត្រូវបានបញ្ជូនទៅមន្ទីរពេទ្យ ដើម្បីព្យាបាល ។
យោងតាមសំណេររបស់លោក Amit Shah រដ្ឋមន្ត្រីមហាផ្ទៃដែលឆ្លង COVID-19 បានសរសេរនៅលើបណ្តាញសង្គម Twitterយ៉ាងដូច្នេះថា៖ «ខ្ញុំស្នើឲ្យអ្នកមានទំនាក់ទំនងជិតស្និទ្ធជាមួយខ្ញុំក្នុងរយៈពេលពីរបីថ្ងៃចុងក្រោយនេះ ដាក់ចត្តាឡីស័ក និងធ្វើតេស្ត»។ លោករដ្ឋមន្ត្រីមហាផ្ទៃ បានបន្ថែមថា លោកបានឲ្យគេតេស្តរកCOVID-19 បន្ទាប់ពីចេញរោគសញ្ញា និងរកឃើញមានផ្ទុកកូរ៉ូណាវីរុស។ពេលនេះសុខភាពរបស់លោករដ្ឋមន្ត្រី មិនមានបញ្ហាអ្វីទេ និងកំពុងស្នាក់នៅមន្ទីរពេទ្យ ដើម្បីទទួលការព្យាបាល។
យ៉ាងណាក៏ដោយ អ្នកនាំពាក្យក្រសួងមហាផ្ទៃ មិនអាចបញ្ជាក់បានទេ ថាតើលោករដ្ឋមន្ត្រីមហាផ្ទៃ បានជួបជាមួយលោកនាយករដ្ឋមន្ត្រីចុងក្រោយនៅពេលណានោះ។ ព្រោះលោក Shah គឺជាមនុស្សជំនិតរបស់លោកនាយករដ្ឋមន្ត្រីឥណ្ឌា នារិន្ទ្រា ម៉ូឌី ហើយលោកក៏ជាអ្នកទទួលបន្ទុកការគ្រប់គ្រង និងប្រយុទ្ធប្រឆាំង COVID-19 មួយរូបដែរ។
សូមជម្រាបថា ករណីឆ្លងលើរដ្ឋមន្ត្រីមហាផ្ទៃឥណ្ឌារូបនេះ កើតឡើងស្របពេលឥណ្ឌា ដែលឈរនៅលំដាប់ទី៣ នៃប្រទេសមាន COVID-19 ច្រើនជាង បានកើនឡើងករណីឆ្លងសរុបដល់ជាង ១,៨លានករណី និងអ្នកស្លាប់ ៣៨១៦១នាក់។ គិតចាប់ពីថ្ងៃទី២៩ ខែកក្កដាកន្លងមកឥណ្ឌាមានករណីឆ្លងកូរ៉ូណាវីរុសប្រចាំថ្ងៃលើសពី ៥ម៉ឺនករណី។ ជាក់ស្តែងនៅថ្ងៃទី២ ខែសីហាម្សិ់មិញនេះ ប្រទេសឥណ្ឌាមានករណីឆ្លងCOVID-19 ចំនួន ៥២៧៨៣ករណី និងអ្នកស្លាប់ចំនួន ៧៥៨នាក់។
គួរបញ្ជាក់ថា ក្រៅពីរដ្ឋមន្ត្រីមហាផ្ទៃឥណ្ឌា នៅមានមន្ត្រីជាន់ខ្ពស់ឥណ្ឌាផ្សេងទៀត ក៏ឆ្លង COVID-19 ដែរ ក្នុងនោះមានដូចជា នាយករដ្ឋមន្ត្រីនៃរដ្ឋ Karnataka លោក B S Yediyurappa និងអភិបាលរដ្ឋ Tamil Nadu លោក Banwarilal Purohit ។ រដ្ឋទាំងពីរនេះ គឺស្ថិតនៅភាគខាងត្បូងរបស់ឥណ្ឌា៕ដោយ៖ស តារា
