ខេត្តព្រះសីហនុ៖ ជនសង្ស័យម្នាក់ ដែលជាជនជាតិចិន ក្រោយធ្វើសកម្មភាពវាយប្លន់លុយ៦ពាន់ដុល្លារ ពីជនជាតិចិនដូចគ្នាបានសម្រេច នៅក្រុងព្រះសីហនុ ហើយគេចខ្លួនបាត់មួយរយៈ ពេលនេះត្រូវបានកម្លាំងអធិការដ្ឋាននគរបាលក្រុងព្រះសីហនុ បានឃាត់ខ្លួនយកមកសាកសួរ ដើម្បីស្វែងរកបក្ខពួកបន្តទៀត ។
បើតាមសម្តីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានបញ្ជាក់នៅរសៀលថ្ងៃទី៥ ខែសីហា ឆ្នាំ២០២០នេះថា ជនសង្ស័យឈ្មោះ Xie Mohai ភេទប្រុស ជនជាតិចិន អាយុ៣៥ឆ្នាំ មុខរបរមិនពិតប្រាកដ និងស្នាក់នៅមិនពិតប្រាកដ ត្រូវកម្លាំងជំនាញឃាត់ខ្លួនកាលពីរសៀលថ្ងៃទី៣ ខែសីហា ឆ្នាំ២០២០ ក្នុងករណីលួចមានស្ថានទម្ងន់ទោស (ហិង្សាប្រើកាំបិតចុងស្រួចគំរាមប្លន់) យកលុយចំនួន ៦០០០ដុល្លារ នៅចំណុចក្នុងបន្ទប់លេខ៨២២៣ សណ្ឋាគារ ស៊ីទូហាយកាង ស្ថិតក្នុងសង្កាត់លេខ៤ ក្រុង-ខេត្តព្រះសីហនុ កាលពីថ្ងៃទី១៩ ខែកក្កដា ឆ្នាំ២០២០ វេលាម៉ោងប្រហែល ១២.០០នាទីថ្ងៃត្រង់។
ចំណែកជនរងគ្រោះមានឈ្មោះ Huang Jie ភេទស្រី អាយុ៣០ឆ្នាំ ជនជាតិចិន ស្នាក់នៅផ្ទះជួល សង្កាត់លេខ៣ ក្រុង-ខេត្តព្រះសីហនុ មុខរបរបុគ្គលិកសណ្ឋាគារផ្នែកម៉ាស្សា។ ដោយ
លោក ជួន ណារិន្ទ បន្តថា ក្រោយឃាត់ខ្លួនសួរនាំ ជនសង្ស័យបានសារភាពថា កាលពីថ្ងៃទី១៩ ខែកក្កដា ឆ្នាំ២០២០ ខ្លួនពិតជាបានទូរសព្ទ័ហៅជនរងគ្រោះឲ្យទៅម៉ាស្សានៅសណ្ឋាគារ ស៊ីទូហាយកាង រួចធ្វើសកម្មភាពយកកាំបិតចុងស្រួចភ្ជង់គំរាមប្លន់យកលុយចំនួន ៦០០០ដុល្លារ ប្រាកដមែន។
បច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាននគរបាលក្រុងព្រះសីហនុ ដើម្បីចាត់ការតាមនីតិវិធីច្បាប់ ៕

ដោយ៖ឆ្លាម សមុទ្រ